ସୋର, ୨୪ା୩ (ଡି.ଏନ୍.ଏ.)- ଖେଳୁଥିବା ବେଳେ କାନ୍ଥ ଉପରୁ ପଡି ନାବାଳକଙ୍କ ମୃତ୍ୟୁ ଘଟଣା ଏବେ ନୂଆ ମୋଡ ନେଇଛି। ବାପାକୁ ନ ଜଣାଇ ଗାଁ ଉତ୍ସବରେ ଖାଇବାକୁ ଯାଇଥିବା ପୁଅକୁ ଉଠାଇ ଆଣି ରାସ୍ତାରେ ମାଡ଼ ମାରିବା ସହ କଚାଡ଼ି ମାରି ଦେଇଥିବା ନେଇ ବୁଧବାର ନାବାଳକଙ୍କ ମାମୁ ସୋର ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ନାବାଳକଙ୍କ ବାପାକୁ ଥାନାକୁ ଆଣି ଅଟକ ରଖି ତଦନ୍ତ ଆରମ୍ଭ କରିଛି। ଏଭଳି ଏକ ଅଭାବନୀୟ ଘଟଣା ଘଟିଛି ସୋର ବ୍ଲକ ମହୁମୁହାଣ ପଞ୍ଚାୟତ ମଲିଚୁଆ ଗ୍ରାମରେ। ଶ୍ୟାମ ସିଂଙ୍କ ୧୨ ବର୍ଷର ପୁଅ ରାଜା ସାଙ୍ଗମାନଙ୍କ ସହିତ ଖେଳୁଥିବା ସମୟରେ କାନ୍ଥ ଉପରୁ ତଳକୁ ଖସି ପଡି ମୃତ୍ୟୁବରଣ କରିଥିବା ତାଙ୍କ ପରିବାର ଲୋକେ ସୂଚନା ଦେଇଥିଲେ। ମାତ୍ର ବୁଧବାର ତାଙ୍କ ମାମୁ ସନାତନ ସିଂ ସୋର ଥାନାରେ ପହଞ୍ଚି ତାଙ୍କ ଭଣଜାଙ୍କୁ ତାଙ୍କ ବାପା କଚାଡ଼ି ମାରିଦେଇଥିବା ଅଭିଯୋଗ କରିଥିଲେ।
