କାଏମା,୧୫ା୧(ଶିବପ୍ରସାଦ ମହାନ୍ତି): ଧର୍ମଶାଳା ବ୍ଲକ ଉତ୍ତରପ୍ରତାପ ପଞ୍ଚାୟତରେ ୫ ବର୍ଷ ହେଲା ନିର୍ମାଣ ହୋଇଥିବା ଉଠା ଜଳସେଚନ ପ୍ରକଳ୍ପ କାର୍ଯ୍ୟକ୍ଷମ କ୍ଷମ ହୋଇପାରୁନାହିଁ। ବିଦ୍ୟୁତ୍ ବିଭାଗ ସଂଯୋଗ ଦେଉନଥିବାରୁ ପ୍ରକଳ୍ପ ଅସମ୍ପୂର୍ଣ୍ଣ ଅବସ୍ଥାରେ ପଡ଼ିରହିଛି। ଅନ୍ୟପକ୍ଷରେ ମରାମତି ଏବଂ ରକ୍ଷଣାବେକ୍ଷଣ ଅଭାବରୁ ପ୍ରକଳ୍ପ ଓ ବିଦ୍ୟୁତ୍ ଟ୍ରାନ୍ସଫର୍ମର ଗଛଲତାରେ ଲୁଚିଗଲାଣି। ପ୍ରକଳ୍ପ ନିର୍ମାଣ କରିଦେଇ ଉଠାଜଳସେଚନ ନିଗମର ଖୋଜ ଖବର ନାହିଁ। ଫଳରେ ସମନ୍ବୟ ଅଭାବରୁ ଶତାଧିକ ଚାଷୀ ଦୁର୍ଦ୍ଦଶା ଭୋଗୁଛନ୍ତି।
ସୂଚନା ଅନୁସାରେ, ଏହି ପଞ୍ଚାୟତରେ ଧାନ, ଚିନାବାଦାମ, ବିରି ଓ ପନିପରିବା ଚାଷ କରି ଅନେକ ଚାଷୀ ପରିବାର ପ୍ରତିପୋଷଣ କରିଥାନ୍ତି। ଚାଷଜମିକୁ ଜଳସେଚିତ କରିବା ଲକ୍ଷ୍ୟରେ ସ୍ଥାନୀୟ ଶତାଧିକ ଚାଷୀଙ୍କୁ ନେଇ ପାଣି ପଞ୍ଚାୟତ ଗଠନ କରାଯାଇଛି। ୩୦ରୁ ୪୦ଜଣ ଚାଷୀଙ୍କୁ ନେଇ ଗୋଟିଏ ଗୋଟିଏ ପାଣି ପଞ୍ଚାୟତ କରାଯାଇଛି। ମା’ ମଙ୍ଗଳା, ମହାଲକ୍ଷ୍ମୀ ଓ ବାଲୁଙ୍କେଶର ନାମରେ ତିନୋଟି ପାଣି ପଞ୍ଚାୟତ ରହିଛି। ପାଖାପାଖି ୧୦୦ ହେକ୍ଟର ଚାଷ ଜମିକୁ ଜଳସେଚିତ କରିବା ଲକ୍ଷ୍ୟ ନେଇ ଧର୍ମଶାଳା ଉଠାଜଳସେଚନ ନିଗମ ଉପଖଣ୍ଡ ପକ୍ଷରୁ ୨୦୧୯ରେ ପ୍ରାୟ ୨୫ ଲକ୍ଷ ଟଙ୍କା ବ୍ୟୟରେ ଉତ୍ତରପ୍ରତାପ ଗ୍ରାମରେ ବୋରିଂ ପଏଣ୍ଟ ନିର୍ମାଣ ହୋଇଛି। ଏଠାରେ ବୋରିଂ କରାଯିବା ସହିତ ମୋଟର ଘର, ପାଣି ମୋଟର ସ୍ଥାପନ ଓ ବିଦ୍ୟୁତ୍ ଟ୍ରାନ୍ସଫର୍ମର ମଧ୍ୟ ବସାଯାଇଛି। ହେଲେ ଏହି ପ୍ରକଳ୍ପ କାର୍ଯ୍ୟକ୍ଷମ ହେଲାକି ନ ହେଲା ବୁଝିବାକୁ ବି କେହିନାହାନ୍ତି। ମୋଟର ଘରେ ତାଲା ଝୁଲୁଥିବାବେଳେ ବିଦ୍ୟୁତ୍ ଟ୍ରାନ୍ସଫର୍ମର ପଏଣ୍ଟରେ ଗଛଲତା ମାଡ଼ିଯାଇଛି।
