ବାଲିମେଳା,୨୩ା୭(ଶିବଦତ୍ତ ସାହୁ)ଦୀର୍ଘ ବର୍ଷ ଧରି ନବୀକରଣ ହେଉନାହିଁ ଓଜନ ମାପ ବଟକରା। ଗୋଟିଏ ପଟେ ଓଜନରେ ଠକେଇ ସହ ଅନ୍ୟପଟେ ଚଢ଼ା ଦରରେ ପନିପରିବା, ମାଛ, ମାଂସ ଓ ଅନ୍ୟାନ୍ୟ ଜରୁରିକାଳୀନ ସାମଗ୍ରୀ କିଣିବାରେ ବହୁ କଷ୍ଟ ସହିବାକୁ ପଡୁଛି ଗ୍ରାହକଙ୍କୁ । ଏଭଳି ଦେଖିବାକୁ ମିଳିଛି ମାଲକାନଗିରି ଜିଲା ବାଲିମେଳା ସହର ସମେତ କୋରୁକୋଣ୍ଡା ବ୍ଲକ ତାର୍ଲ୍ଲାକୋଟା, ସଦର କୋରୁକୋଣ୍ଡା, କାମ୍ବେଡା ସମେତ ବିଭିନ୍ନ ଅଞ୍ଚଳରେ ଥିବା ବଜାର ଓ ସାପ୍ତାହିକ ହାଟରେ ।
ସୂଚନାଯୋଗ୍ୟ, ଉପରୋକ୍ତ ଅଞ୍ଚଳରେ ପନିପରିବା, ମାଛ ମାଂସ ସହ ଆବଶ୍ୟକ ସାମଗ୍ରୀର ଓଜନରେ ବ୍ୟାପକ ଠକେଇ ହେଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ବର୍ଷ ବର୍ଷ ଧରି ଅନେକ ଦୋକାନୀ ବଟକରା ନବୀକରଣ ନ କରି ପୁରୁଣାରେ ଓଜନ କରି ବ୍ୟବସାୟ କରୁଛନ୍ତି । ଏହାକୁ ନେଇ ଗ୍ରାହକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ବର୍ତ୍ତମାନ ବଜାରରେ ପରିବା ଦର ପ୍ରାୟତଃ ୮୦ ରୁ ୧୨୦ ଟଙ୍କା ରହିଛି। ମାଛ ୨୦୦ ରୁ ୩୦୦ ଟଙ୍କା ପର୍ଯ୍ୟନ୍ତ ରହିଛି । ସେହିପରି ଦେଶୀ ଗୋଟା କୁକୁଡ଼ା କିଲୋ ପିଛା ୪୦୦-୫୦୦ଟଙ୍କା ଦର ରହିଥିବା ବେଳେ ଛେଳି ମାଂସ ୬୫୦ରୁ ୭୦୦ ଟଙ୍କା, ବ୍ରଏଲର କୁକୁଡ଼ା ୨୪୦ ଟଙ୍କାରେ ବିକ୍ରି ହେଉଛି। ଖାଲି ଏତିକି ନୁହେଁ, କେତେଜଣ ବ୍ୟବସାୟୀ ଅତ୍ୟାବଶ୍ୟକ ସାମଗ୍ରୀକୁ ଚଢ଼ା ଦରରେ ବିକ୍ରି କରୁଛିନ୍ତି । ପୁରୁଣା ବଟକରାରେ ପ୍ରତିଦିନ ଜିନିଷ କିଣାବିକା କରାଯାଉଛି। ଫଳର ଗ୍ରାହକମାନେ ସବୁବେଳେ ଓଜନରେ ଠକାମିର ଶିକାର ହେଉଥିବା ଅଭିଯୋଗ କରୁଛନ୍ତି। ଏ ଦିଗରେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବାରୁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଓଜନ ଓ ମାପ ବିଭାଗ ପକ୍ଷରୁ ବଟକରା ନବୀକରଣ କରାଯିବା କଥା, କିନ୍ତୁ ପ୍ରାୟ ୨/୩ବର୍ଷ ହେବ ଏହି ସମସ୍ତ ଅଞ୍ଚଳରେ ଆଦୌ ବଟକରା ନବୀକରଣ କରାଯାଇ ନାହିଁ ବୋଲି ଅଭିଯୋଗ ହେଉଛି। ଓଜନ ଓ ମାପ ବିଭାଗର ବିଭାଗୀୟ ଅଧିକାରୀଙ୍କ ସହ ଯୋଗାଯୋଗ ହୋଇ ନ ପାରିବାରୁ ତାଙ୍କର କୌଣସି ପ୍ରତିକ୍ରିୟା ମିଳିପାରିନାହିଁ।
