ସାଉଥାମ୍ପଟନ, ୯ା୭(ଏପି)- କରୋନା ଭାଇରସ୍ ସଂକ୍ରମଣ ଜନିତ କାରଣରୁ ଦୀର୍ଘ ୪ ମାସର ବ୍ରେକ୍ ପରେ ଅନ୍ତର୍ଜାତୀୟ କ୍ରିକେଟ ଫେରିଛି। ବୁଧବାରଠାରୁ ସ୍ଥାନୀୟ ଏଜାସ ବାଓଲ ଷ୍ଟାଡିୟମରେ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ଆରମ୍ଭ ହୋଇଛି ପ୍ରଥମ କ୍ରିକେଟ ଟେଷ୍ଟ। ମ୍ୟାଚ ଆରମ୍ଭ ପୂର୍ବରୁ ବ୍ଲାକ୍ ଲାଇଭ୍ସ ମ୍ୟାଟର ଆନ୍ଦୋଳନକୁ ସମର୍ଥନ ଜଣାଇ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ଦଳର ଖେଳାଳିମାନେ ଗୋଟିଏ ଆଣ୍ଠୁକୁ ତଳେ ଲଗାଇଥିଲେ। ଉଭୟ ଦଳର ଖେଳାଳିମାନେ ପିନ୍ଧିଥିବା ଟି-ଶାର୍ଟର କଲରରେ ମଧ୍ୟ ବ୍ଲାକ୍ ଲାଇଭ୍ସ ମ୍ୟାଟର ଲୋଗୋ ଲଗାଯାଇଛି। ଉଭୟ ଦଳର ଖେଳାଳି ଓ ସପୋର୍ଟ ଷ୍ଟାଫ୍ଙ୍କୁ ଏକାଧିକଥର କୋଭିଡ-୧୯ ଟେଷ୍ଟ କରାଯିବାପରେ ଜୈବ-ସୁରକ୍ଷିତ ପରିବେଶରେ ବିନା ଦର୍ଶକରେ ଏହି ଟେଷ୍ଟ ମ୍ୟାଚ ଅନୁଷ୍ଠିତ ହେଉଛି। ପ୍ରକାଶ ଯୋଗ୍ୟ ଯେ, ଗତ ମାସରେ ଇଂଲଣ୍ଡରେ ପ୍ରିମିୟର ଲିଗ୍ ଫୁଟବଲ ଆରମ୍ଭ ହେବା ସମୟରେ ମଧ୍ୟ ଆଣ୍ଠୁ ତଳେ ଲଗାଇବା ପ୍ରକ୍ରିୟା ଦେଖିବାକୁ ମିଳିଥିଲା। କରୋନା ଭାଇରସ ସଂକ୍ରମଣରେ ମୃତ୍ୟୁବରଣ କରିଥିବା ବ୍ୟକ୍ତି ଏବଂ ଗତ ସପ୍ତାହରେ ପରଲୋକ ଗମନ କରିଥିବା ଓ୍ବେଷ୍ଟଇଣ୍ଡିଜ କ୍ରିକେଟ କିମ୍ବଦନ୍ତୀ ଏଭର୍ଟନ ଓ୍ବିକ୍ସଙ୍କ ସ୍ମୃତି ଉଦ୍ଦେଶ୍ୟରେ ଖେଳ ଆରମ୍ଭ ପୂର୍ବରୁ ଏକ ମିନିଟର ନୀରବ ପ୍ରାର୍ଥନା କରାଯାଇଥିଲା।
ହାଲ୍କା ବର୍ଷା ଏବଂ ଆଉଟ୍ଫିଲ୍ଡ ଓଦା ଯୋଗୁ ମ୍ୟାଚ ୩ ଘଣ୍ଟା ବିଳମ୍ବରେ ଆମ୍ଭ ହୋଇଥିଲା। ଇଂଲଣ୍ଡର କାମଚଳା ଅଧିନାୟକ ବେନ୍ ଷ୍ଟୋକ୍ସ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ତେବେ ଟସ୍ ପରେ ଷ୍ଟୋକ୍ସ କିଛି ସମୟ ପାଇଁ ସାମାଜିକ ଦୂରତ୍ୱ କଥାକୁ ଭୁଲିଯାଇ ପ୍ରତିପକ୍ଷ ଅଧିନାୟକ ଜାସନ ହୋଲ୍ଡରଙ୍କ ସହ ହାତ ମିଳାଇବାକୁ ଯାଇଥିଲେ। ହୋଲ୍ଡର ହାତ ଦୂରେଇ ନେବାରୁ ଉଭୟ ଅଲରାଉଣ୍ଡର ହସିଥିଲେ। ଦୀର୍ଘଦିନଧରି ଇଂଲଣ୍ଡ ଦଳର ନିୟମିତ ସଦସ୍ୟ ରହି ଆସିଥିବା ଷ୍ଟୁଆର୍ଟ ବ୍ରଡ୍ଙ୍କୁ ବାଦ୍ ଦେଇ ଷ୍ଟୋକ୍ସ ମ୍ୟାଚକୁ ଓହ୍ଲାଇଥିଲେ। ପ୍ରଥମ ଓଭରକୁ କେମର ରୋଚ୍ ମେଡେନ ନେବାପରେ ଦ୍ୱିତୀୟ ଓଭର ବୋଲିଂ କରିଥିବା ଶାନନ ଗାବ୍ରିଏଲ ୪ର୍ଥ ବଲ୍ରେ ଇଂଲଣ୍ଡ ଓପନର ଡମ୍ ସିବ୍ଲେଙ୍କୁ କ୍ଲିନ ବୋଲ୍ଡ କରି ଘରୋଇ ଦଳକୁ ପ୍ରାରମ୍ଭିକ ଝଟ୍କା ଦେଇଥିଲେ। ଫଳରେ ଇଂଲଣ୍ଡ ଖାତା ଖୋଲିବା ପୂର୍ବରୁ ପ୍ରଥମ ଉଇକେଟ ହରାଇଥିଲା। ୩ ଓଭରରେ ୧ ରନ, ୪.୧ ଓଭର ବେଳକୁ ୩ ରନ ଏବଂ ୧୭.୪ ଓଭରରେ ୩୫ ରନ ହୋଇଥିବାବେଳେ ବର୍ଷା ଯୋଗୁ ଖେଳ ବାଧାପ୍ରାପ୍ତ ହୋଇଥିଲା।