ଚଳିତବର୍ଷ ଆବଶ୍ୟକ ବର୍ଷା ଅଭାବରୁ ଧାନ ଓ ଚିନାବାଦାମ ଚାଷ ବାଧାପ୍ରାପ୍ତ ହୋଇଥିଲା। ଏହି ସମୟରେ ଉକ୍ତ ପ୍ରକଳ୍ପକୁ କାର୍ଯ୍ୟକ୍ଷମ କରାଯାଇଥିଲେ ହୁଏତ ଏହି ଚାଷଜମିକୁ ଜଳସେଚିତ କରିପାରିଥାନ୍ତା। ଏନେଇ ଚାଷୀମାନେ ବିଭାଗୀୟ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ। ପାଖ ଗଡ଼ିଆ, ପୋଖରୀ ଓ ନିଜେ କରିଥିବା ଚୁଆରୁ ପାଣି ବୋହି ଚାଷୀ ପନିପରିବା ଚାଷ କରୁଛନ୍ତି। କୁଣ୍ଡପାଟଣା ସେକ୍ସନ ଅଫିସ ଓ ଜାରକା ଉପଖଣ୍ତ ବିଦ୍ୟୁତ୍ କାର୍ଯ୍ୟାଳୟକୁ ଦୌଡ଼ିଦୌଡ଼ି ଚାଷୀମାନେ ନୟାନ୍ତ ହୋଇଥିବା ଅଭିଯୋଗ କରିଛନ୍ତି। ଉକ୍ତ ଟ୍ରାନ୍ସଫର୍ମର ଉପରେ ଟଙ୍କା ବାକି ଥିବା ଶୁଣିବାକୁ ପାଇଛନ୍ତି ଓ ପୈଠ କଲେ ବିଦ୍ୟୁତ୍ ସଂଯୋଗ ହେବ ବୋଲି ବିଭାଗୀୟ ଅଧିକାରୀ କହିଛନ୍ତି। ଅନ୍ୟପକ୍ଷରେ ପାଣି ପଞ୍ଚାୟତ ସଭାପତି ଓ ସମ୍ପାଦକଙ୍କ କହିବା ଅନୁସାରେ ପ୍ରକଳ୍ପର ଉଦ୍ଘାଟନ ଏବେ ପର୍ଯ୍ୟନ୍ତ ହୋଇନାହିଁ। ଟ୍ରାନ୍ସଫର୍ମର ଉପରେ ଟଙ୍କା ବାକି ଆସିଲା କିପରି। ଯାହାକୁ ନେଇ ଏହା ମଧ୍ୟରେ ଦ୍ୱନ୍ଦ୍ୱ ଦେଖାଦେଇଛି। ଉଭୟ ବିଭାଗର ଉପରିସ୍ଥ ଅଧିକାରୀ ଆଲୋଚନା କରି ତୁରନ୍ତ ପ୍ରକଳ୍ପ କାର୍ଯ୍ୟକ୍ଷମ ନ କଲେ ଆଗମୀ ଦିନରେ ଉଭୟ ବିଭାଗ କାର୍ଯ୍ୟାଳୟକୁ ଘେରାଉ କରାଯିବ ବୋଲି ମା’ମଙ୍ଗଳା ପାଣି ପଞ୍ଚାୟତ ସଭାପତି ରମେଶ ଚନ୍ଦ୍ର ରାଉତ, ସମ୍ପାଦକ ସଞ୍ଜୟ ରାଉତ, ମହାଲକ୍ଷ୍ମୀ ପାଣି ପଞ୍ଚାୟତ ସଭାପତି ପୀତବାସ ମଲିକ, ସମ୍ପାଦକ କେଶବ ଚନ୍ଦ୍ର ମଲିକ, ବାଲୁଙ୍କେଶ ପାଣି ପଞ୍ଚାୟତ ସଭାପତି ଗୋପାଳ ଚନ୍ଦ୍ର ରାଉତ ଓ ସମ୍ପାଦକ ଭାଗ୍ୟଧର ମହାନ୍ତି ଚେତାବନୀ ଦେଇଛନ୍ତି।
