ତେହରାନ,୬।୧: ଇରାନରେ ଏକ ସପ୍ତାହରୁ ଅଧିକ ସମୟ ଧରି ଚାଲିଥିବା ହିଂସା କମିବାର କୌଣସି ଲକ୍ଷଣ ଦେଖାଯାଉନାହିଁ। ହିଂସାତ୍ମକ ପ୍ରତିବାଦରେ ଏପର୍ଯ୍ୟନ୍ତ ୩୫ ଜଣଙ୍କର ମୃତ୍ୟୁ ହୋଇଛି ଏବଂ ଆହୁରି ଅନେକ ଆହତ ହୋଇଥିବା ସୂଚନା ମିଳିଛି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଇରାନ ସରକାର ୧,୨୦୦ ରୁ ଅଧିକ ଲୋକଙ୍କୁ ଅଟକ ରଖିଛନ୍ତି।
ଆମେରିକା ସ୍ଥିତ ମାନବାଧିକାର ସମ୍ବାଦ ସଂସ୍ଥା ଅନୁଯାୟୀ, ଇରାନ ହିଂସାରେ ଚାରି ଶିଶୁ ଏବଂ ଦୁଇ ସୁରକ୍ଷା କର୍ମୀଙ୍କ ସମେତ ୨୯ ଜଣ ପ୍ରଦର୍ଶନକାରୀଙ୍କ ମୃତ୍ୟୁ ହୋଇଛି। ଇରାନର ୩୧ ପ୍ରଦେଶ ମଧ୍ୟରୁ ୨୭ ଟି ପ୍ରଦେଶ ହିଂସା ଦ୍ୱାରା ପ୍ରଭାବିତ। ସମଗ୍ର ଇରାନରେ ୨୫୦ରୁ ଅଧିକ ସ୍ଥାନରେ ହିଂସାତ୍ମକ ପ୍ରତିବାଦ ଦେଖାଯାଉଛି।
ଇରାନରେ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶୁକ୍ରବାର ତେହେରାନକୁ ଧମକ ଦେଇ କହିଥିଲେ, ‘ଶାନ୍ତିପୂର୍ଣ୍ଣ ପ୍ରତିବାଦକାରୀଙ୍କୁ ବଳପୂର୍ବକ ହତ୍ୟା କରାଯାଉଛି। ଆମେ ନିଶ୍ଚିତ ଭାବରେ ସେମାନଙ୍କୁ ଉଦ୍ଧାର କରିବୁ।’
ତଥାପି, ଇରାନ ସମ୍ପର୍କରେ ଟ୍ରମ୍ପଙ୍କ ଯୋଜନା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଟ୍ରମ୍ପ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ଚେଷ୍ଟା କରିବେ କି ଇରାନ ବିରୁଦ୍ଧରେ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବେ ସେ ବିଷୟରେ ଏବେ ବି ସସପେନ୍ସ ରହିଛି। ବିଶେଷକରି ଭେନେଜୁଏଲା ଉପରେ ଆମେରିକାର ଆକ୍ରମଣ ପରେ, ମଧ୍ୟପ୍ରାଚ୍ୟରେ ପରିସ୍ଥିତି ପୁଣି ଥରେ ଖରାପ ହେବ ବୋଲି ଅନୁମାନ କରାଯାଉଛି।
୨୦୨୨ ପରେ ଇରାନରେ ଏତେ ବଡ଼ ଧରଣର ପ୍ରତିବାଦ ପ୍ରଥମ ଥର ପାଇଁ ହୋଇଛି। ପୋଲିସ ହେପାଜତରେ ଥିବା ୨୨ ବର୍ଷୀୟା ମହସା ଆମିନୀଙ୍କ ମୃତ୍ୟୁ ପରେ ଇରାନରେ ହିଂସା ଦେଖାଦେଇଛି। ହିଜାବ ପିନ୍ଧି ନଥିବା କାରଣରୁ ଅନେକ ମହିଳାଙ୍କୁ ଅଟକ ରଖାଯାଇଛି।
ଇରାନରେ ପରିସ୍ଥିତି କ୍ରମାଗତ ଭାବରେ ଖରାପ ହେଉଛି। ଇରାନ ଏବଂ ଇସ୍ରାଏଲ ମଧ୍ୟରେ ୧୨ ଦିନିଆ ଯୁଦ୍ଧ ପରେ, ଆମେରିକା ତେହେରାନ ଉପରେ ବିମାନ ଆକ୍ରମଣ କରିଥିଲା। ଡିସେମ୍ବରରେ, ଇରାନର ମୁଦ୍ରା ସର୍ବକାଳୀନ ସର୍ବନିମ୍ନ ସ୍ତରରେ ପହଞ୍ଚିଥିଲା। ବର୍ତ୍ତମାନ, ନୂତନ ବର୍ଷ ଆରମ୍ଭ ହେବା ପୂର୍ବରୁ, ଇରାନର ଅଧିକାଂଶ ଅଞ୍ଚଳ ହିଂସାର ଶିକାର ହୋଇଛି।
Dharitri – The Largest & Most Trusted Odia Daily
