Posted inଖେଳ

ଆଇପିଏଲ୍‌: ମୁମ୍ବାଇ- ଦିଲ୍ଲୀ ଟାଇଟଲ ମୁକାବିଲା

ଦୁବାଇ,୧୦।୧୧(ପି.ଟି.): ଇଣ୍ଡିଆନ୍‌ ପ୍ରିମିୟର ଲିଗ୍‌ (ଆଇପିଏଲ୍‌)ର ଚଳିତ ୧୩ତମ ସଂସ୍କରଣ ଅନ୍ତିମ ଚରଣରେ ପହଞ୍ଚିଛି। ସ୍ଥାନୀୟ ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ମଙ୍ଗଳବାର ଫାଇନାଲ ମୁକାବିଲା ଖେଳାଯିବ। ଟାଇଟଲ ପାଇଁ ଏହି ମ୍ୟାଚ୍‌ରେ ରୋହିତ ଶର୍ମାଙ୍କ ନେତୃତ୍ୱାଧୀନ ମୁମ୍ବାଇ ଇଣ୍ଡିଆନ୍‌ ଓ ଶ୍ରେୟାସ ଆୟାରଙ୍କ ଦିଲ୍ଲୀ କ୍ୟାପିଟାଲ୍ସ ପରସ୍ପରକୁ ଭେଟିବେ। ସାରା ଟୁର୍ନାମେଣ୍ଟରେ ସ୍ଥିର ପ୍ରଦର୍ଶନ କରିବା ସହ ଶକ୍ତିଶାଳୀ ମୁମ୍ବାଇ ଦଳ ସବୁ ଦୃଷ୍ଟିକୋଣରୁ ବେଶ୍‌ ସନ୍ତୁଳିତ ମନେହେଉଛି। ଅନ୍ୟପଟେ ଅସ୍ଥିର ପ୍ରଦର୍ଶନ ସତ୍ତ୍ୱେ ଦିଲ୍ଲୀ ଏବେ ମୁମ୍ବାଇକୁ ଟକ୍କର ଦେବାକୁ ପ୍ରସ୍ତୁତିପର୍ବ ଶେଷ କରିଛି। ଦିଲ୍ଲୀର ଅନ୍‌- ପ୍ରେଡିକ୍‌ଟେବୁଲ ପ୍ରଦର୍ଶନ ପ୍ରତି ମୁମ୍ବାଇ ସତର୍କ ନିଶ୍ଚିତ ଭାବେ ରହିବ। ବିପର୍ଯ୍ୟୟ ଘଟାଇବାର କ୍ଷମତା ଦିଲ୍ଲୀ ପାଖରେ ରହିଛି ବୋଲି ମୁମ୍ବାଇ ଟିମ୍‌ ମ୍ୟାନେଜମେଣ୍ଟ ହୃଦୟଙ୍ଗମ କରିଥିବ ନିଶ୍ଚୟ।
ଗତ ୫୨ଦିନ ଧରି ଖେଳାଯାଇ ଆସୁଥିବା ଆଇପିଏଲ୍‌କୁ ବହୁସଂଖ୍ୟକ ଦର୍ଶକ ଉପଭୋଗ କରିଛନ୍ତି। କୋଭିଡ୍‌-୧୯ ମହାମାରୀର ପ୍ରକୋପ ଜାରିଥିବା ବେଳେ ଆଇପିଏଲ୍‌ର ଲୋକପ୍ରିୟତା କମିନାହିଁ। ବିଶ୍ୱର ଏହି ଶ୍ରେଷ୍ଠ ଟି୨୦ ଟୁର୍ନାମେଣ୍ଟର ସଫଳ ପରିସମାପ୍ତି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପାଇଁ ଆଉ ଏକ ସଫଳତାର ମାଇଲଖୁଣ୍ଟ ସାବ୍ୟସ୍ତ ହେବ। ଆଘାତ ସମସ୍ୟା କାରଣରୁ ଚର୍ଚ୍ଚରେ ରହିଥିବା ଆଇପିଏଲ୍‌ର ସଫଳତମ ଅଧିନାୟକ ରୋହିତ ଶର୍ମା ପଞ୍ଚମ ଟାଇଟଲ ହାସଲରୁ ଆଉମାତ୍ର ଗୋଟିଏ ପାଦ ଦୂରରେ ରହିଛନ୍ତି। ଅପରପକ୍ଷରେ ଆଇପିଏଲ୍‌ ଇତିହାସରେ ଉଚ୍ଚକୋଟୀର ପ୍ରଦର୍ଶନ କରିପାରି ନ ଥିବା ଦିଲ୍ଲୀ କିନ୍ତୁ ଶେଷରେ ଯୁବ ଖେଳାଳିମାନଙ୍କ ପ୍ରୟାସରେ ଫାଇନାଲ ଖେଳିବାର ଯୋଗ୍ୟତା ହାସଲ କରିଛି। ମୁମ୍ବାଇ ୧୫ଟି ମ୍ୟାଚ୍‌ ଖେଳି ୧୦ଟି ବିଜୟୀ ହେବା ସହ ଫାଇନାଲକୁ ଉଠିଛି। ସେହିପରି ଦିଲ୍ଲୀ ୧୬ଟି ମ୍ୟାଚ୍‌ରୁ ୯ଟିରେ ବିଜୟୀ ହୋଇ ଫାଇନାଲରେ ପ୍ରବେଶ କରିଛି। ଏକ ସନ୍ତୁଳିତ ଦଳ ହେବା ସହ ମୁମ୍ବାଇ ପ୍ରଦର୍ଶନରେ ମଧ୍ୟ ସନ୍ତୁଳନ ଦେଖିବାକୁ ମିଳିଛି। ଅନ୍ୟ କୌଣସି ଦଳ ପାଖରେ ଏହା ଦେଖିବାକୁ ମିଳିନାହିଁ। ମୋଟ ଉପରେ ମୁମ୍ବାଇ ଖେଳାଳିମାନେ ୧୩୦ଟି ଛକା ମାରିଥିବା ବେଳେ ଦିଲ୍ଲୀର ଖେଳାଳିମାନେ ମାତ୍ର ୮୪ଟି ଛକା ମାରିଛନ୍ତି। ଏହି ପରିସଂଖ୍ୟାନରୁ ମୁମ୍ବାଇର ଶକ୍ତି କେତେ ତାହା ସହଜରେ ଅନୁମାନ କରାଯାଇପାରେ।
ଦୁଇ ଓପନର ରୋହିତ ଓ କ୍ୱିଣ୍ଟନ ଡିକକ୍‌ ଦଳ ପାଇଁ ଭଲ ଆରମ୍ଭ ପ୍ରଦାନ କରିବାରେ ସଫଳ ହୋଇଛନ୍ତି। ଯୁବ ବ୍ୟାଟ୍ସମ୍ୟାନ ସୂର୍ଯ୍ୟକୁମାର ଯାଦବ ଜବରଦସ୍ତ ଫର୍ମରେ ରହିଛନ୍ତି। ସେ ଏପର୍ଯ୍ୟନ୍ତ ୬୦ଟି ବାଉଣ୍ଡାରି ମାରିବା ସହ ୧୦ଟି ଛକା ମାରିଛନ୍ତି। ଚଳିତ ସଂସ୍କରଣରେ ସେ ଦଳ ପାଇଁ ଉପଯୋଗୀ ସାବ୍ୟସ୍ତ ହୋଇଛନ୍ତି। ସେହିପରି ଯୁବ ମିଡିଲ ଅର୍ଡର ବ୍ୟାଟ୍ସମ୍ୟାନ ଇଶାନ କିଶନ ଏପର୍ଯ୍ୟନ୍ତ ୨୯ଟି ଛକା ମାରିଛନ୍ତି। ସେହିପରି କରିନ ପୋଲାର୍ଡଙ୍କର ଷ୍ଟ୍ରାଇକ୍‌ରେଟ୍‌ ୧୯୦ରୁ ଊର୍ଦ୍ଧ୍ୱ ରହିଛି।
ଦିଲ୍ଲୀ କାଗିସୋ ରବାଡ଼ା ୨୯ ଓ ଏନ୍‌ରିଚ୍‌ ନର୍ଜେ ୨୦ ଉଇକେଟ ହାସଲ କରିଛନ୍ତି। ତେବେ ଫାଇନାଲରେ ମୁମ୍ବାଇର ପାଣ୍ଡ୍ୟା ବ୍ରଦର୍ସ କ୍ରୁନାଲ ଓ ହାର୍ଦ୍ଦିକଙ୍କୁ ସାମ୍ନା କରିବାକୁ ହେବ। ଏହି ଦୁଇ ଭାଇ ବିଗ୍‌ ହିଟରଭାବେ ନିଜର ଦକ୍ଷତା ପ୍ରତିପାଦନ କରିଛନ୍ତି।
ଦିଲ୍ଲୀର ଅଭିଜ୍ଞ ଓପନର ଶିଖର ଧାଓ୍ବନ ୬୦୩ ରନ ସଂଗ୍ରହ କରି ଏଥର ଆଇପିଏଲ୍‌ରେ ବ୍ୟକ୍ତିଗତ ଭାବେ ଶ୍ରେଷ୍ଠ ପ୍ରଦର୍ଶନ କରିଛନ୍ତି। ତେବେ ଫାଇନାଲ ମ୍ୟାଚ୍‌ରେ ତାଙ୍କୁ ଯଶପ୍ରୀତ ବୁମ୍‌ରାଙ୍କ ୟର୍କର ଓ ଟ୍ରେଣ୍ଟ ବୋଲ୍ଟଙ୍କ ବାଉନସର ବଲକୁ ନିୟନ୍ତ୍ରଣ କରିବାକୁ ହେବ। ଚଳିତ ସଂସ୍କରଣରେ ମୁମ୍ବାଇ ୩ଟି ଯାକ ମ୍ୟାଚ୍‌ରେ ଦିଲ୍ଲୀ ସମ୍ପୂର୍ଣ୍ଣ ଭାବେ ପ୍ରଭାବ ବିସ୍ତାର କରି ପରାସ୍ତ କରିଛି। ଦିଲ୍ଲୀକୁ ଟାଇଟଲ ହାସଲ କରିବାକୁ ହେଲେ ଚତୁର୍ଥ ମ୍ୟାଚ୍‌ରେ ଭାଗ୍ୟଶାଳୀ ସାବ୍ୟସ୍ତ ହେବାକୁ ପଡିବ। ଦ୍ୱିତୀୟ କ୍ୱାଲିଫାୟରରେ ଦିଲ୍ଲୀ ଅଲରାଉଣ୍ଡର ମାର୍କୁସ ଷ୍ଟୋଇନିସ୍‌ଙ୍କୁ ଓପନିଂ କରିବାକୁ ସୁଯୋଗ ଦେଇ ସଫଳ ହୋଇଛି। ଷ୍ଟୋଇନିସ୍‌ ୧୨ଟି ଉଇକେଟ ହାସଲ କରିବା ସହ ୩୫୨ ରନ ସଂଗ୍ରହ କରିଛନ୍ତି। ଇନିଂସ ଓପନ କରିବା ସହ ଷ୍ଟୋଇନିସ୍‌ ଦଳରେ ସନ୍ତୁଳନ ଆଣିଛନ୍ତି। ଆୟାର ଓ ରିଷଭ ପନ୍ତ ଛକା ମାରିବାରେ ସେତେଟା ସଫଳ ହୋଇ ନ ଥିଲେ ମଧ୍ୟ ଶିମରନ ହେଟମେୟର ଏ ଦୃଷ୍ଟିକୋଣରୁ ଯଥେଷ୍ଟ ଆଗରେ ରହିଛନ୍ତି। ପାଓ୍ବାରପ୍ଲେରେ ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ୱିନ ବେଶ୍‌ ଉପଯୋଗୀ ସାବ୍ୟସ୍ତ ହୋଇଛନ୍ତି। ଦିଲ୍ଲୀ ଟାଇଟଲ ଜିତିଲେ କୋଚ୍‌ ତଥା ପୂର୍ବତନ ଅଷ୍ଟ୍ରେଲିଆ ଅଧିନାୟକ ରିକି ପଣ୍ଟିଂଙ୍କ ପାଇଁ ଏହା ବିଶେଷ ଉପଲବ୍ଧି ସାବ୍ୟସ୍ତ ହେବ। ତେବେ ୨୦୧୭ ପରଠାରୁ ସବୁ ଫାଇନାଲରେ ସାମିଲ ହୋଇ ଆସୁଥିବା ମହେନ୍ଦ୍ର ସିଂ ଧୋନୀଙ୍କୁ ଏଥର ଦେଖିବାକୁ ମିଳିବ ନାହିଁ। ଆଇପିଏଲ୍‌ ଫାଇନାଲ ମ୍ୟାଚ୍‌ ରୋମାଞ୍ଚକ ହେବ ଓ ସମସ୍ତଙ୍କୁ ଆକର୍ଷିତ କରିବ ବୋଲି ଆଶା କରାଯାଉଛି।
ମୁମ୍ବାଇ ଇଣ୍ଡିଆନ୍ସ ଦଳ:
ରୋହିତ ଶର୍ମା (ଅଧିନାୟକ), ଆଦିତ୍ୟ ତାରେ, ଅନମୋଲପ୍ରୀତ ସିଂ, ଅନୁକୂଳ ରଏ, କ୍ରିସ୍‌ ଲିନ୍‌, ଧାବଲ କୁଲକର୍ନୀ, ଦିଗ୍‌ବିଜୟ ଦେଶମୁଖ, ହାର୍ଦ୍ଦିକ ପାଣ୍ଡ୍ୟା, ଇଶାନ କିଶନ, ଜେମ୍ସ ପାଟିନସନ, ଯଶପ୍ରୀତ ବୁମ୍‌ରା, ଜୟନ୍ତ ଯାଦବ, କିରନ ପୋଲାର୍ଡ, କ୍ରୁନାଲ ପାଣ୍ଡ୍ୟା, ମିଚେଲ ମ୍ୟାକ୍‌କ୍ଲିନଘନ, ମୋହସିନ ଖାନ, ନାଥନ କୁଲ୍ଟର- ନାଇଲ, ପ୍ରିନ୍ସ ବଲବନ୍ତ ରାଏ, କ୍ୱିଣ୍ଟନ ଡିକକ୍‌, ରାହୁଲ ଚହର, ସୌରଭ ତିଓ୍ବାରୀ, ଶେଫାଇନ୍‌ ରଦରଫର୍ଡ, ସୂର୍ଯ୍ୟକୁମାର ଯାଦବ ଓ ଟ୍ରେଣ୍ଟ ବୋଲ୍ଟ।
ଦିଲ୍ଲୀ କ୍ୟାପିଟାଲ୍ସ ଦଳ:
ଶ୍ରେୟାସ ଆୟାର (ଅଧିନାୟକ), କାଗିସୋ ରାବାଡ଼ା, ମାର୍କୁସ ଷ୍ଟୋଇନିସ୍‌, ସନ୍ଦୀପ ଲାମିଚେନ, ଇଶାନ୍ତ ଶର୍ମା, ଅଜିଙ୍କ୍ୟ ରାହାନେ, ରବିଚନ୍ଦ୍ରନ ଅଶ୍ୱିନ, ଶିଖର ଧାଓ୍ବନ, ଶିମରନ ହେଟମେୟର, ଆଲେକ୍ସ କାରେ, ମୋହିତ ଶର୍ମା, ପୃଥ୍ବୀ ଶ, ଲଲିତ ଯାଦବ, ଆଭେସ ଖାନ୍‌, ଅକ୍ଷର ପଟେଲ, ତୁଷାର ଦେଶପାଣ୍ଡେ, ରିଷଭ ପନ୍ତ, ହର୍ଶାଲ ପଟେଲ, କିମୋ ପଲ, ଅମିତ୍‌ ମିଶ୍ରା, ଏନ୍‌ରିଚ ନର୍ଜେ ଓ ଡାନିଏଲ୍‌ ସାମ୍ସ।


