ନୂଆଦିଲ୍ଲୀ,୧।୯: ନେପାଳ-ତିବ୍ଦତ ସୀମାରେ ହିମାଳୟର ହିମବାହ (ଗ୍ଲେସିୟର) ଭାଙ୍ଗି ହୋଇଥିବା ପ୍ରଳୟଙ୍କାରୀ ବନ୍ୟା ଓ ଭୂସ୍ଖଳନ ପରେ ଏବେ ସାରା ବିଶ୍ୱରେ ଚାଞ୍ଚଲ୍ୟ ଖେଳିଯାଇଛି। ଶହ ଶହ ଲୋକଙ୍କ ପ୍ରାଣହାନି ଏବଂ ବ୍ୟାପକ କ୍ଷୟକ୍ଷତି ଘଟାଇଥିବା ଏହି ବିପର୍ଯ୍ୟୟକୁ ନେଇ ଦୁଇଟି ଆଶ୍ଚର୍ଯ୍ୟଜନକ ତଥ୍ୟ ଏବେ ଗଣମାଧ୍ୟମ ତଥା ସୋସିଆଲ ମିଡିଆରେ ଜୋରଦାର ଚର୍ଚ୍ଚାର ବିଷୟ ପାଲଟିଛି।
ଏକ ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଇତିହାସର ଅନେକ ଭୟଙ୍କର ବିପର୍ଯ୍ୟୟ ପଛରେ ‘୨୬’ ତାରିଖର ଏକ ଅଜବ ସଂଯୋଗ ଦେଖିବାକୁ ମିଳିଛି।
୨୬ ଜାନୁଆରୀ ୨୦୦୧ରେ ଗୁଜରାଟ ଭୂମିକମ୍ପ, ୨୬ ଡିସେମ୍ୱର ୨୦୦୪ରେ ବିନାଶକାରୀ ସୁନାମି, ୨୬ ଜୁଲାଇ ୨୦୦୫ରେ ମୁମ୍ୱାଇ ବନ୍ୟା ଏବଂ ୨୬ ନଭେମ୍ୱର ୨୦୦୮ରେ ମୁମ୍ୱାଇ ଆତଙ୍କବାଦୀ ଆକ୍ରମଣ ଭଳି ଘଟଣା ଏହି ତାରିଖରେ ଘଟିଛି। ସଂଖ୍ୟାତତ୍ତ୍ୱବିତ୍ଙ୍କ ମତରେ, ୨୬ ସଂଖ୍ୟାର ଯୋଗଫଳ (୨+୬ = ୮) ଶନିଙ୍କ କାରକ ଅଟେ, ଯାହା ଅଚାନକ ଉତ୍ଥାନ-ପତନ ଓ ବିପର୍ଯ୍ୟୟ ଆଣିଥାଏ। ତେବେ ବୈଜ୍ଞାନିକମାନେ ଏହାକୁ କେବଳ ଏକ ସଂଯୋଗ ବୋଲି କହିବା ସହ ଗ୍ଲୋବାଲ ୱାର୍ମିଂ ଯୋଗୁଁ ଏଭଳି ପ୍ରାକୃତିକ ବିପର୍ଯ୍ୟୟ ଘଟୁଥିବା ସ୍ପଷ୍ଟ କରିଛନ୍ତି।
-
୨୬ ଅପ୍ରେଲ ୧୯୮୬ — ଚେର୍ଣ୍ଣୋବିଲ ପରମାଣୁ ଦୁର୍ଘଟଣା (ୟୁକ୍ରେନ / ପୂର୍ବତନ ସୋଭିଏତ ୟୁନିଅନ):
- ଚେର୍ଣ୍ଣୋବିଲ ପରମାଣୁ ବିଦ୍ୟୁତ୍ କେନ୍ଦ୍ରର ୪ ନମ୍ବର ରିଆକ୍ଟରରେ ଏକ ପରୀକ୍ଷଣ ସମୟରେ ହଠାତ୍ ବିସ୍ଫୋରଣ ଘଟି ଭୟଙ୍କର ଅଗ୍ନିକାଣ୍ଡ ହୋଇଥିଲା। ବାୟୁମଣ୍ଡଳକୁ ପ୍ରବଳ ମାତ୍ରାରେ ତେଜସ୍କ୍ରିୟ (Radioactive) ବିକିରଣ ବ୍ୟାପିଥିଲା, ଯାହା ହିରୋସିମା ପରମାଣୁ ବୋମାଠାରୁ ପ୍ରାୟ ୪୦୦ ଗୁଣ ଅଧିକ ବିଷାକ୍ତ ଥିଲା। ଲକ୍ଷ ଲକ୍ଷ ଲୋକ ବିସ୍ଥାପିତ ହୋଇଥିଲେ ଏବଂ ଅଞ୍ଚଳଟି ଦୀର୍ଘ ବର୍ଷ ପାଇଁ ମଣିଷ ବାସ ପାଇଁ ଅନୁପଯୁକ୍ତ ହୋଇପଡ଼ିଥିଲା।
