ସିଡ୍ନୀ, ୧୫।୧୨(ପି.ଟି.): ଭାରତ ବିପକ୍ଷ ଦିବାରାତ୍ର ପ୍ରଥମ କ୍ରିକେଟ ଟେଷ୍ଟ ପୂର୍ବରୁ ଅଷ୍ଟ୍ରେଲିଆ ଦଳରେ ଆହତ ସମସ୍ୟା ବଢ଼ିବାରେ ଲାଗିଛି। ଏବେ ଏହି ତାଲିକାରେ ସାମିଲ ହୋଇଛନ୍ତି ଦ୍ରୁତ ବୋଲର ସିଅନ ଆବୋଟ। ଦ୍ୱିତୀୟ ଓ୍ବାର୍ମଅପ୍ ଗେମ୍ ଅବସରରେ ଗୋଡ଼ ପୁଟିଆ ମାଂସପେଶୀ ଟାଣି ଧରିବା ଯୋଗୁ ସେ ପ୍ରଥମ ଟେଷ୍ଟରୁ ଓହରି ଯାଇଛନ୍ତି। ତାଙ୍କ ସ୍ଥାନରେ ଅଲରାଉଣ୍ଡର ମୋଇସେସ ହେନରିକ୍ସଙ୍କୁ ସୋମବାର ଦଳରେ ସାମିଲ କରାଯାଇଥିବା କ୍ରିକେଟ ଅଷ୍ଟ୍ରେଲିଆ ପକ୍ଷରୁ ସୂଚନା ଦିଆଯାଇଛି। ହାମ୍ଷ୍ଟ୍ରିଙ୍ଗ ଇଞ୍ଜୁରି ଯୋଗୁ ଦ୍ୱିତୀୟ ଓ୍ବାର୍ମଅପ୍ ମ୍ୟାଚରେ ଖେଳିପାରି ନ ଥିବା ହେନରିକ୍ସ ଏବେ ଫିଟ୍ନେସ ଟେଷ୍ଟରେ ଉତ୍ତୀର୍ଣ୍ଣ ହୋଇଛନ୍ତି। ଦୀର୍ଘ ୪ ବର୍ଷ ବ୍ୟବଧାନରେ ସେ ଟେଷ୍ଟ ଦଳରେ ସାମିଲ ହୋଇଛନ୍ତି। ଭାରତ-ଅଷ୍ଟ୍ରେଲିଆ ପ୍ରଥମ ଟେଷ୍ଟ ଚଳିତ ମାସ ୧୭ ତାରିଖରୁ ଆଡିଲେଡରେ ଆରମ୍ଭ ହେବ। ଡିସେମ୍ବର ୨୬ରୁ ଆରମ୍ଭ ହେବାକୁଥିବା ଦ୍ୱିତୀୟ ଟେଷ୍ଟ ବେଳକୁ ଆବୋଟ ଫିଟ୍ ହୋଇଥିବେ ବୋଲି ଆଶା ରଖାଯାଇଛି। ହେନରିକ୍ସ ଶେଷ ଥରପାଇଁ ୪ ବର୍ଷ ପୂର୍ବେ ଶ୍ରୀଲଙ୍କାରେ ଟେଷ୍ଟ ମ୍ୟାଚ ଖେଳିଥିଲେ। ଏହାର ୩ ବର୍ଷ ପରେ ସେ ଜାତୀୟ ଦଳକୁ ଫେରି ଭାରତ ବିପକ୍ଷରେ ସୀମିତ ଓଭର କ୍ରିକେଟ ସିରିଜ ଖେଳିଥିଲେ। ମାର୍କୁସ ହାରିସଙ୍କ ପରେ ଦ୍ୱିତୀୟ ଖେଳାଳିଭାବେ ହେନରିକ୍ସ ବିଳମ୍ବରେ ଅଷ୍ଟ୍ରେଲିଆ ଟେଷ୍ଟ ଦଳରେ ସାମିଲ ହୋଇଛନ୍ତି। ଡେଭିଡ ଓ୍ବାର୍ନର ଓ ଓ୍ବିଲ୍ ପୁକୋଭସ୍କି ଆହତ ହେବାପରେ ହାରିସଙ୍କୁ ଓପନିଂ ସ୍ଲଟ୍ ପାଇଁ ଟେଷ୍ଟ ଦଳରେ ନିଆ ଯାଇଛି। ସେହିପରି କାମେରନ ଗ୍ରୀନ୍ ଓ ହ୍ୟାରୀ କନ୍ଓ୍ବେ କନକସନ(ମୁଣ୍ଡରେ ବଲ୍ ବାଜିବା)ରେ ପୀଡ଼ିତ ଅଛନ୍ତି। ଜ୍ୟାକସନ ବାର୍ଡ ମଧ୍ୟ ଆହତ ହୋଇଛନ୍ତି। ଅନ୍ୟମାନଙ୍କ ମଧ୍ୟରେ ମାର୍କୁସ ଷ୍ଟୋଇନ୍ସ, ଆଷ୍ଟନ ଅଗର ମଧ୍ୟ ଏହି ତାଲିକାରେ ଅଛନ୍ତି। ମିଚେଲ ଷ୍ଟାର୍କ ଓ ଜୋଶ୍ ହାଜେଲ୍ଉଡ ସାମାନ୍ୟ ଆହତ ହୋଇଛନ୍ତି।