Enter your email to get our daily news in your inbox.

All Right Reserved By Dharitri.Com

Posted inଖେଳ View All

ହାର୍ଦ୍ଦିକ ପାଣ୍ଡ୍ୟାଙ୍କୁ ଭିଲିଆନ୍‌ ସଜେଇଲେ ଏହି କ୍ରିକେଟର୍‌: କହିଦେଲେ ଏମିତି କଥା

ହାଇଦ୍ରାବାଦ୍‌,୨୮।୩: ମୁମ୍ବାଇ ଇଣ୍ଡିଆନ୍ସକୁ ସନରାଇଜର୍ସ ହାଇଦ୍ରାବାଦ ବିପକ୍ଷରେ ପରାଜୟର ସାମ୍ନା କରିବାକୁ ପଡିଛି। ହାର୍ଦ୍ଦିକ ପାଣ୍ଡ୍ୟାଙ୍କ ଅଧିନାୟକତ୍ୱକୁ ନେଇ ପ୍ରଶ୍ନ ଉଠିଛି। ଏଥି ସହ ବର୍ତ୍ତମାନ...

ରୋହିତଙ୍କୁ ସମ୍ଭାଳିବାକୁ ପଡିଲା ମୁମ୍ବାଇ ଇଣ୍ଡିଆନ୍ସର ଅଧିନାୟକତ୍ୱ! ପାଣ୍ଡ୍ୟାଙ୍କୁ କହିଲେ…

ନୂଆଦିଲ୍ଲୀ,୨୮।୩: ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ସନରାଇଜର୍ସ ହାଇଦ୍ରାବାଦ ୨୦ ଓଭରରେ ୩ ଉଇକେଟ୍‌ ହରାଇ ୨୭୭ ରନ୍‌ ସଂଗ୍ରହ କରିଥିଲା। ଆଇପିଏଲ ଇତିହାସରେ ଏହା ହେଉଛି...

ପାଣ୍ଡ୍ୟାଙ୍କୁ ଗାଳି, ଗାଏକଓ୍ବାଡଙ୍କ ପାଇଁ ତାଳି…ଅଧିନାୟକ ଦାୟିତ୍ୱ କିଭଳି ଦିଆଯାଏ ଧୋନୀଙ୍କଠାରୁ ଶିଖିବା ଉଚିତ

ନୂଆଦିଲ୍ଲୀ,୨୮।୩: ଆଇପିଏଲ୍‌ରେ ମାର୍ଚ୍ଚ ୨୪ ଏବଂ ୨୬ର ଦୃଶ୍ୟ ବହୁତ କିଛି ବୟାନ କରୁଛି। ପ୍ରଥମେ ମାର୍ଚ୍ଚ ୨୪ ବିଷୟରେ କଥା ହେବା। ଏହି ଦିନ...

