ନୂଆଦିଲ୍ଲୀ,୨୭।୯: ଭାଜପା ଏମପି ମେନକା ଗାନ୍ଧୀ ଇଣ୍ଟରନ୍ୟାଶନାଲ କୃଷ୍ଣ ଚେତନା ସୋସାଇଟି (ଇସ୍କନ) ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସେ ଇସ୍କନକୁ ଦେଶର ସବୁଠୁ ବଡ ଠକ ସଂଗଠନ ବୋଲି ବର୍ଣ୍ଣନା କରିଛନ୍ତି। ସେ ଅଭିଯୋଗ କରିଛନ୍ତି ଇସ୍କନ ଗୋଆଶ୍ରୟସ୍ଥଳରୁ ଗାଈଙ୍କୁ କଂସେଇଖାନାକୁ ବିକ୍ରି କରୁଛି। ତେବେ ଏହି ଅଭିଯୋଗ ଉପରେ ଇସ୍କନ ମଧ୍ୟ ପ୍ରତିକ୍ରିୟା ଦେଇଛି। ଇସ୍କନ ଏହି ଅଭିଯୋଗକୁ ଭିତ୍ତିହୀନ ଏବଂ ମିଥ୍ୟା ବୋଲି କହିଛି। ପୂର୍ବତନ କେନ୍ଦ୍ର ମନ୍ତ୍ରୀ ତଥା ପ୍ରାଣୀ ଅଧିକାର କର୍ମୀ ମେନକା ଗାନ୍ଧୀ ସୋସିଆଲ ମିଡିଆରେ ପ୍ରାଣୀ କଲ୍ୟାଣ ପ୍ରସଙ୍ଗରେ ସ୍ବର ଉତ୍ତୋଳନ କରୁଛନ୍ତି।
ଭିଡିଓରେ, ସେ କହିଛନ୍ତି ଇସ୍କନ ବର୍ତ୍ତମାନ ଭାରତର ସବୁଠାରୁ ବଡ ଠକ ସଂସ୍ଥା ଅଟେ। ସେମାନେ ଗୋଆଶ୍ରୟସ୍ଥଳ ପ୍ରତିଷ୍ଠା କରନ୍ତି, ଏହାକୁ ଚଳାଇବା ପାଇଁ ସେମାନେ ସରକାରଙ୍କଠାରୁ ଅଗଣିତ ଲାଭ ପାଆନ୍ତି। ସେମାନେ ବଡ଼ ଜମି ପାଇଥାନ୍ତି। ସେ ଆନ୍ଧ୍ରପ୍ରଦେଶରେ ଇସ୍କନର ଏକ ଗୋଶାଳାକୁ ତାଙ୍କର ଗସ୍ତ ସମ୍ପର୍କରେ କହିଛନ୍ତି। ସେ କହିଛନ୍ତି ନିକଟରେ ମୁଁ ଅନନ୍ତପୁର ଗୋଶାଳା ପରିଦର୍ଶନ କରଥିଲି। ସେଠାରେ ଗୋଟିଏ ବି ବୟସ୍କ ଗାଈ ଦେଖିବାକୁ ମିଳି ନ ଥିଲା। ଗୋଶାଳାର ସମସ୍ତ ଗାଈ ଦୁଗ୍ଧ ଦେଉଥିଲେ। ସେଠାରେ ଗୋଟିଏ ବି ବାଛୁରୀ ନ ଥିଲା। ଏହାର ଅର୍ଥ ସମସ୍ତଙ୍କୁ ବିକ୍ରି କରାଯାଇଛି।
ଇସ୍କନ ଏହାର ସମସ୍ତ ଗାଈମାନଙ୍କୁ କଂସେଇଖାନାକୁ ବିକ୍ରି କରୁଛି। ସେମାନେ ଏଭଳି ଯେପରି କରୁଛନ୍ତି ତାହା ଅନ୍ୟ କେହି କରନ୍ତି ନାହିଁ। ସେମାନେ ରାସ୍ତାରେ ହରେ ରାମ ହରେ କୃଷ୍ଣ ଗାନ କରନ୍ତି । ତା’ପରେ ସେମାନେ କୁହନ୍ତି ସେମାନଙ୍କର ସମ୍ପୂର୍ଣ୍ଣ ଜୀବନ କ୍ଷୀର ଉପରେ ନିର୍ଭର କରେ। ଇସକନ ବହୁ ସଂଖ୍ୟକ ମଇଁଷି କଂସେଇ ଖାନାକୁ ବିକ୍ରି କରିଛି। ଯଦି ଏହି ଲୋକମାନେ ଏହା କରିପାରିବେ ତେବେ ଅନ୍ୟମାନଙ୍କଠାରୁ କ’ଣ ଆଶା କରାଯାଇ ପାରିବ।
ଇସ୍କନ ଏହି ଅଭିଯୋଗକୁ ଭିତ୍ତିହୀନ ଏବଂ ମିଥ୍ୟା ବୋଲି କହିଛି। ସଂଗଠନର ଜାତୀୟ ମୁଖପାତ୍ର ଯୁଧିଷ୍ଠିର ଗୋବିନ୍ଦ ଦାସ କହିଛନ୍ତି କେବଳ ଭାରତରେ ନୁହେଁ ବିଶ୍ୱ ସ୍ତରରେ ଗାଈ ଓ ଷଣ୍ଢଙ୍କର ସୁରକ୍ଷା ତଥା ଯତ୍ନ ନେବାରେ ଇସକନ ଆଗରେ ରହିଛି। ସେ କହିଛନ୍ତି ଏଠାରେ ଆମର ଗାଈ ଏବଂ ଷଣ୍ଢମାନଙ୍କୁ ସେମାନଙ୍କ ଜୀବନସାରା ଯତ୍ନରେ ରଖାଯାଏ।
ମନ୍ଦିର ପ୍ରଶାସନ ଏକ ବିବୃତ୍ତି ଜାରି କରି କହିଛି ଇସକନ ପୃଥିବୀର ଅନେକ ସ୍ଥାନରେ ଗାଈ ସଂରକ୍ଷଣ କରୁଛି ଯେଉଁଠାରେ ଗୋମାଂସ ଏକ ମୁଖ୍ୟ ଖାଦ୍ୟ ଅଟେ। ଇସ୍କନ କହିଛନ୍ତି, ମାନେକା ଗାନ୍ଧୀଙ୍କ ବିବୃତ୍ତିରେ ଆମେ ଆଶ୍ଚର୍ଯ୍ୟ ହୋଇଛୁ କାରଣ ସେ ସର୍ବଦା ଇସ୍କନର ଶୁଭେଚ୍ଛୁ ଅଟନ୍ତି। ପ୍ରଶାସନ କହିଛି ଇସ୍କନ ଭାରତରେ ୬୦ରୁ ଅଧିକ ଗୋଆଶ୍ରୟସ୍ଥଳ ଚଳାଉଛି। ଏଠାରେ ଶହ ଶହ ଗାଈ ଏବଂ ଷଣ୍ଢ ସୁରକ୍ଷିତ ଅଛନ୍ତି। ସେମାନେ ମଧ୍ୟ ସାରା ଜୀବନ ଯତ୍ନ ନିଅନ୍ତି।
