ଭୁବନେଶ୍ୱର,୨୭ା୧୧(ଅନିଲ ଦାସ): ୨୦୨୩ରେ ଏକ ମାମଲାର ଶୁଣାଣି ବେଳେ କେନ୍ଦ୍ର ଓ ରାଜ୍ୟଗୁଡ଼ିକର ସୂଚନା କମିଶନରେ ଖାଲି ପଡ଼ିଥିବା ପଦବୀ ପୂରଣରେ ବିଫଳତାକୁ ନେଇ ସୁପ୍ରିମକୋର୍ଟ ଅସନ୍ତୋଷ ବ୍ୟକ୍ତ କରିଥିଲେ। ସୂଚନା କମିଶନର ପଦବୀ ପୂରଣ କରିବାରେ ରାଜ୍ୟଗୁଡ଼ିକର ଅକ୍ଷମତା ହେତୁ ସୂଚନା ଅଧିକାର (ଆର୍ଟିଆଇ) ଆଇନ, ୨୦୦୫ର ଲକ୍ଷ୍ୟ ଓ ଉଦ୍ଦେଶ୍ୟ ପୂରଣ ହୋଇପାରୁନାହିଁ। ଏଥିଯୋଗୁ ଲୋକଙ୍କ ସୂଚନା ପାଇବା ଅଧିକାର ପ୍ରଭାବିତ ହେଉଛି। ଖାଲି ପଦବୀ ପୂରଣ ନ ହେଲେ ଆର୍ଟିଆଇ ଏକ ‘ମୃତପତ୍ର’ରେ ପରିଣତ ହୋଇଯିବ ବୋଲି ଶୀର୍ଷ ଅଦାଲତ ସତର୍କ କରାଇଥିଲେ। ସୁପ୍ରିମକୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ କେନ୍ଦ୍ରୀୟ ସୂଚନା କମିଶନ (ସିଆଇସି) ଏବଂ ରାଜ୍ୟ ସୂଚନା କମିଶନ (ଏସ୍ଆଇସି)ରେ ଅନେକ ପଦବୀ ଖାଲି ପଡ଼ିଛି। ୪ ସପ୍ତାହ ମଧ୍ୟରେ ଏହି ପଦବୀଗୁଡ଼ିକୁ ପୂରଣ କରିବାକୁ ମଙ୍ଗଳବାର ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି।
ଓଡ଼ିଶାରେ ମୁଖ୍ୟ ସୂଚନା କମିଶନରଙ୍କୁ ଛାଡ଼ି ୫ ସୂଚନା କମିଶନର ନିଯୁକ୍ତି ପାଇପାରିବେ ବୋଲି ବ୍ୟବସ୍ଥା ରହିଛି। ହେଲେ ଏବେ ମାତ୍ର ଦୁଇ ଜଣ ସୂଚନା କମିଶନର ଅଛନ୍ତି। ଅର୍ଥାତ୍ ମୁଖ୍ୟ ସୂଚନା କମିଶନର ଓ ୩ ସୂଚନା କମିଶନର ପଦବୀ ଖାଲି ପଡ଼ିଛି। ମୁଖ୍ୟ ସୂଚନା କମିଶନର ଜଳଦ ତ୍ରିପାଠୀଙ୍କ ଅବସର ପରେ ସେହି ପଦବୀ ଖାଲି ପଡ଼ିଛି।
