ବରଗଡ଼,୨୫।୭(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଖରିଫ୍ ଚାଷକାର୍ଯ୍ୟ ଜୋରସୋର୍ରେ ଚାଲିଥିଲାବେଳେ ସାରର କୃତ୍ରିମ ସଙ୍କଟ ଏବଂ କଳାବଜାର ଚାଷୀମାନଙ୍କୁ ଚିନ୍ତାରେ ପକାଇ ଦେଇଛି। ଏଭଳି ଅଭିଯୋଗ ପାଇବା ପରେ କୃଷି ବିଭାଗ ଆକ୍ସନ ମୋଡରେ ବାହାରିଛି। କୃଷି ବିଭାଗର ଏକ ଏନଫୋର୍ସମେଣ୍ଟ ଟିମ୍ ଶୁକ୍ରବାର ଜିଲାର ବିଭିନ୍ନ ସାର ବିକ୍ରେତାଙ୍କ ଗୋଦାମ, ଦୋକାନରେ ଅତର୍କିତ ଚଢ଼ାଉ କରିଥିଲା। ଚଢ଼ାଉ ସମୟରେ ସାର ବିକ୍ରିରେ ଅନିୟମିତତା ମଧ୍ୟ ଧରାପଡ଼ିଥିଲା। ଏହି କ୍ରମରେ ୬ ଡିଲରଙ୍କ ସାର ବିକ୍ରି ଲାଇସେନ୍ସକୁ ରବ୍ଦ କରି ଦିଆଯାଇଛି। ସେଗୁଡିକ ହେଲା ଭେଡେନର ସଂଯୁକ୍ତା ଟ୍ରେଡର୍ସ, ଅତାବିରା ବ୍ଲକର ଆଦିତ୍ୟ ଟ୍ରେଡର୍ସ, ମଣିକଣ୍ଠ ପେଷ୍ଟିସାଇଡ୍ସ, ଶ୍ୟାମ ସିଡ୍ସ୍, ଜଗନ୍ନାଥ ଷ୍ଟୋର ଏବଂ ବିଜୟଲକ୍ଷ୍ମୀ ଏଗ୍ରୋ କେମିକାଲସ୍ ଷ୍ଟୋର। ସେହିପରି ୧୫ଡିଲରଙ୍କ ସାରବିକ୍ରି ଲାଇସେନ୍ସକୁ ୧୫ଦିନ ପାଇଁ ନିଲମ୍ବନ କରାଯାଇଛି। ସମ୍ପୃକ୍ତ ଡିଲର ଗୁଡ଼ିକ ହେଲେ ବରଗଡ଼ ବ୍ଲକ ଅନ୍ତର୍ଗତ ଆମ୍ବସଢାର ଭେଙ୍କଟେଶ୍ୱର ଏଜେନ୍ସିଜ୍, ବରଗଡ଼ ମ୍ୟୁନିସିପାଲିଟିର ଡିଲର ଶେଷଦେବ ପ୍ରଧାନ, ଗାୟତ୍ରୀ ଟ୍ରେଡର୍ସ, ଅତାବିରା ବ୍ଲକର ସମଲେଶ୍ୱରୀ ବିହନ ଭଣ୍ଡାର, ନକ୍ଷତ୍ର ପେଷ୍ଟିସାଇଡସ୍, କ୍ରିଷ୍ଣା ଟ୍ରେଡର୍ସ, ଅମ୍ବାଭୋନା ବ୍ଲକର ଭବ୍ୟାଂଶୀ ଟ୍ରେଡର୍ସ, ବିଶ୍ବାଳ ଟ୍ରେଡର୍ସ, ମାଝି ପେଷ୍ଟିସାଇଡସ୍, ପ୍ରଧାନ ଟ୍ରେଡର୍ସ, ରାଜୁ ପେଷ୍ଟିସାଇଡସ୍, ଶେଖର ଏଣ୍ଟରପ୍ରାଇଜ୍, ନାରାୟଣୀ ଟ୍ରେଡର୍ସ, ପ୍ରଧାନ ଟ୍ରେଡର୍ସ ଏବଂ ସାହୁ ଟ୍ରେଡର୍ସ। ମୁଖ୍ୟ ଜିଲା କୃଷି ଅଧିକାରୀ ମମତାରାଣୀ ତ୍ରିପାଠୀ, ବରଗଡ଼ ବ୍ଲକ କୃଷି ଅଧିକାରୀ ଇତିସ୍ମିତା ଦେବତା, ଅତିରିକ୍ତ ତହସିଲଦାର ନିଶିକାନ୍ତ ମେହେର, ବରଗଡ଼ ବ୍ଲକର ସହକାରୀ କୃଷି ଅଧିକାରୀ ସେନଲ ମଣ୍ଡିପ, ଭେଡେନ ବ୍ଲକ କୃଷି ଅଧିକାରୀ, ଭଟଲି ଜିଲା କୃଷି ଅଧିକାରୀ ସୁଶ୍ରୀସ୍ମିତା ପଣ୍ଡା, ବ୍ଲକ କୃଷି ଅଧିକାରୀ ପିଙ୍କୁସେନ କର, ସୁଜାତା ଛତ୍ରିଆ ପ୍ରମୁଖ ଚଢ଼ାଉରେ ସାମିଲ ଥିଲେ।
Dharitri – Odisha’s No.1 Odia Daily
