![](https://www.dharitri.com/wp-content/uploads/2021/09/2-Balasore-Special-Story-Tabla-Badaka-Aiswani.jpg)
ବାଲେଶ୍ୱର ଅଫିସ, ୮।୯-ବୟସ ତାଙ୍କୁ ୯। ଏଇ ବୟସରୁ ତବଲା ବାଦନ କରି ଶ୍ରୋତାଙ୍କୁ ମତୁଆଲା କରି ଦେଉଛନ୍ତି। ନିଜର ପ୍ରତିଭା ପ୍ରଦର୍ଶନ କରି ଦି ନ୍ୟାଶନାଲ ଏକାଡେମୀ ଫର୍ ଆର୍ଟ ଏଜୁକେଶନ (ମହାରାଷ୍ଟ୍ର) ପକ୍ଷରୁ ‘ଇଣ୍ଡିଆ ଷ୍ଟାର ଆଇକନ୍ କିଡ୍ସ ଆଚିଭର୍ସ ଆୱାର୍ଡ-୨୦୨୧’ରେ ସମ୍ମାନିତ ହୋଇ ଓଡ଼ିଶାର ଗୌରବ ବୃଦ୍ଧି କରିଛନ୍ତି। ଆଉ ଏଥିସହ ସାଉଁଟିଲେଣି ଢେର ପ୍ରଶଂସା। ସେହି କୁନି ପ୍ରତିଭା ହେଲେ ଐଶାନୀ ପ୍ରଧାନ।
ବାଲେଶ୍ୱର ବାରବାଟୀସ୍ଥିତ ଆଇନଜୀବୀ ଲିଟୁ ପ୍ରଧାନ ଓ ଶାଶ୍ୱତୀ କରଙ୍କ କନ୍ୟା ଐଶାନୀ। ଝିଅର ତବଲା ବାଦନ ପ୍ରତି ଆକର୍ଷଣକୁ ଲକ୍ଷ୍ୟ କରି ମା’ବାପା ଐଶାନୀଙ୍କୁ ୫ ବର୍ଷ ବୟସରୁ ତବଲା ଗୁରୁ କମଳାକାନ୍ତ ବେହେରାଙ୍କ ପାଖରେ ଛାଡ଼ିଥିଲେ। ତାଙ୍କର ପ୍ରତିଭା ବିଭିନ୍ନ ପ୍ରତିଯୋଗିତାରେ ଆଣିଦେଇଛି ସଫଳତା । ନବଭାରତ ରାଷ୍ଟ୍ରୀୟ ଜ୍ଞାନପୀଠ ସମ୍ମାନ, ୟଙ୍ଗ ଷ୍ଟାର ସମ୍ମାନ, କଳା ବେଦିକା ସମ୍ମାନ, ନ୍ୟାଶନାଲ ତାଲ୍ କୃତୀମଣି ସମ୍ମାନ ସହିତ ବିଭିନ୍ନ ଅନୁଷ୍ଠାନରୁ ସମ୍ମାନିତ ହୋଇଛନ୍ତି। ଏଥିସହ ଅଧ୍ୟାପିକା ପୂର୍ଣ୍ଣିମା ବାରିକଙ୍କଠାରୁ ଓଡ଼ିଶୀ ନୃତ୍ୟ ଶିକ୍ଷା ଗ୍ରହଣ କରୁଛନ୍ତି ଐଶାନୀ । ବକ୍ତୃତା, ଗଳ୍ପକଥନ, ଶ୍ଳୋକାବୃତ୍ତି, କବିତା ଆବୃତ୍ତିରେ ବି ବିଭିନ୍ନ ସ୍ଥାନରୁ ପୁରସ୍କୃତ ହୋଇଛନ୍ତି ସେ। ସେଣ୍ଟ କନ୍ଭେଣ୍ଟ ସିନିୟର ସେକେଣ୍ଡାରୀ ସ୍କୁଲର ଷ୍ଟାଣ୍ଡାର୍ଡ-୪ଛାତ୍ରୀ ଐଶାନୀ ପିଲାଦିନରୁ ନିଜ ବିଦ୍ୟାଳୟରେ ଆୟୋଜିତ ବକ୍ତୃତା, ରାଇମ୍, ଗଳ୍ପକଥନ ପ୍ରତିଯୋଗିତାରେ ଏକାଧିକ ପୁରସ୍କାର ପାଇଛନ୍ତି। ସେହିପରି ଫକୀରମୋହନ ସାହିତ୍ୟ ପରିଷଦ ପକ୍ଷରୁ ‘କବିତା ଆବୃତ୍ତି’ରେ ସ୍ବତନ୍ତ୍ର ସ୍ଥାନ ହାସଲ ସହ କିଡ୍ସ ଫେଷ୍ଟରେ ଗଳ୍ପ କଥନରେ କୃତିତ୍ୱ ଅର୍ଜନ କରିଛନ୍ତି। କରୋନା ସମୟରେ ବିଭିନ୍ନ ଜାତୀୟ ଓ ଅନ୍ତର୍ଜାତୀୟ ସ୍ତରରେ ସଙ୍ଗୀତ ମହୋତ୍ସବରେ ଅନଲାଇନ୍ରେ ଲାଇଭ ପ୍ରୋଗ୍ରାମ୍ (ଏକକ ତବଲା ବାଦନ ପରିବେଷଣ) କରି କଳାକ୍ଷେତ୍ରକୁ ସମୃଦ୍ଧ କରିବା ସହ ଓଡ଼ିଶା ପାଇଁ ସୁନାମ ଅର୍ଜନ କରିଛନ୍ତି।
ଐଶାନୀ ଭବିଷ୍ୟତରେ ଜଣେ ସଫଳ କଳାକାର ହେବା ସହ ସ୍କୁଲ ପାଠ୍ୟକ୍ରମ ଶେଷ କରି ତାଙ୍କ ମା’ବାପାଙ୍କ ପରି ଆଇନ ପାଠପଢ଼ି ବିଚାର ବିଭାଗୀୟ ସେବାରେ ଯୋଗଦେବା ଲାଗି ଲକ୍ଷ୍ୟ ରଖିଥିବା କହିଛନ୍ତି।