ଅହମଦାବାଦ,୧୨।୧୨ : ନାଦିୟାଦ ମ୍ୟୁନିସିପାଲ କର୍ପୋରେଶନର କାଞ୍ଜିଆ ହଦାରେ ରଖାଯାଇଥିବା ୩୦ ବୁଲା ଗୋରୁଙ୍କ ମୃତ୍ୟୁକୁ ନେଇ ଗୁଜରାଟ ହାଇକୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି। ଜଷ୍ଟିସ ଆଶୁତୋଷ ଶାସ୍ତ୍ରୀ ଏବଂ ଜଷ୍ଟିସ ହେମନ୍ତ ପ୍ରଚ୍ଛକଙ୍କ ଡିଭିଜନ ବେଞ୍ଚ କହିଛନ୍ତି ଜନସାଧାରଣଙ୍କ ସୁବିଧା ପାଇଁ ନିରୀହ ପ୍ରାଣୀମାନଙ୍କୁ ବଳି ଦିଆଯାଇପାରିବ ନାହିଁ। ବେଞ୍ଚ କହିଛନ୍ତି ନାଦିୟାଦ ମ୍ୟୁନିସିପାଲିଟି କର୍ପୋରେଶନର ଖୋଲା ଜମିରେ ପକାଯାଇଥିବା ମୃତ ଗାଈଙ୍କର ଫଟୋ ମନକୁ ବିଚଳିତ କରୁଛି। ଏ ବାବଦରେ ବେଞ୍ଚ ଜିଲା କଲେକ୍ଟରଙ୍କଠାରୁ ରିପୋର୍ଟ ମାଗିଛନ୍ତି।
ସୂଚନାଯୋଗ୍ୟ, ନାଦିୟାଦ ବାସିନ୍ଦା ମୌଲିକ ଶ୍ରୀମାଲିଙ୍କ ଦ୍ୱାରା ଦାଖଲ ହୋଇଥିବା ଏକ ଜନସ୍ବାର୍ଥ ମାମଲାର କୋର୍ଟରେ ଶୁଣାଣି ହୋଇଥିଲା। ଅଦାଲତଙ୍କର ନିlର୍ଦ୍ଦେଶର ଅବମାନନା କରି ଗାଈଗୋରୁ ସମ୍ମୁଖୀନ ହେଉଥିବା ସମସ୍ୟାକୁ ରୋକିବା ପାଇଁ ଆବେଦନରେ ନିର୍ଦ୍ଦେଶ ଲୋଡାଯାଇଥିଲା।
ରେକର୍ଡରେ ଏହି ଆଫିଡେଭିଟ ଗ୍ରହଣ କରି ଜଷ୍ଟିସ ଶାସ୍ତ୍ରୀ କହିଛନ୍ତି ଏହା ଅତ୍ୟନ୍ତ ବିବ୍ରତକାରୀ ମାମଲା। ଆମେ ଅନୁଭବ କରୁଛୁ ଏହି ନିରୀହ ପ୍ରାଣୀମାନଙ୍କୁ କୌଣସି ସରକାରୀ ନୀତି ନିୟନ୍ତ୍ରଣ ଏବଂ କାର୍ଯ୍ୟକାରୀ କରିବା ନାମରେ ବଳି ଦିଆଯାଇପାରିବ ନାହିଁ। ମଣିଷର ଆରାମ ପାଇଁ ଆମେ ଏପରି ଜିନିଷକୁ ଅନୁମତି ଦେଇ ପାରିବୁ ନାହିଁ। ଯଦି ଏହା ଘଟୁଛି, ତେବେ ଭଗବାନ ମଧ୍ୟ ଆମକୁ କ୍ଷମା କରିବେ ନାହିଁ। ନିରୀହ ପ୍ରାଣୀମାନଙ୍କର ଏହିପରି ବିନାଶ କରାଯାଇପାରିବ ନାହିଁ। ଜନସାଧାରଣଙ୍କ ସୁବିଧା ପାଇଁ ଗୋଟିଏ ବି ନିରୀହ ପଶୁକୁ ବଳି ଦିଆଯିବ ନାହିଁ। ଏହା କିଛି ଷଡଯନ୍ତ୍ରର ଅଂଶ ହୋଇପାରେ ।
ଏହି ଘଟଣାର ଅନୁସନ୍ଧାନ ଏବଂ ରିପୋର୍ଟ ଦାଖଲ କରିବାକୁ ବେଞ୍ଚ ଜିଲା କଲେକ୍ଟରଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ରିପୋର୍ଟରେ,ବୁଲା ଗୋରୁମାନଙ୍କ ପାଇଁ ନିର୍ମିତ କାଞ୍ଜିଆ ହଦା ଏବଂ ସେଠାରେ ରଖାଯାଇଥିବା ପ୍ରାଣୀମାନଙ୍କୁ ଦିଆଯାଉଥିବା ଚିକିତ୍ସା ବିଷୟରେ ସବିଶେଷ ତଥ୍ୟ ଦେବାକୁ ନିର୍ଦ୍ଦେଶ ଦିଆଯାଇଛି।
ଏହା ବ୍ୟତୀତ ରାଜ୍ୟରେ ସରକାରୀ ପୃଷ୍ଠପୋଷକତାରେ ପରିଚାଳିତ କାଞ୍ଜିଆ ହଦା ସଂଖ୍ୟା ମଧ୍ୟ ସରକାରଙ୍କ ନିକଟରୁ ମାଗିଛନ୍ତି। ଏହା ସହିତ ଉପଯୁକ୍ତ ପଦକ୍ଷେପ ନେଇ ସରକାରୀ ନୀତି କାର୍ଯ୍ୟକାରୀ କରିବାକୁ ବେଞ୍ଚ ନିର୍ଦ୍ଦେଶ ଦେଇଛନ୍ତି। ତେବେ ଆଇନ ଅନୁଯାୟୀ ଏଭଳି ପରିସ୍ଥିତିର ମଧ୍ୟ ଯତ୍ନ ନିଆଯିବା ଉଚିତ ବୋଲି କୁହାଯାଇଛି।
ଏହାପୂର୍ବରୁ ରାଜ୍ୟ ସରକାର କୋର୍ଟଙ୍କୁ କହିଥିଲେ ଆଠଟି ମ୍ୟୁନିସିପାଲିଟି କର୍ପୋରେଶନ ଏବଂ ୧୫୭ ମ୍ୟୁନିସିପାଲିଟି ଅଞ୍ଚଳରେ ବୁଲା ଗୋରୁଙ୍କ ଦ୍ୱାରା ହେଉଥିବା ସମସ୍ୟାକୁ ରୋକିବା ପାଇଁ ନିର୍ଦ୍ଦେଶନାମା ପ୍ରସ୍ତୁତ କରି ୨୧ ଅଗଷ୍ଟ ୨୦୨୩ ରେ ଏକ ସର୍କୁଲାର ଜାରି କରାଯାଇଛି। ଏଥିସହ ସମସ୍ତ ସହରୀ ସଂସ୍ଥା ଏହାକୁ ଅନୁସରଣ କରିବାକୁ ନିର୍ଦ୍ଦେଶ ଦିଆଯାଇଥିଲା।
ବ୍ୟକ୍ତିଗତ ଏବଂ ବ୍ୟବସାୟିକ ସ୍ବାର୍ଥ ପାଇଁ ବାଧ୍ୟତାମୂଳକ ଅନୁମତି ଏବଂ ଲାଇସେନ୍ସ ପାଇବା, ଗୋରୁମାନଙ୍କୁ ରେଡିଓ ଫ୍ରିକ୍ୱେନ୍ସି ପରିଚୟ (ଆରଏଫଆଇଡି) ଚିପ୍ସ ସହିତ ଟ୍ୟାଗ କରିବା ପାଇଁ ଏହି ନିର୍ଦ୍ଦେଶାବଳୀରେ ନିର୍ଦ୍ଦେଶନାମା ଅନ୍ତର୍ଭୁକ୍ତ। ଏହା ମଧ୍ୟ କୁହାଯାଇଥିଲା, ଅନୁପାଳନ ନ କରିବା କ୍ଷେତ୍ରରେ ବୁଲା ଗୋରୁଙ୍କୁ ଜବତ କରିବା ଏବଂ ମାଲିକଙ୍କ ଉପରେ ଜରିମାନା ଆଦାୟ କରିବା ଅନ୍ତର୍ଭୁକ୍ତ । ଏହା ବ୍ୟତୀତ ରାସ୍ତା ଏବଂ ରାସ୍ତା କଡ଼ରେ ‘ନୋ କ୍ୟାଟେଲ ଜୋନ’ ନିର୍ମାଣ ଏବଂ କାଞ୍ଜିଆ ହଦା ନିର୍ମାଣ ମଧ୍ୟ ଅନ୍ତର୍ଭୁକ୍ତ ହୋଇଛି।
