ବ୍ରହ୍ମବରଦା,୨୯ା୧୦(ଯଯାତି କେଶରୀ ବେହେରା):ବ୍ରହ୍ମବରଦା କଲେଜ ନିକଟରେ ପ୍ରତିଷ୍ଠା ହୋଇଥିବା ୩୩/୧୧କେଭି ବିଦ୍ୟୁତ୍ ଷ୍ଟ୍ରକ୍ଚର କାମରେ ଲାଗି ପାରୁନାହିଁ। ଫଳରେ ଏହାକୁ ନେଇ ଉପଭୋକ୍ତାଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ଗତ ଜୁନ ୮ରେ ଶକ୍ତିମନ୍ତ୍ରୀ ପ୍ରତାପ କେଶରୀ ଦେବ ଏହି ଷ୍ଟ୍ରକ୍ଚରକୁ ଉଦ୍ଘାଟନ କରି ବ୍ରହ୍ମବରଦା ଓ ଏହାର ଆଖପାଖ ୧୦ରୁ ଊର୍ଦ୍ଧ୍ୱ ଗାଁର ବିଦ୍ୟୁତ୍ ଉପଭୋକ୍ତା ଲୋ-ଭୋଲଟେଜ ସମସ୍ୟାରୁ ମୁକ୍ତି ପାଇବେ ବୋଲି ପ୍ରକାଶ କରିଥିଲେ। ହେଲେ ଏହା ମଧ୍ୟରେ ୫ ମାସ ବିତିଯାଇଥିଲେ ସୁଦ୍ଧା ଷ୍ଟ୍ରକ୍ଚର କାର୍ଯ୍ୟକ୍ଷମ ହୋଇ ପାରୁନାହିଁ। ଏ ନେଇ ବିଗତ ଦିନରେ ବ୍ରହ୍ମବରଦାସ୍ଥିତ ବିଦ୍ୟୁତ୍ ଅଫିସ ସମ୍ମୁଖରେ ବ୍ରହ୍ମବରଦା, ଚାନ୍ଦପୁର ଓ ମହେଶ୍ୱରପୁରର ଶତାଧିକ ଉପଭୋକ୍ତା ଗଣଧାରଣା ଦେଇଥିଲେ।
ତେବେ ଷ୍ଟ୍ରକ୍ଚରର ଆର୍ଥିଙ୍ଗଗୁଡ଼ିକ ଆଇ୍ଏସ୍ଆଇ ଷ୍ଟଣ୍ଡାର୍ଡ ହିସାବରେ କାମ ହୋଇ ନ ଥିବା, ପ୍ରୋଟେକ୍ସନ ସିଷ୍ଟମ ଠିକରେ ହୋଇ ନ ଥିବା ଓ ୩ ଫିଡର ମଧ୍ୟରୁ ଗୋଟିଏ ଫିଡରର କିଛି ତ୍ରୁଟି ଥିବା କୁଆଖିଆ ବିଦ୍ୟୁତ୍ ଡିଭିଜନର କାର୍ଯ୍ୟନିର୍ବାହୀ ଯନ୍ତ୍ରୀ ଆଲୋକ କୁମାର ଦାଶ ଆନ୍ଦୋଳନକାରୀଙ୍କୁ କହିଥିଲେ। ଏଥିସହିତ ବାକି ଦୁଇ ଫିଡରକୁ ଶୀଘ୍ର କାର୍ଯ୍ୟକ୍ଷମ କରାଯିବ ବୋଲି ପ୍ରକାଶ କରିଥିଲେ। ହେଲେ ତାଙ୍କ କଥା ମଧ୍ୟ କାର୍ଯ୍ୟକାରୀ ହୋଇ ପାରିନାହିଁ ବୋଲି ଉପଭୋକ୍ତା ଅଭିଯୋଗ କରିଛନ୍ତି। ତେଣୁ ଷ୍ଟ୍ରକ୍ଚରକୁ ଶୀଘ୍ର କାର୍ଯକ୍ଷମ କରା ନ ଗଲେ ଆଗାମୀ ଦିନରେ ଉପଭୋକ୍ତା ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
