ବେଜିଂ,୪।୧୨ : ଧିରେ ଧିରେ ପଦାକୁ ଆସୁଛି ଉଇଗର ମୁସଲମାନଙ୍କ ପ୍ରତି ଚାଇନାର ଦମନକାରୀ ନୀତି। ଚାଇନାର ରି-ଏଜୁକେଶନ କ୍ୟାମ୍ପରେ ରହୁଥିବା ଉଇଗର ମୁସଲମାନଙ୍କୁ ଘୁଷୁରି ମାଂସ ଖାଇବାକୁ ବାଧ୍ୟ କରାଯାଉଛି। ତାହା ପୁଣି ପ୍ରତ୍ୟେକ ଶୁକ୍ରବାର। ମୁସଲମାନ ଧର୍ମରେ ଶୁକ୍ରବାରକୁ ଏକ ପବିତ୍ର ଦିନ ଭାବେ ଗଣନା କରାଯାଏ। ଏଣୁ ସେମାନଙ୍କ ଧର୍ମ ଭ୍ରଷ୍ଠ କରିବା ପାଇଁ ଚାଇନା କ୍ୟାମ୍ପରେ ଏଭଳି କରାଯାଉଛି। ଶିକ୍ଷା ନାମରେ ମୁସଲମାନଙ୍କ ଉପରେ ଚାଇନା ଅତ୍ୟାଚାର କରୁଛି । ଏହା ସ୍ପଷ୍ଟ କରିଛନ୍ତି ଅତ୍ୟାଚାରର ସମ୍ମୁଖୀନ ହୋଇଥିବା ସରଗୁଲ ସୋତବେ।
ପ୍ରତ୍ୟେକ ଶୁକ୍ରବାର ଆମକୁ ଘୁଷୁରି ମାଂସ ଖାଇବାକୁ ବାଧ୍ୟ କରାଯାଉଥିଲା। ସେମାନେ ଜାଣିଶୁଣି ଏହି ଦିନକୁ ବାଛି ଥିଲେ। ଯଦି କେହି ଏହାକୁ ମାନିବାକୁ ମନା କରେ, ତେବେ ତାକୁ କଠୋର ଦଣ୍ଡ ଦିଆଯାଉଥିଲା ବୋଲି ଏକ ସାକ୍ଷାତ୍କାରରେ ସୋତବେ କହିଛନ୍ତି। ନିକଟରେ ପ୍ରକାଶ ପାଇଥିବା ପୁସ୍ତକରେ ଚାଇନା କ୍ୟାମ୍ପରେ ତାଙ୍କ ସହ ହୋଇଥିବା ଅତ୍ୟାଚାର ସମ୍ପର୍କରେ ଉଲ୍ଲେଖ କରିଛନ୍ତି।
