ଜାମାଇକା,୧୭।୧: ଶକ୍ତିଶାଳୀ ଓ୍ବେଷ୍ଟଇଣ୍ଡିଜ ଠାରୁ ପ୍ରଥମ ମ୍ୟାଚ୍ରେ ପରାସ୍ତ ହେବା ପରେ ଅପ୍ରତ୍ୟାଶିତ ଭାବେ ୩ ମ୍ୟାଚ୍ ବିଶିଷ୍ଟ ସିରିଜ୍କୁ ୨-୧ରେ ଜିତି ନେଇଛି ଆୟର୍ଲାଣ୍ଡ। ବିଦେଶରେ ଆଇସିସିର କୌଣସି ପୂର୍ଣ୍ଣ ସଦସ୍ୟ ବିପକ୍ଷରେ ଏହା ଦଳର ପ୍ରଥମ ସିରିଜ୍ ବିଜୟ। ରବିବାର ଏଠାରେ ଖେଳାଯାଇଥିବା ଅନ୍ତିମ ତଥା ତୃତୀୟ ଦିନିକିଆରେ ଆୟର୍ଲାଣ୍ଡ ୨ ଉଇକେଟରେ ଓ୍ବେଷ୍ଟଇଣ୍ଡିଜକୁ ହରାଇ ଦେଇଛି। ବିଜୟୀ ଦଳ ପାଇଁ ପୁଣି ଥରେ ଆଣ୍ଡି ମ୍ୟାକବ୍ରାଇନ୍ ଉଭୟ ବ୍ୟାଟ ଓ ବଲରେ ଉଲ୍ଲେଖନୀୟ ପ୍ରଦର୍ଶନ କରିଥିଲେ।
ଦ୍ୱିତୀୟ ମ୍ୟାଚ୍ ଭଳି ଏଥର ମଧ୍ୟ ପ୍ରଥମେ ବ୍ୟାଟିଂ କରିଥିବା ଓ୍ବେଷ୍ଟଇଣ୍ଡିଜ ଦଳକୁ ବିପର୍ଯ୍ୟୟର ସମ୍ମୁଖୀନ ହେବାକୁ ପଡ଼ିଥିଲା। ଏକଦା ବିନା କ୍ଷତିରେ ୭୨ ରନ୍ କରିଥିବା ଘରୋଇ ଦଳ ବିପର୍ଯ୍ୟୟ କାରଣରୁ ୧୧୯ ରନ୍ ମଧ୍ୟରେ ୭ ଉଇକେଟ ହରାଇ ସଙ୍କଟରେ ପଡ଼ିଥିଲା। ଶେଷ ଆଡ଼କୁ ଜାସନ ହୋଲ୍ଡରଙ୍କ ୪୪, ଓଡେନ ସ୍ମିଥ (୨୦)ଙ୍କ ଯୋଗୁ ଓ୍ବେଷ୍ଟଇଣ୍ଡିଜ ୨୧୨ ରନ୍ କରିବାକୁ ସକ୍ଷମ ହୋଇଥିଲା। ଆୟର୍ଲାଣ୍ଡ ପାଇଁ ଆଣ୍ଡି ମ୍ୟାକବ୍ରାଏନ ୪ ଓ କ୍ରେଗ୍ ୟଙ୍ଗ ୩ ଉଇକେଟ ନେଇଥିଲେ। ଜବାବରେ ପ୍ରଥମ ବଲରେ ଆୟର୍ଲାଣ୍ଡ ହରାଇଥିଲା ବରିଷ୍ଠ ଓପନର ଓ୍ବିଲିୟମ ପୋର୍ଟଫିଲ୍ଡଙ୍କ ଉଇକେଟ। କିନ୍ତୁ ଅଧିନାୟକ ପଲ ଷ୍ଟ୍ରିରଲିଙ୍ଗ ୪୪, ମ୍ୟାକବ୍ରାଏନ ୫୯, ହାରି ଟେକ୍ଟରଙ୍କ ୫୨ ରନ୍ର ପାଳି ଭ୍ରମଣକାରୀ ଦଳକୁ ଭଲ ପ୍ଲାଟଫର୍ମ ଦେଇଥିଲେ। ଏପରି କି ଶେଷ ଆଡ଼କୁ ଦଳ ୪୦ ରନ୍ ମଧ୍ୟରେ ୫ ଉଇକେଟ ହରାଇବା ପରେ ମଧ୍ୟ ମ୍ୟାଚ୍ ଜିତି ନେଇଥିଲା। ଓ୍ବେଷ୍ଟଇଣ୍ଡିଜ ବୋଲରଙ୍କ ମଧ୍ୟରେ ରେଷ୍ଟେନ ଚେଜ ଓ ଅକିଲ ହେସେନ ୩ ଲେଖାଏ ସଫଳତା ପାଇଥିଲେ। ତେବେ ଏହା ଆୟର୍ଲାଣ୍ଡ ପାଇଁ କ୍ରିକେଟ ଇତିହାସର ଦ୍ୱିତୀୟ ସିରିଜ୍ ବିଜୟ। ଏଥିପୂର୍ବରୁ ଦଳ ୨୦୧୯ରେ କେବଳ ଜିମ୍ବାଓ୍ବେକୁ ହରାଇ ଥିଲା।