ଭାରତର ଏହି ସହରରେ ପ୍ରସ୍ତୁତ ହୁଏ ଆଇପିଏଲ୍‌ ବଲ୍‌, ବର୍ଷକୁ ୫୦୦ କୋଟି ଟଙ୍କା ରୋଜଗାର

ବର୍ତ୍ତମାନ ଆଇପିଏଲ ଚାଲିଛି। ଇଣ୍ଡିଆନ ପ୍ରିମିୟର ଲିଗ୍‌କୁ ନେଇ ଲୋକଙ୍କ ମଧ୍ୟରେ ଏକ ବଡ଼ କ୍ରେଜ୍‌ ରହିଛି। ଏହି ପ୍ରତିଯୋଗିତା ୬୬ ଦିନ ପର୍ଯ୍ୟନ୍ତ ଚାଲିବ।...

ମୁମ୍ବାଇ ଇଣ୍ଡିଆନ୍ସ-ସନରାଇଜର୍ସ ହାଇଦ୍ରାବାଦ ମ୍ୟାଚ୍‌ରେ ରେକର୍ଡ ବର୍ଷା

ହାଇଦ୍ରାବାଦ୍‌,୨୮।୩: ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଆଇପିଏଲ ଇତିହାସରେ ସନରାଇଜର୍ସ ହାଇଦ୍ରାବାଦ ସର୍ବାଧିକ ସ୍କୋର କରିଥିଲା। ଏହାପୂର୍ବରୁ ଏହି ରେକର୍ଡ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ନାମରେ ଥିଲା।...

ମାତ୍ର ୨୨ ମିନିଟ୍‌ରେ ରେକର୍ଡ ଭାଙ୍ଗିଦେଲେ ଅଭିଷେକ

ହାଇଦ୍ରାବାଦ,୨୮।୩: ସନରାଇଜର୍ସ ହାଇଦ୍ରାବାଦ ପାଇଁ ବିସ୍ଫୋରକ ବ୍ୟାଟିଂ କରୁଥିବାବେଳେ ଟ୍ରାଭିସ ହେଡ ଅର୍ଦ୍ଧଶତକ ହାସଲ କରିଥିଲେ। ମାତ୍ର କିଛି ମିନିଟ ପରେ ଅଭିଷେକ ଶର୍ମା ଏହି...

ପାଣ୍ଡ୍ୟାଙ୍କ ହାତରୁ ଯାଇପାରେ ଅଧିନାୟକ ପଦ: ରୋହିତଙ୍କ ସହ କଥା ହେଲେ ଆକାଶ ଅମ୍ବାନୀ

ହାଇଦ୍ରାବାଦ,୨୮।୩: ସନରାଇଜର୍ସ ହାଇଦ୍ରାବାଦ ମୁମ୍ବାଇ ଇଣ୍ଡିଆନ୍ସକୁ ପରାସ୍ତ କରିଛି। ଏହି ମ୍ୟାଚରେ ଆଇପିଏଲ ଇତିହାସରେ ହାଇଦ୍ରାବାଦ ସବୁଠୁ ବଡ଼ ସ୍କୋର କରିଥିଲା। ମୁମ୍ବାଇ ଦଳ ହାର୍ଦ୍ଦିକ...

ବାଡ଼େଇ ବାଡ଼େଇ ବଲ୍ ଚୋପା ଛଡ଼େଇ ଦେଲେ ସନରାଇଜର୍ସ ହାଇଦ୍ରାବାଦ ବ୍ୟାଟର

ହାଇଦ୍ରାବାଦ,୨୭।୩: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ଇତିହାସରେ ସବୁଠୁ ବଡ଼ ସ୍କୋର କରିଛି ସନରାଇଜର୍ସ ହାଇଦ୍ରାବାଦ (ଏସଆରଏଚ)। ବୁଧବାର ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ...

Advertisement

ଧରିତ୍ରୀ କାର୍ଟୁନ

Archives
Model This Week

ପିଲାଙ୍କ ଧରିତ୍ରୀ

Why Dharitri