ନୟାଗଡ଼ ଅଫିସ,୧୪।୧୧: ନୟାଗଡ଼ ନିର୍ବାଚନମଣ୍ଡଳୀରେ ଭାଜପା ନାରୀନେତ୍ରୀ ଇରାନୀ ରାୟଙ୍କ ସହ କଡା ଟକ୍କର ଦେଇ ପୂର୍ବତନ କନ୍ଧମାଳ ଏମ୍ପି ପ୍ରତ୍ୟୁଷା ରାଜେଶ୍ୱରୀ ସିଂ ସଭା ସମିତି କରିବା ପରେ ନୟାଗଡ଼ ରାଜନୀତି ଚଳଚଞ୍ଚଳ ହୋଇଉଠିଛି । ପ୍ରତ୍ୟୁଷାଙ୍କ ମିଶ୍ରଣ ପର୍ବକୁ ଟକ୍କର ଦେଇ ଇରାନୀ କର୍ମୀ ସମ୍ମିଳନୀ କରିବା ପରେ ନୟାଗଡ଼ ବିଧାନସଭା ପାଇଁ ଟିକେଟ୍ କିଏ ପାଇବ ସେନେଇ ସାଧାରଣରେ ପ୍ରଶ୍ନ ଉଠିଛି । ଇରାନୀଙ୍କ ସମର୍ଥକମାନେ କହି ବୁଲୁଛନ୍ତି ଆମ ଟିକେଟ କେହି କାଟିବାର ନାହିଁ । ପ୍ରତ୍ୟୁଷାଙ୍କ ସମର୍ଥକ କହୁଛନ୍ତି, ଏଥର ଆମ ପାଳି । ୨୦୧୯ରେ ଇରାନୀ ଟିକେଟ୍ ପାଇ ପରାଜୟ ହୋଇଥିଲେ । ଆମେ ସମର୍ଥନ କରିଥିଲୁ । ୨୦୨୪ରେ ପ୍ରତ୍ୟୁଷାଙ୍କ ପାଳି। ସେମାନେ ଆମକୁ ସହଯୋଗ କରିବେ। ଆମେ ବିଜୟୀ ହୋଇ ଦେଖାଇବୁ। ଭାଜପାର ପାଣିପାଗ ଗୋଳିଆ ଧରିଥିବାବେଳେ ଗୋଷ୍ଠୀ କନ୍ଦଳ ଦେଖି ବିଜେଡି ଖୁସ୍ ହୋଇ ଗାଁ ମୁହଁା ରାଜନୀତିକୁ ତ୍ୱରାନ୍ବିତ କରିଛି । ବିଜେଡି ବିଧାୟକ ନିଜର ଭୋଟ ବ୍ୟାଙ୍କକୁ ବଢ଼ାଇବାକୁ ନୟାଗଡ଼ ଓ ଓଡ଼ଗାଁରେ ପଦଯାତ୍ରା କରି ନିଜର ଶକ୍ତି ପ୍ରଦର୍ଶନ କରିଛନ୍ତି।
ସୂଚନାଯୋଗ୍ୟ,ରାଜକୁମାର ହେମେନ୍ଦ୍ର କୁମାର ସିଂ କଂଗ୍ରେସ ସଙ୍ଗଠନକୁ ନୟାଗଡ଼ ନିର୍ବାଚନମଣ୍ଡଳୀରେ ସୁଦୃଢ଼ କରିଥିଲେ । ହେଲେ ପରବର୍ତ୍ତୀ ପର୍ଯ୍ୟାୟରେ ବିଜେଡିରେ ମିଶି କନ୍ଧମାଳ ଏମ୍ପି ହୋଇଥିଲେ । କିଛି ମାସ ପରେ ହେମେନ୍ଦ୍ରଙ୍କ ମୃତ୍ୟୁ ପରେ ସ୍ତ୍ରୀ ପ୍ରତ୍ୟୁଷା ରାଜେଶ୍ୱରୀ ସିଂ ଉପନିର୍ବାଚନରେ କନ୍ଧମାଳ ଏମ୍ପି ହୋଇଥିଲେ । ୨୦୧୯ ନିର୍ବାଚନରେ ବିଜେଡି ଟିକେଟ୍ ନ ପାଇବାରୁ ସେ ଭାଜପାରେ ଯୋଗଦେଇଥିଲେ । ସେପଟେ ଲାଲା ମନୋଜ ରାୟ ଭାଜପାର ଜିଲା ସଭାପତି ରହି ସ୍ତ୍ରୀ ଇରାନୀ ରାୟଙ୍କୁ ନୟାଗଡ଼ ନିର୍ବାଚନ ମଣ୍ଡଳୀରେ ଟିକେଟ ଦେଇଥିଲେ । ୨୦୧୯ ନିର୍ବାଚନରେ ଇରାନୀ ରାୟ ବିଜେଡିର ଅରୁଣ ସାହୁଙ୍କଠାରୁ ପରାସ୍ତ ହୋଇଥିଲେ। ପ୍ରତ୍ୟୁଷା ସେହି ସମୟରେ ଟିକେଟ ପାଇଁ ଦାବି କରି ନ ଥିଲେ । ତେବେ ୨୦୨୪ ନିର୍ବାଚନ ପୂର୍ବରୁ ପ୍ରତ୍ୟୁଷା ନୟାଗଡ଼ ନିର୍ବାଚନମଣ୍ଡଳୀର ବିଭିନ୍ନ ଗାଁ ବୁଲି ସଙ୍ଗଠନକୁ ସଦୃଢ଼ କରିବାରେ ଲାଗିଛନ୍ତି। ତେବେ ଗତ ଅକ୍ଟୋବର ୩୧ରେ ଭାଜପାର ଦୁଇ ନାରୀନେତ୍ରୀ ଇରାନୀ ଓ ପ୍ରତ୍ୟୁଷାଙ୍କ ସମାନ୍ତରାଳ ବୈଠକ ସବୁ କିଛି ବିଗାଡି ଦେଇଛି । ଗତ ଅକ୍ଟୋବର ୩୧ରେ ଇରାନୀ ରାୟ ବାଲୁଗାଁ ମଣ୍ଡଳର ବୈଠକ ନୟାଗଡ଼ରେ କରାଇଥିଲେ । ଏଥିରେ ଭାଜପାର ରାଷ୍ଟ୍ରୀୟ ପ୍ରବକ୍ତା ସମ୍ବିତ୍ ପାତ୍ର ଯୋଗ ଦେଇଥିଲେ । ସେଦିନ ଓଡ଼ଗାଁ ବ୍ଲକର ୨ନଂ. ଜିଲା ପରିଷଦ ଜୋନ୍ ଅନ୍ତର୍ଗତ ସାକେରୀ ପଞ୍ଚାୟତ ଲିମ୍ବେଶ୍ୱରୀ ମହାଦେବଙ୍କ ପଡ଼ିଆରେ ପ୍ରତ୍ୟୁଷା ରାଜେଶ୍ୱରୀ ସିଂ ମିଶ୍ରଣ ପର୍ବ କରି ନିଜର ପରାକାଷ୍ଠା ଦେଖାଇଥିଲେ । ଗୋଟିଏ ଦିନ ଭାଜପାର ଦୁଇ ନାରୀନେତ୍ରୀ ଦୁଇଟି ସମାନ୍ତରାଳ ବୈଠକ କରିବା ପରେ ଦଳୀୟ ଗୋଷ୍ଠୀ କନ୍ଦଳକୁ ପ୍ରମାଣିତ କରିଥିଲା । ପରବର୍ତ୍ତୀ ପର୍ଯ୍ୟାୟରେ ନଭେମ୍ବର ୧୨ରେ ଇରାନୀ ପୁଣି ଓଡ଼ଗାଁ ବ୍ଳକର ଭାଡିକିଳାଠାରେ ଭାଜପା କର୍ମୀ ସମ୍ମିଳନୀ କରାଇ ନିଜ ପ୍ରତି ଦଳୀୟ ଲୋକଙ୍କ ସମର୍ଥନ ଦେଖାଇଥିଲେ। ପ୍ରତ୍ୟୁଷାଙ୍କ ମିଶ୍ରଣ ପର୍ବକୁ ଇରାନୀଙ୍କ କର୍ମ ସମ୍ମିଳନୀ ଟକ୍କର ଦେଇଛି । ପୂର୍ବରୁ ଗୋଟିଏ ଦଳରେ ଦୁଇ ନାରୀନେତ୍ରୀ ଏକାଠି କାମ କରୁଥିବାବେଳେ ଏବେ ଉଭୟ ପୃଥକ୍ ହୋଇ ଯାଇଛନ୍ତି ।
ଭାଡିକିଳା କର୍ମୀ ସମ୍ମିଳନୀରେ ଦଳର ରାଷ୍ଟ୍ରୀୟ ପ୍ରବକ୍ତା ସମ୍ବିତ୍ ପାତ୍ର ପରୋକ୍ଷରେ ଇରାନୀଙ୍କୁ ଟିକେଟ ମିଳୁଛି ବୋଲି ଘୋଷଣା କରିଥିଲେ । ସେ ତାଙ୍କ ଭାଷଣ ଆରମ୍ଭରୁ କହିଥିଲେ ଇରାନୀ ଭଲ ସଙ୍ଗଠନ କରୁଛନ୍ତି । ତାଙ୍କ ପରିଶ୍ରମକୁ ଦେଖିଲେ ୨୦୨୪ ନିର୍ବାଚନରେ ସେ ବିଧାୟିକା ହେବା ନିଶ୍ଚିତ। ରାଷ୍ଟ୍ରୀୟ ପ୍ରବକ୍ତାଙ୍କ ଇରାନୀଙ୍କ ପ୍ରତି ଏପରି ଅନୁକମ୍ପା ପ୍ରତ୍ୟୁଷାଙ୍କ ପାଇଁ ଭାରି ପଡ଼ିପାରେ ବୋଲି ଚର୍ଚ୍ଚା ହେଉଛି ।
