ଚେନ୍ନାଇ,୨୩।୩: ଏପରି ଏକ ଦଳ ଯିଏ ୫ଥର ଆଇପିଏଲ ଜିତିଥିବାବେଳେ ଦଳରେ ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା, ୱେଷ୍ଟଇଣ୍ଡିଜ ଏବଂ ଆଫଗାନିସ୍ତାନରୁ କୌଣସି ଖେଳାଳି ନାହାଁନ୍ତି। ଆଶ୍ଚର୍ଯ୍ୟ ଲାଗୁଥିଲେ ବି ସତ। ଆମେ କହୁଛୁ ଆଇପିଏଲର ସବୁଠାରୁ ଲୋକପ୍ରିୟ ଦଳ ଚେନ୍ନାଇ ସୁପର କିଙ୍ଗ୍ସ (CSK)। ଏହି ଦଳରେ ଉପର ଲିଖିତ ଦେଶଗୁଡିକର ଜଣେ ବି ଖେଳାଳି ନାହାନ୍ତି। ୨୨ ମାର୍ଚ୍ଚ ଶୁକ୍ରବାର CSK ର ପ୍ରଥମ ମ୍ୟାଚ୍ରେ ଦଳ RCB କୁ ଚିତ୍ପଟାଙ୍ଗ କରିଛି।
CSK ଦଳରେ ସମୁଦାୟ ୮ ଜଣ ବିଦେଶୀ ଖେଳାଳି ଅଛନ୍ତି, ସେମାନଙ୍କ ମଧ୍ୟରୁ ୪ ଜଣ ନ୍ୟୁଜିଲ୍ୟାଣ୍ଡର । ଏହି ୪ ଜଣ ଖେଳାଳି ହେଉଛନ୍ତି- ଡିଭନ କନୱେ, ରଚିନ ରବିନ୍ଦ୍ର, ଡାରିଲ ମିଚେଲ, ମିଚେଲ ସାଣ୍ଟନର୍ । ଚେନ୍ନାଇ ସୁପର କିଙ୍ଗ୍ସ ଦଳର ଅବଶିଷ୍ଟ ଚାରିଜଣ ବିଦେଶୀ କ୍ରିକେଟର ଶ୍ରୀଲଙ୍କା, ବାଂଲାଦେଶ ଏବଂ ଇଂଲଣ୍ଡର। ନ୍ୟୁଜିଲ୍ୟାଣ୍ଡ ପରେ ସିଏସକେ ଦଳର ସର୍ବାଧିକ ଦୁଇ ଖେଳାଳି ଶ୍ରୀଲଙ୍କାରୁ ଆସିଛନ୍ତି। ଏହି ଦଳରେ ଶ୍ରୀଲଙ୍କାର ମାଥିଶା ପାଥିରାନା ଏବଂ ମହେଶ ତେକ୍ଷାନା ଅଛନ୍ତି। ଏହା ବ୍ୟତୀତ ଚେନ୍ନାଇ ସୁପର କିଙ୍ଗ୍ସ ଦଳରେ ଇଂଲଣ୍ଡର ମୋଏନ ଅଲି ଏବଂ ବାଂଲାଦେଶର ମୁସ୍ତାଫିଜୁର ରହମାନ ମଧ୍ୟ ଅଛନ୍ତି।
ଅନ୍ୟପକ୍ଷରେ, ଆଇପିଏଲର ଅବଶିଷ୍ଟ ୯ ଟି ଦଳରେ ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା, ୱେଷ୍ଟଇଣ୍ଡିଜ କିମ୍ବା ଆଫଗାନିସ୍ତାନର ଖେଳାଳି ଅଛନ୍ତି। ସନରାଇଜର୍ସ ହାଇଦ୍ରାବାଦର ଅଧିନାୟକ ହେଉଛନ୍ତି ଅଷ୍ଟ୍ରେଲିଆର ପ୍ୟାଟ କମିନ୍ସ।
