କେନ୍ଦ୍ରାପଡ଼ା ଅଫିସ, ୧୪ା୫: କେନ୍ଦ୍ରାପଡ଼ା ଜିଲା ନିକିରାଇ ଥାନା ଅଞ୍ଚଳର ଜଣେ ନାବାଳିକାଙ୍କ କରୁଣ କାହାଣୀ ଶୁକ୍ରବାର ଲୋକଲୋଚନକୁ ଆସିଛି। ଜଣେ ବ୍ୟକ୍ତି ନାବାଳିକାଙ୍କୁ କାମ ଦେବାକୁ ପ୍ରତିଶ୍ରୁତି ଦେଇ ମା’ବାପାଙ୍କ ପାଖରୁ ତାଙ୍କୁ ନେଇ ଯାଇଥିଲେ। କାମ କରି ଦୁଇ ପଇସା ରୋଜଗାର କରି ଘର ଲୋକଙ୍କୁ ଦେବେ ବୋଲି ଆଗ୍ରହର ସହ ନାବାଳିକା ଜଣକ ଘରୁ ଗୋଡ କାଢି ଯାଇଥିଲେ। ହେଲେ କାମ ତ ଦେବା ଦୂରର କଥା ତାଙ୍କୁ ୬୦ ହଜାର ଟଙ୍କାରେ ଉକ୍ତ ବ୍ୟକ୍ତି ବିକ୍ରି କରି ଦେଇଥିଲେ। ନାବାଳିକାଙ୍କୁ କିଣି ନେଇଥିବା ବ୍ୟକ୍ତି ଜଣଙ୍କ ତାଙ୍କୁ ପାଖରେ ରଖି ବଳାତ୍କାର କରିବା ଯୋଗୁ ସେ ଗର୍ଭବତୀ ହୋଇଥିଲେ। ପୁଅ ହେବା ପରେ ତାଙ୍କୁ ମାଡ ମାରି ବିଦା କରି ଦେଇଥିବା ନେଇ ଥାନାରେ ଗତ ୧୦ ତାରିଖରେ ଅଭିଯୋଗ ହୋଇଛି। ପୀଡ଼ିତା ନାବାଳିକାଙ୍କ ମା’ଙ୍କ ଅଭିଯୋଗ ଅନୁଯାୟୀ, ତାଙ୍କ ଝିଅର ବୟସ ୧୭। ଗତବର୍ଷ ଗଁାର ଜଣେ ବ୍ୟକ୍ତି ଏହି ଝିଅକୁ କାମରେ ଲଗାଇ ଦେବ କହି ଘରୁ ନେଇଥିଲେ। ମାସକୁ ମାସ ଦରମା ମିଳିବ ବୋଲି ପ୍ରତିଶ୍ରୁତି ଦେଇଥିଲେ। ତେବେ ବ୍ୟକ୍ତି ଜଣକ ଝିଅକୁ କଟକ ଜିଲା ଜଗତପୁର ଅଞ୍ଚଳର ଜଣେ ବ୍ୟକ୍ତିଙ୍କୁ ୬୦ ହଜାର ଟଙ୍କାରେ ବିକ୍ରି କରିଦେଲେ। ଜଗତପୁରର ଏହି ବ୍ୟକ୍ତି ନାବାଳିକାଙ୍କୁ ବଳାତ୍କାର କରିଥିଲେ। ଫଳରେ ପୀଡିତା ଗର୍ଭବତୀ ହୋଇଥିଲେ। ଶିଶୁ ଜନ୍ମ ପାଇଁ କଟକର ଏକ ଡାକ୍ତରଖାନାକୁ ନେଇଥିବା ବେଳେ ପୁଅ ଜନ୍ମ ହୋଇଥିଲା। ନାବାଳିକାଙ୍କୁ କିଣିକି ନେଇଥିବା ବ୍ୟକ୍ତି ଜଣକ ପରେ ସେଠାରୁ ଫେରାର ହୋଇଯାଇଥିଲେ। ଏ ନେଇ ନାବାଳିକା ଜଣକ ସମ୍ପୃକ୍ତ ବ୍ୟକ୍ତିଙ୍କ ଘରେ ପହଞ୍ଚତ୍ ତାଙ୍କୁ ରଖିବାକୁ ନିବେଦନ କରିଥିଲେ। ହେଲେ ଉକ୍ତ ବ୍ୟକ୍ତି ଘରେ ତ ରଖିଲେ ନାହିଁ ବରଂ ମାଡ ମାରି ବିଦା କରି ଦେଇଥିଲେ। ପୀଡ଼ିତା ଶିଶୁପୁତ୍ର ସହ ଘରକୁ ଆସିବା ପରେ ଏ ସମ୍ପର୍କରେ ଥାନାରେ ଅଭିଯୋଗ କରିଛନ୍ତି। ଆଇଆଇସି କାଦମ୍ବିନୀ ପରିଡ଼ାଙ୍କୁ ପଚାରିବାରେ ଅଭିଯୋଗକୁ ଭିତ୍ତିକରି ତଦନ୍ତ ଜାରି ରହିଛି। ଖୁବ୍ଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ସେ କହିଛନ୍ତି।