ଅନ୍ୟପକ୍ଷେ ଦଳରେ ବିଶୃଙ୍ଖଳା ସୃଷ୍ଟି କରିବା ଅଭିଯୋଗରେ ପ୍ରତ୍ୟୁଷାଙ୍କ ବିରୋଧ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ହୋଇପାରେ ବୋଲି ଚର୍ଚ୍ଚା ଜୋର ଧରିଛି । ଏନେଇ ଜିଲା ସଭାପତି ଲାଲା ମନୋଜ ରାୟ କହିଛନ୍ତି, ଦଳରେ ପ୍ରାର୍ଥୀ ହେବାକୁ କାହାକୁ ବିରୋଧ ନାହିଁ । ଦଳୀୟ ସଙ୍ଗଠନ ବଢ଼ାଇବାରେ ମଧ୍ୟ ଅସୁବିଧା ନାହିଁ । ତେବେ ଭାଜପାରେ ମିଶ୍ରଣ ପର୍ବ କରାଗଲା ଅଥଚ ଜିଲା ସଭାପତିଙ୍କୁ ଅବଗତ କରାଯିବ ନାହିଁ । ଦଳରେ କିଏ ମିଶିଲେ ସେନେଇ ଦଳୀୟ ଜିଲା ସଭାପତିଙ୍କୁ ତାଲିକା ଦିଆଯିବନି । ପ୍ରତିଶ୍ରୁତି ମିଳିଛି କହି ଦଳରେ ଫାଟ ସୃଷ୍ଟି କରାଯାଉଛି ବୋଲି ଅନୁଭବ ପରେ ରାଜ୍ୟ ସଭାପତିଙ୍କୁ ପ୍ରତ୍ୟୁଷାଙ୍କ କାର୍ଯ୍ୟକଳାପ ସମ୍ପର୍କରେ ଅବଗତ କରାଯାଇଛି । ରାଜ୍ୟ କର୍ତ୍ତୃପକ୍ଷ ଯାହା ପଦକ୍ଷେପ ନେବେ ଆମର ବିରୋଧ କରିବାର ନାହିଁ ।
ଏନେଇ ପ୍ରତ୍ୟୁଷା କୁହନ୍ତି, ଭାଜପାରେ ମୁଁ ଯୋଗ ଦେବା ସମୟରେ ମୋତେ ୨୦୨୪ରେ ଟିକେଟ ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିଲା । ମିଶ୍ରଣ ପର୍ବ ସମୟରେ ରାଜ୍ୟ ସଭାପତି, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ନାରୀନେତ୍ରୀ ଇରାନୀ ରାୟ ଓ ଜିଲା ସଭାପତି ଲାଲା ମନୋଜ ରାୟ ଉପସ୍ଥିତ ଥିଲେ । ସେଇ ଆଧାରରେ ମୁଁ ସଙ୍ଗଠନ ସହ ଭୋଟକୁ ବଢ଼ାଉଛି । ମୁଁ ଦଳରେ ଫାଟ ସୃଷ୍ଟି କରୁ ନାହିଁ ବୋଲି ସେ ସ୍ପଷ୍ଟ କରିଛନ୍ତି । ଇରାନୀ ରାୟ କୁହନ୍ତି, ସଙ୍ଗଠନ କରିବାକୁ କାହାକୁ ମନା ନାହିଁ । କିନ୍ତୁ ନୟାଗଡ଼ ନିର୍ବାଚନମଣ୍ଡଳୀରେ ଭାଜପାର ସଙ୍ଗଠନ ଦାୟିତ୍ୱ ମୋ ଉପରେ ନ୍ୟସ୍ତ ଅଛି । ୨୦୨୪ ନିର୍ବାଚନ ଆଗକୁ ଅଛି । ନିଜେ ନିଜେ ପ୍ରାର୍ଥୀ ଘୋଷଣା କରିଦେଲେ କ’ଣ ଟିକେଟ୍ ମିଳିଯିବ। ଦଳ ଯାହାକୁ ପସନ୍ଦ କରିବ ସେ ହିଁ ଟିକେଟ୍ ପାଇବ।
