ନୂଆଦିଲ୍ଲୀ: ଗତ ୬ ସେସନ ହେବ ଦେଶର ପୁଞ୍ଜିବଜାରରେ ଭଲ କାରବାର ଦେଖିବାକୁ ମିଳିଛି। ସୋମବାର ଉଭୟ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ଏବଂ ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ)ରେ ସୂଚକାଙ୍କ ଊର୍ଦ୍ଧ୍ୱଗାମୀ ରହିଥିଲା। ବ୍ୟାଙ୍କିଙ୍ଗ୍ ଏବଂ ଫାଇନାନ୍ସ ଷ୍ଟକ୍ କାରବାର ଉଚ୍ଚରେ ରହିବା ଯୋଗୁ ବଜାର ରେକର୍ଡ ସ୍ତରରେ ବନ୍ଦ ହୋଇଛି। ଦିନ ମଧ୍ୟରେ ସେନ୍ସେକ୍ସ କାରବାର ୪୨,୬୪୫ ପଏଣ୍ଟ ସ୍ତର ଛୁଇଁଥିଲା। ସେନ୍ସେକ୍ସ ୭୦୪ ପଏଣ୍ଟ(୧.୬୮%) ଉଚ୍ଚରେ ରହି ରେକର୍ଡ ସ୍ତର ୪୨,୫୯୭ ପଏଣ୍ଟରେ ବନ୍ଦ ହୋଇଛି। ସେହିଭଳି ନିଫ୍ଟି କାରବାର ୧୯୭ ପଏଣ୍ଟ ବା ୧.୬୨% ଉଚ୍ଚରେ ରହି ୧୨,୪୬୧ ପଏଣ୍ଟ ଛୁଇଁଥିବା ନଜରକୁ ଆସିଛି।
୩୦ ଶେୟାର ବିଶିଷ୍ଟ ଇଣ୍ଡେକ୍ସରେ ଇଣ୍ଡସଇଣ୍ଡ ବ୍ୟାଙ୍କ, ଭାରତୀ ଏୟାରଟେଲ, ଆଇସିଆଇସିଆଇ ବ୍ୟାଙ୍କ, ଆକ୍ସିସ ବ୍ୟାଙ୍କ, ଟାଟା ଷ୍ଟିଲ୍, ଟେକ୍ ମହିନ୍ଦ୍ରା ଏବଂ ଟାଇଟାନ ଭଳି କମ୍ପାନୀର ଶେୟାର କାରବାର ବେଶ୍ ଉନ୍ନତ ରହିଛି। ଅପରପକ୍ଷରେ ମାରୁତି, ଆଇଟିସି, ବଜାଜ ଫିନ୍ସର୍ଭ ଭଳି କିଛି କମ୍ପାନୀର ଶେୟାର କାରବାର ପ୍ରଭାବିତ ହୋଇଛି। ଆମେରିକା ରାଷ୍ଟ୍ରପତି ନିର୍ବାଚନରେ ବାଇଡେନ୍ଙ୍କର ବିଜୟ ହେଲା ପରେ ଘରୋଇ ବଜାରର ଆଇଟି ଷ୍ଟକ୍ କାରବାରରେ ବେଶ୍ ଉନ୍ନତି ପରିଲକ୍ଷିତ ହୋଇଛି। ବାଇଡେନ୍ ଏଚ୍-୧ବି ଭିଜା ସହ ଅନ୍ୟ ନିୟମ ଭାରତୀୟ ବଜାରକୁ ସୁହାଇବ ବୋଲି ଆଶା କରାଯାଉଛି। ଆଇଟି ଏବଂ ଘରୋଇ ଫାଇନାନ୍ସ ମାର୍କେଟ ପାଇଁ ବାଇଡେନ୍ଙ୍କ ବିଜୟ ଖୁସି ଖବର ଆଣିଛି।
ବାଇଡେନ୍ଙ୍କ ନୀତି ଘରୋଇ ବଜାର ଲାଗି ଲାଭକାରୀ ହେବ ବୋଲି ନିବେଶକ ଆଶା କରୁଥିବା ଆରିହନ୍ତ କ୍ୟାପିଟାଲ ମାର୍କେଟର ନିର୍ଦ୍ଦେଶକ ଅନିତା ଗାନ୍ଧୀ ସୂଚନା ଦେଇ କହିଛନ୍ତି। ବିଦେଶରେ କାମ କରୁଥିବା ଆଇଟି କର୍ମଚାରୀଙ୍କ ଲାଗି ବିଭିନ୍ନ ନିୟମ କୋହଳ ହେବ ବୋଲି ସେ କହିଛନ୍ତି। ବାଇଡେନ୍ଙ୍କ ବିଜୟ ପରେ ଓ୍ବାଲ୍ଷ୍ଟ୍ରିଟ୍ର ସାପ୍ତାହିକ ପ୍ରଦର୍ଶନ ଏପ୍ରିଲ ମାସଠାରୁ ସର୍ବୋଚ୍ଚ ସ୍ତରରେ ରହିଛି। ଏଥିରେ ୭ରୁ ୯% ବୃଦ୍ଧି ପରିଲକ୍ଷିତ ହୋଇଛି। ଅପରପକ୍ଷରେ ଭାରତୀୟ ଟଙ୍କା ଡଲାର ତୁଳନାରେ ୪ ପଇସା ଊର୍ଦ୍ଧ୍ୱରେ ରହି ୭୪.୦୪ ଟଙ୍କା ସ୍ତରରେ ରହିଛି। ଶୁକ୍ରବାର ବିଦେଶୀ ନିବେଶକମାନେ ୪୮୬୯ କୋଟି ଟଙ୍କାର ଶେୟାର କ୍ରୟ କରିଥିବା ଜଣାପଡିଛି।
