ପାରାଦୀପ,୨୩।୧୧(ସ୍ବ.ପ୍ର.): ଡିସେମ୍ବର ୫ ନୌସେନା ଦିବସ ପାଳିତ ହେବ। ଏହା ଅବ୍ୟବହିତ ପୂର୍ବରୁ ନୌସେନା ପକ୍ଷରୁ ଦୁଇଦିନିଆ ସ୍ବାସ୍ଥ୍ୟସେବା ଶିବିର ମଙ୍ଗଳବାର ଅନୁଷ୍ଠିତ ହୋଇଯାଇଛି। ପାରାଦୀପ ବନ୍ଦରରେ ମଙ୍ଗଳବାର ଇଫ୍କୋ ବର୍ଥରେ ଲାଗିଥିବା ଆଇଏନ୍ଏସ୍ ଘଡ଼ିଆଳ ଜାହାଜରେ ଏହି ଶିବିର ଆୟୋଜନ କରାଯାଇଛି। ପାରାଦୀପ ତଥା ପାର୍ଶ୍ୱବର୍ତ୍ତୀ ଗଁାର ଲୋକଙ୍କୁ ନୌସେନା ପକ୍ଷରୁ ବନ୍ଦର ନିଷିଦ୍ଧାଞ୍ଚଳ ମଧ୍ୟକୁ ବସ୍ ଯୋଗେ ଅଣାଯାଇ ଏଠାରେ ସ୍ବାସ୍ଥ୍ୟ ପରୀକ୍ଷା କରାଯାଇଛି। ଶିବିରରେ ନୌସେନାର ୯ ଜଣ ବିଶେଷଜ୍ଞ ଡାକ୍ତର ଓ ସ୍ବାସ୍ଥ୍ୟକର୍ମୀ ଚିକିତ୍ସା କରୁଛନ୍ତି। ବିଶାଖାପାଟଣା ଓ ଚିଲିକାରେ ଥିବା ନୌସେନା ଚିକିତ୍ସାଳୟ କଲ୍ୟାଣୀ, ନିବାରିଣୀର ଡାକ୍ତର ଏଥିରେ ଯୋଗ ଦେଇଛନ୍ତି ବୋଲି ନୌସେନା ଆଡମିରାଲ ଆର. ରବି ସୂଚନା ଦେଇଛନ୍ତି। ସୂଚନାଯୋଗ୍ୟ, ଭାରତୀୟ ନୌସେନା ୧୯୭୧ ଡିସେମ୍ବର ୫ରେ ପାକିସ୍ତାନ କରାଚି ସହର ଉପରେ ଆକ୍ରମଣ କରି ଯୁଦ୍ଧ ବିଜୟ ହାସଲ କରିଥିଲା। ସେହି ସ୍ମୃତିରେ ପ୍ରତିବର୍ଷ ଡିସେମ୍ବର ୫କୁ ନୌସେନା ଦିବସ ଭାବେ ପାଳନ କରାଯାଉଛି। ଏହା ଅବବ୍ୟହିତ ପୂର୍ବରୁ ପାରାଦୀପ ତଥା ଅନ୍ୟ ରାଜ୍ୟରେ ସ୍ଥାନୀୟ ଜନସାଧାରଣଙ୍କ ପାଇଁ ସମୁଦ୍ରରେ ଦିନେ କାର୍ଯ୍ୟକ୍ରମ ଆୟୋଜନ କରାଯାଏ। ଚଳିତବର୍ଷ ଉକ୍ତ କାର୍ଯ୍ୟକ୍ରମ ବଦଳରେ ସ୍ବାସ୍ଥ୍ୟସେବା ଶିବିର ଆୟୋଜନ କରାଯାଇଛି ବୋଲି ଆଇଏନ୍ଏସ୍ ଚିଲିକା କମାଣ୍ଡିଂ ଅଫିସର ପ୍ରଦୀପ ସୂଚନା ଦେଇଛନ୍ତି। ଆଇଏନ୍ଏସ୍ ଘଡ଼ିଆଳ ଏକ ହସ୍ପିଟାଲ ସୁବିଧା ଉପଲବ୍ଧ ଜାହାଜ। ଏଥିରେ ସମସ୍ତ ପ୍ରକାର ଚିକିତ୍ସା ସୁବିଧା ରହିଛି ବୋଲି ନୌସେନା ପକ୍ଷରୁ କୁହାଯାଇଛି।