-
୨୬ ଜାନୁଆରୀ ୨୦୦୧ — ଗୁଜରାଟ ଭୂମିକମ୍ପ (ଭାରତ):
- ଭାରତର ୫୨ତମ ସାଧାରଣତନ୍ତ୍ର ଦିବସ ସକାଳ ୮:୪୬ ରେ ଗୁଜରାଟର କଚ୍ଛ ଜିଲ୍ଲାର ଭୁଜ୍ ନିକଟରେ ୭.୭ ରିକ୍ଟର ସ୍କେଲ୍ ତୀବ୍ରତାର ଭୟଙ୍କର ଭୂମିକମ୍ପ ଅନୁଭୂତ ହୋଇଥିଲା। ଏହି ବିପର୍ଯ୍ୟୟରେ ପ୍ରାୟ ୨୦,୦୦୦ରୁ ଅଧିକ ଲୋକ ପ୍ରାଣ ହରାଇଥିଲେ, ୧.୫ ଲକ୍ଷରୁ ଅଧିକ ଆହତ ହୋଇଥିଲେ ଏବଂ ପ୍ରାୟ ୪ ଲକ୍ଷ ଘର ସମ୍ପୂର୍ଣ୍ଣ ମାଟିରେ ମିଶି ଯାଇଥିଲା।
-
୨୬ ଡିସେମ୍ବର ୨୦୦୪ — ହିନ୍ଦୁ ମହାସାଗର ସୁନାମି:
- ଇଣ୍ଡୋନେସିଆର ଉତ୍ତର ସୁମାତ୍ରା ଉପକୂଳରେ ସମୁଦ୍ର ଗର୍ଭରେ ୯.୧ ରୁ ୯.୩ ତୀବ୍ରତାର ଏକ ଭୂମିକମ୍ପ ଘଟିଥିଲା। ଏହାଫଳରେ ସମୁଦ୍ରରେ ପ୍ରାୟ ୩୦ ମିଟର (୧୦୦ ଫୁଟ) ପର୍ଯ୍ୟନ୍ତ ଉଚ୍ଚ ଜଳତରଙ୍ଗ ସୃଷ୍ଟି ହୋଇ ଭାରତ, ଶ୍ରୀଲଙ୍କା, ଇଣ୍ଡୋନେସିଆ, ଥାଇଲ୍ୟାଣ୍ଡ ସମେତ ୧୪ଟି ଦେଶର ଉପକୂଳକୁ ଧ୍ୱଂସ କରିଦେଇଥିଲା। ଏଥିରେ ପ୍ରାୟ ୨,୩୦,୦୦୦ ଲୋକ ମୃତ୍ୟୁବରଣ କରିଥିଲେ।
-
୨୬ ଜୁଲାଇ ୨୦୦୫ — ମୁମ୍ବାଇ ମହାବନ୍ୟା (ଭାରତ):
- ଘୂର୍ଣ୍ଣିବଳୟ ଏବଂ ମୌସୁମୀ ପ୍ରବାହ ଯୋଗୁଁ ମୁମ୍ବାଇ ସହରରେ ମାତ୍ର ୨୪ ଘଣ୍ଟା ମଧ୍ୟରେ ପ୍ରାୟ ୯୪୪ ମିଲିମିଟର (୩୭ ଇଞ୍ଚ) ବର୍ଷା ରେକର୍ଡ କରାଯାଇଥିଲା। ସହରର ଡ୍ରେନେଜ୍ ବ୍ୟବସ୍ଥା ଭୁଶୁଡ଼ି ସ୍ଥାନୀୟ ମିଠି ନଦୀ କୂଳ ଲଙ୍ଘିଥିଲା। ଟ୍ରେନ୍, ବିମାନ ଓ ଯାନବାହନ ଚଳାଚଳ ସମ୍ପୂର୍ଣ୍ଣ ଠପ୍ ହୋଇଯାଇଥିଲା ଏବଂ ବନ୍ୟା ଓ ଭୂସ୍ଖଳନ କାରଣରୁ ୧,୦୦୦ରୁ ଅଧିକ ଲୋକ ପ୍ରାଣ ହରାଇଥିଲେ।
-
୨୬ ନଭେମ୍ବର ୨୦୦୮ — ମୁମ୍ବାଇ ଆତଙ୍କବାଦୀ ଆକ୍ରମଣ / 26/11 (ଭାରତ):
