ନୂଆଦିଲ୍ଲୀ,୧୨ା୧- ଆଇପିଏଲ ଦଳ ରାଜସ୍ଥାନ ରୟାଲ୍ସ ତା’ର ଅଧିନାୟକ ଷ୍ଟିଭ ସ୍ମିଥଙ୍କୁ ଛାଡ଼ିବାକୁ ଚିନ୍ତା କରୁଛି। ଏ ନେଇ ଆସନ୍ତା ସପ୍ତାହରେ ଚୂଡ଼ାନ୍ତ ନିଷ୍ପତ୍ତି ନିଆଯିବ। ଫ୍ରାଞ୍ଚାଇଜ ଦଳରେ ରଖିବାକୁ ଚାହୁଁଥିବା ଖେଳାଳିଙ୍କ ତାଲିକା ପ୍ରକାଶ ପୂର୍ବରୁ ଏହା ସ୍ପଷ୍ଟ ହେବ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପକ୍ଷରୁ ଆସନ୍ତା ୨୧ ତାରିଖ ମଧ୍ୟରେ ଆଇପିଏଲର ୮ ଦଳକୁ ବଜାୟ ଖେଳାଳିଙ୍କ ତାଲିକା ଦେବାକୁ କୁହାଯାଇଛି।
ଗତ ୨୦୨୦ ସିଜନରେ ସ୍ମିଥ୍ ଆଭରେଜ ପ୍ରଦର୍ଶନ କରିଥିଲେ। ଏହି କାରଣରୁ ଦଳ ତାଙ୍କୁ ବିଦା କରବାକୁ ଚିନ୍ତା କରୁଛି। ଏହି ଅଷ୍ଟ୍ରେଲିଆନ ଖେଳାଳି ୧୪ ମ୍ୟାଚ୍ରେ ୧୩୧ ଷ୍ଟ୍ରାଇକରେଟ୍ରେ ହାସଲ କରିଥିଲେ ୩୧୧ ରନ୍। ଏହାଛଡ଼ା ସ୍ମିଥଙ୍କ ନେତୃତ୍ୱରେ ଦଳର ପ୍ରଦର୍ଶନ ମଧ୍ୟ ସେତେଟା ଭଲ ନ ଥିଲା। ଏଠାରେ ପ୍ରଶ୍ନ ଉଠୁଛି ସ୍ମିଥ ବିଦା ହେଲା ପରେ ଦଳର ନେତୃତ୍ୱ ଭାର କିଏ ନେବ? ଗତ ସିଜନରେ ସଞ୍ଜୁ ସାମସନ ଦଳ ପାଇଁ ଭଲ ପ୍ରଦର୍ଶନ କରିଥିଲେ। ହେଲେ ଦଳରେ ତାଙ୍କ ଠାରୁ ଅଧିକ ଅଭିଜ୍ଞତା ଥିବା ବେନ ଷ୍ଟୋକ୍ସ ଓ ଜୋସ ବଟଲରଙ୍କ ଭଳି ବିଦେଶୀ ଖେଳାଳି ରହିଛନ୍ତି। କିନ୍ତୁ ଟିମ୍ ମ୍ୟାନେଜମେଣ୍ଟ ଦୁଇ ଇଂଲିଶ ଖେଳାଳିଙ୍କ ଉପରେ ଅଧିକ ଚାପ ପକାଇବାକୁ ପ୍ରସ୍ତୁତ ନୁହନ୍ତି।
