ପାଟନା,୫।୯: ବିହାରରେ ଜେଡିୟୁ ଭାଜପା ସହ ମେଣ୍ଟ ଭାଙ୍ଗିବା ପରେ ରାଜନୈତିକ ବାକ୍ଯୁଦ୍ଧ ଜାରି ରହିଛି। ଭାଜପା ଓ ଜେଡିୟୁ ନେତାମାନେ ପରସ୍ପର ଉପରେ ଆରୋପ-ପ୍ରତ୍ୟାରୋପ କରୁଛନ୍ତି। ଜେଡିୟୁ ନ୍ୟାଶନାଲ କାଉନସିଲର ବୈଠକରେ ମୁଖ୍ୟମନ୍ତ୍ରୀ ନୀତୀଶ କୁମାର ୨୦୧୭ରେ ଭାଜପା ସହ ମେଣ୍ଟ କରିବା ଭୁଲ ନିଷ୍ପତ୍ତି ଏବଂ ଏହା ଆମର ମୂର୍ଖତା ବୋଲି କହିଥିଲେ।
ନୀତୀଶ କୁମାର କହିଛନ୍ତି, ୨୦୧୯ରେ ଲୋକ ସଭା ନିର୍ବାଚନ ପରେ କେନ୍ଦ୍ର ସରକାରରେ ମନ୍ତ୍ରୀ ହେବା ପାଇଁ ଦୁଇଟି ନାମ ଦେବା ପାଇଁ କୁହାଯାଇଥିଲା। କିନ୍ତୁ ଆମେ ଦିଲ୍ଲୀରେ ପହଞ୍ଚିବା ପରେ କେବଳ ଗୋଟିଏ ନାମ ଆବଶ୍ୟକ ବୋଲି କୁହାଗଲା। ଆମେ ରାଜି ହୋଇ ନ ଥିଲୁ କାରଣ ଆମେ ଚାହୁଁଥିଲୁ ଯେ ଜେଡିୟୁ କୋଟାରୁ କେନ୍ଦ୍ରରେ ଚାରିଜଣ ମନ୍ତ୍ରୀ ରହିବା ଉଚିତ। ଶେଷରେ ଆମ ଦଳର ଜଣେ ମନ୍ତ୍ରୀ ହୋଇଥିଲେ। ଯେପର୍ଯ୍ୟନ୍ତ ଆମର ଦଳ ଅଛି, ଆମେ ଏହି ଲୋକଙ୍କ(ଭାଜପା) ସହ କୌଣସି ଆପୋଷ ବୁଝାମଣା କରିବୁ ନାହିଁ। ଏହି ଲୋକମାନେ କେବଳ ହିନ୍ଦୁ-ମୁସଲମାନମାନଙ୍କୁ ବିଭାଜନ କରି ଶାସନ କରିବାକୁ ଚାହାଁନ୍ତି। ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ଆରଏସଏସ କଥା ଶୁଣି ନ ଥିଲେ ଏବଂ ପୂର୍ବରୁ କେନ୍ଦ୍ର ସରକାରଙ୍କ ମନ୍ତ୍ରୀମାନେ ଏକ କାର୍ଯ୍ୟକ୍ରମକୁ ଯିବାବେଳେ ସେମାନଙ୍କ ନାମ ନେଉଥିଲେ, କିନ୍ତୁ ବର୍ତ୍ତମାନ ସେମାନେ ଅଟଳ ଜୀଙ୍କ ନାମ ନେବାକୁ ଭୁଲି ଯାଇଛନ୍ତି।
ସୂଚନାଯୋଗ୍ୟ, ଗତ ମାସରେ ହଠାତ୍ ଭାଜପା ହାତ ଛାଡି ଜେଡିୟୁ ସହ ମିଶି ନୀତୀଶ ବିହାରରେ ନୂତନ ସରକାର ଗଢିଥିଲେ। ଏହାପରଠାରୁ ଉଭୟ ଦଳର ନେତାଙ୍କ ମଧ୍ୟରେ ବାକ୍ଯୁଦ୍ଧ ଲାଗି ରହିଛି।