-
ପାକିସ୍ତାନ ସ୍ଥିତ ଆତଙ୍କବାଦୀ ସଂଗଠନ ଲସ୍କର-ଇ-ତୋଇବାର ୧୦ ଜଣ ଆତଙ୍କବାଦୀ ସମୁଦ୍ର ପଥ ଦେଇ ମୁମ୍ବାଇରେ ପ୍ରବେଶ କରି ୧୨ଟି ସ୍ଥାନରେ ଯୋଜନାବଦ୍ଧ ଭାବେ ଗୁଳିଚାଳନା ଓ ବୋମା ବିସ୍ଫୋରଣ କରିଥିଲେ।
ତାଜ୍ ହୋଟେଲ, ଓବେରୟ ଟ୍ରାଇଡେଣ୍ଟ୍, ଛତ୍ରପତି ଶିବାଜୀ ଟର୍ମିନସ ଓ ନରିମାନ ହାଉସ୍ ଭଳି ସ୍ଥାନରେ ଚାଲିଥିବା ଏହି ଆକ୍ରମଣ ୨୯ ନଭେମ୍ବର ପର୍ଯ୍ୟନ୍ତ ଚାଲିଥିଲା। ଏଥିରେ ସୁରକ୍ଷାକର୍ମୀ ଓ ବିଦେଶୀ ନାଗରିକଙ୍କ ସମେତ ୧୬୬ ଜଣ ନିରୀହ ଲୋକ ପ୍ରାଣ ହରାଇଥିଲେ ଏବଂ ୩୦୦ରୁ ଅଧିକ ଆହତ ହୋଇଥିଲେ।
-
-
୨୬ ଅଗଷ୍ଟ — ନେପାଳ-ତିବ୍ଦତ ସୀମା ହିମସ୍ଖଳନ ଓ ବନ୍ୟା:
-
ହିମାଳୟ ପର୍ବତମାଳାରେ ହିମବାହ (ଗ୍ଲେସିୟର) ଭାଙ୍ଗି ତଳକୁ ଖସିବା ଫଳରେ ନଦୀଗୁଡ଼ିକରେ ହଠାତ୍ ପ୍ରଳୟଙ୍କାରୀ ବନ୍ୟା (Flash Flood) ସୃଷ୍ଟି ହୋଇଥିଲା। ଏହି ଜଳପ୍ରଳୟ ଯୋଗୁଁ ବିଶାଳ ମାତ୍ରାରେ ପଥର ଓ କାଦୁଅର ସୁନାମି ମାଡ଼ିଆସି ଅନେକ ଗାଁ, ରାସ୍ତାଘାଟ ଓ ପୋଲ ଧ୍ୱଂସ କରିଦେଇଥିଲା ଏବଂ ବହୁ ସଂଖ୍ୟାରେ ଲୋକ ମୃତାହତ ହୋଇଥିଲେ।
-
ଅନ୍ୟପକ୍ଷରେ, ବୁଲଗେରିଆର ଭବିଷ୍ୟବକ୍ତା ବାବା ଭେଙ୍ଗାଙ୍କ ଭବିଷ୍ୟବାଣୀ ମଧ୍ୟ ଏହି ବିପର୍ଯ୍ୟୟ ପରେ ଭାଇରାଲ ହେବାରେ ଲାଗିଛି।
ବାବା ଭେଙ୍ଗା ପୂର୍ୱାନୁମାନ କରିଥିଲେ ଯେ ୨୦୨୬ ବର୍ଷରେ ପୃଥିବୀରେ ବଡ଼ ଧରଣର ଜଳବାୟୁ ସଙ୍କଟ, ବନ୍ୟା ଓ ପ୍ରାକୃତିକ ବିତ୍ପାତ ଘଟିବ। ହିମାଳୟ ଅଞ୍ଚଳରେ ଘଟିଥିବା ଏହି ସୁନାମି ସଦୃଶ ବନ୍ୟାକୁ ତାଙ୍କ ଭବିଷ୍ୟବାଣୀ ସହ ଯୋଡ଼ି ଦେଖାଯାଉଛି। ତାଙ୍କ ପୂର୍ୱାନୁମାନ ଅନୁସାରେ, ଆଗାମୀ ଦିନରେ ଭୂ-ରାଜନୈତିକ ଉତ୍ତେଜନା ଏବଂ ପ୍ରାକୃତିକ ପରିବେଶରେ ବଡ଼ ଧରଣର ଅସ୍ଥିରତା ସୃଷ୍ଟି ହୋଇପାରେ।
