ଢେଙ୍କାନାଳ ଅଫିସ, ୧୯।୧୧: ଭାଙ୍ଗିଗଲାଣି ସୁରକ୍ଷା ବାଡ଼। ସ୍ପାନ୍ରେ ସ୍ଥାନେ ସ୍ଥାନେ ଦେଖାଦେଲାଣି ଫାଟ। ବର, ଅଶ୍ୱତ୍ଥ ଗଛ ଉଠି ମାଡ଼ିଗଲାଣି ଚେର। ମାଲ୍ବୋଝେଇ ଭାରିଯାନ ଗଲେ ଥରିଉଠୁଛି। ୧୯୯୩ରେ ତତ୍କାଳୀନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ହାତରେ ଲୋକାର୍ପିତ କାମାକ୍ଷାନଗର ବ୍ଲକ ସାରଙ୍ଗଧର ସେତୁ ଏବେ ଏଭଳି ବିପଦପୂର୍ଣ୍ଣ ଅବସ୍ଥାରେ ରହିଛି। ପ୍ରାୟ ୩ ଦଶନ୍ଧି ଧରି ଢେଙ୍କାନାଳରୁ ପଶ୍ଚିମ, ଉତ୍ତର ଓ ଉପକୂଳ ଓଡ଼ିଶାବାସୀଙ୍କ ପାଇଁ ସମ୍ପର୍କ ସେତୁ ସାଜିଥିବା ଏହି ବ୍ରିଜ୍ ଏବେ ସୁରକ୍ଷା ଲୋଡ଼ିଲାଣି। ହେଲେ ପ୍ରଶାସନର ଚରମ ଉଦାସୀନତା ସେତୁ ମରାମତିରେ ଅନ୍ତରାୟ ସାଜିଥିବାବେଳେ ଏହା ଅଘଟଣକୁ ଆମନ୍ତ୍ରଣ ବୋଲି ବୁଦ୍ଧିଜୀବୀ, ଗାଡ଼ିଚାଳକ ଏବଂ ଯାତ୍ରୀମାନେ ଅଭିଯୋଗ କରିଛନ୍ତି।
ଢେଙ୍କାନାଳ ସଦର ବ୍ଲକର ଗେଙ୍ଗୁଟିଆ-କାମାକ୍ଷାନଗର ବ୍ଲକ ତୁମୁସିଙ୍ଗା ପଞ୍ଚାୟତର କମଗରା ମଧ୍ୟରେ ପ୍ରବାହିତ ବ୍ରାହ୍ମଣୀ ନଦୀ ଉପରେ ନିର୍ମିତ ହୋଇଛି ସାରଙ୍ଗଧର ସେତୁ। ପୂର୍ତ୍ତ ବିଭାଗ ରାସ୍ତାରେ ଥିବା ଏହି ବ୍ରିଜ୍ ଜିଲା ଦେଇଯାଇଥିବା ୫୫ନଂ. ଏବଂ ୫୩ନଂ. ଜାତୀୟ ରାଜପଥକୁ ସଂଯୋଗ ପାଇଁ ସାଜିଛି ପ୍ରମୁଖ ମାଧ୍ୟମ। ୩୪ ସ୍ପାନ୍ ବିଶିଷ୍ଟ ଏହି ବ୍ରିଜ୍ର ଲମ୍ବ ୧,୩୩୦ ମିଟର ଏବଂ ଓସାର ୭.୫ ମିଟର। ୧୯୯୩ ନଭେମ୍ବର ୨୪ରେ ତତ୍କାଳୀନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଦ୍ୱାରା ଏହା ଉଦ୍ଘାଟିତ ହୋଇଥିଲା। ସେତେବେଳେ ଏହାର ନିର୍ମାଣରେ ଖର୍ଚ୍ଚ ହୋଇଥିଲା ୧୩.୮୬ କୋଟି ଟଙ୍କା। ତେବେ ଦୀର୍ଘ ୨୯ବର୍ଷ ଧରି ରକ୍ଷଣାବେକ୍ଷଣ ଅଭାବରୁ ବ୍ରିଜ୍ ବିପଦସଙ୍କୁଳ ହୋଇପଡ଼ିଛି। ଦୁଇପାର୍ଶ୍ୱ କଂକ୍ରିଟ୍ ବାଡ଼ ଦୁର୍ବଳ ହୋଇପଡ଼ିଥିବାବେଳେ କେତେକ ସ୍ଥାନରେ ଭାଙ୍ଗିଗଲାଣି। ବ୍ରିଜ୍ର ଦୁଇପାର୍ଶ୍ୱରେ ଥିବା କଂକ୍ରିଟ ବାଡ଼ ତଳେ ଅଶ୍ୱତ୍ଥ ଗଛ ଉଠି ଫାଟ ସୃଷ୍ଟି ହୋଇଛି। ପଶ୍ଚିମ ଓଡ଼ିଶାର ସମ୍ବଲପୁର, ସୁନ୍ଦରଗଡ଼, ଦେବଗଡ଼, ଉତ୍ତର ଓଡ଼ିଶାର କେନ୍ଦୁଝର, ମୟୂରଭଞ୍ଜ, ବାଲେଶ୍ୱର, ଉପକୂଳ ଓଡ଼ିଶାର ଯାଜପୁର, ପଡ଼ୋଶୀ ଅନୁଗୋଳ ଜିଲାର ପାଲଲହଡ଼ା, ତାଳଚେର, କଣିହଁା ଏବଂ ଢେଙ୍କାନାଳ ଜିଲାର ପରଜଙ୍ଗ, କଙ୍କଡ଼ାହାଡ଼, କାମାକ୍ଷାନଗର, ଭୁବନ ଅଞ୍ଚଳବାସୀଙ୍କ ପାଇଁ ଏହି ସେତୁ ଅତି ଗୁରୁତ୍ୱପୂର୍ଣ୍ଣ। ସେତୁ ଦେଇ ଯାଇଥିବା ପୂର୍ତ୍ତ ବିଭାଗ ରାସ୍ତା ୫୫ ଏବଂ ୫୩ନଂ. ଜାତୀୟ ରାଜପଥକୁ ଉଭୟ ପଟରୁ ସଂଯୋଗ କରୁଥିବାରୁ ଦୈନିକ ହଜାର ହଜାର ସଂଖ୍ୟାରେ ଯାନବାହନ ବ୍ରିଜ୍ ଦେଇ ଯାତାୟାତ କରୁଛି। ହେଲେ ଏଭଳି ଗୁରୁତ୍ୱପୂର୍ଣ୍ଣ ବ୍ରିଜ୍ର ସୁରକ୍ଷା ପାଇଁ ଆଖି ବୁଜିଦେଇଛନ୍ତି ବିଭାଗୀୟ ଅଧିକାରୀ। ସୁରକ୍ଷା ବାଡ଼ ଭାଙ୍ଗି ମୁକୁଳା ପଡ଼ିଥିବାବେଳେ ଦୁର୍ଘଟଣା ଘଟିବାର ଆଶଙ୍କାକୁ ଏଡ଼ାଇ ଦିଆଯାଇପାରୁନାହିଁ। ବିଶେଷ କରି ରାତିରେ ଯାତାୟାତ କରୁଥିବା ଯାତ୍ରୀ ବିପଦମୁଣ୍ଡାଇ ଚଳପ୍ରଚଳ କରୁଛନ୍ତି। ଅଗ୍ରାଧିକାର ଭିତ୍ତିରେ ସମସ୍ୟାର ସମାଧାନ କରିବାକୁ ଦାବି ହେଉଛି।
ଏ ସଂକ୍ରାନ୍ତରେ ଢେଙ୍କାନାଳ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ମନୋରଞ୍ଜନ ବିଶ୍ୱାଳ କୁହନ୍ତି, ସେତୁ ମରାମତି କରିବା ଆବଶ୍ୟକ ପଡ଼ିଲାଣି। ସେଣ୍ଟ୍ରାଲ୍ ରୋଡ୍ ରିସର୍ଚ୍ଚ ଇନଷ୍ଟିଚ୍ୟୁଟର ଏକ ପ୍ରତିନିଧି ଦଳ ଏହି ସେତୁ ପରିଦର୍ଶନ କରିବା ପରେ ମରାମତି ପାଇଁ ବଜେଟ ପ୍ରସ୍ତୁତ କରାଯିବ ବୋଲି ସେ ସୂଚନା ଦେଇଛନ୍ତି। ଅନ୍ୟପଟେ ବ୍ରାହ୍ମଣୀ ନଦୀରେ ପ୍ରସ୍ତାବିତ ଜାତୀୟ ଜଳମାର୍ଗ (ଅନୁଗୋଳ ଜିଲା ସମଲଠାରୁ ଭଦ୍ରକ ଜିଲା ଧାମରା) ପାଇଁ ଉକ୍ତ ସେତୁର ଉଚ୍ଚତା ବଢ଼ାଇବାକୁ ପଡ଼ିବ। ଏହି ସେତୁକୁ ଭଙ୍ଗାଯାଇ ଅଧିକ ଉଚ୍ଚତା ବିଶିଷ୍ଟ ନିର୍ମାଣ କରିବାକୁ ହେବ। ତେଣୁ ଏହାକୁ ସାମୟିକ ମରାମତି କରାଯିବ କି ସିଧାସଳଖ ଉଚ୍ଚତା ବୃଦ୍ଧି କରି ନିର୍ମାଣ କରାଯିବ ତାହାକୁ ନେଇ ଏବେ ବି ଦ୍ୱନ୍ଦ୍ୱରେ ରହିଛି ବିଭାଗ।
