ଜେରୁଜେଲମ,୧୭।୧୦: ଇସ୍ରାଏଲ ଉପରେ ହମାସର ଆକ୍ରମଣ ପରେ ଉଭୟ ପକ୍ଷ ମଧ୍ୟରେ ବିବାଦ ଜାରି ରହିଛି। ଗାଜା ଷ୍ଟ୍ରିପର ବିଭିନ୍ନ ସ୍ଥାନରୁ ଇସ୍ରାଏଲ ଉପରେ ରକେଟ ଆକ୍ରମଣ ଜାରି ରହିଥିବାବେଳେ ଇସ୍ରାଏଲ ବାୟୁସେନା ସମଗ୍ର ଅଞ୍ଚଳରେ ଏୟାର ଷ୍ଟ୍ରାଇକ ଜାରି ରଖିଛି। ଏହି ଯୁଦ୍ଧରେ ଏପର୍ଯ୍ୟନ୍ତ ଉଭୟ ପକ୍ଷରୁ ୪୦୦୦ ରୁ ଅଧିକ ଲୋକଙ୍କ ମୃତ୍ୟୁ ଘଟିଛି। ଏହି ସମୟରେ, ଇସ୍ରାଏଲ ବର୍ତ୍ତମାନ ଲେବାନନରୁ ରହି ରହି ଆକ୍ରମଣ କରୁଥିବା ହିଜବୁଲ ସଂଗଠନ ଉପରେ ଆକ୍ରମଣ ଆରମ୍ଭ କରିଛି। ଇସ୍ରାଏଲର ସେନା କହିଛି ଏହା ହିଜବୁଲ ଆତଙ୍କବାଦୀଙ୍କ ଶିବିରକୁ ଟାର୍ଗେଟ କରୁଛି।
ହମାସ ସହିତ ଚାଲିଥିବା ବିବାଦ ମଧ୍ୟରେ ଲେବାନନ କହିଛି ଇସ୍ରାଏଲ ସୀମାରେ ଉତ୍ତେଜନା ବନ୍ଦ କରିବା ଉଚିତ। ଲେବାନନର ବୈଦେଶିକ ମନ୍ତ୍ରୀ ବୋ ହବିବ କହିଛନ୍ତି ଲେବାନନ-ଇସ୍ରାଏଲ ସୀମାରେ ଉତ୍ତେଜନାକୁ ବନ୍ଦ କରିବା ଉଚିତ। ଇସ୍ରାଏଲ ନିଆଁରେ ତେଲ ପକାଉଛି। ରିପୋର୍ଟ ଅନୁଯାୟୀ ତୁର୍କୀ ପ୍ରତିପକ୍ଷ ହାକାନ ଫିଦାନଙ୍କ ସହ ଏକ ଗଣମାଧ୍ୟମ ସମ୍ମିଳନୀରେ ଲେବାନନ ବୈଦେଶିକ ମନ୍ତ୍ରୀ କହିଛନ୍ତି ଆମେ ଯୁଦ୍ଧ ସମର୍ଥକ ନୁହଁ। ଆମେ ପ୍ରକୃତରେ ଏହି ଅଞ୍ଚଳରେ ଶାନ୍ତି ଚାହୁଁଛୁ।
ଇସ୍ରାଏଲ ସେନା ଦାବି କରିଛି ଲେବାନନରୁ ଅନୁପ୍ରବେଶ କରିବାକୁ ଚେଷ୍ଟା କରୁଥିବା ଚାରିଜଣଙ୍କୁ ଗୁଳି କରି ହତ୍ୟା କରାଯାଇଛି। ସେନା ଦାବି କରିଛି ଏହି ଲୋକମାନେ ଇସ୍ରାଏଲ ସୀମାରେ ବିସ୍ଫୋରଣ କରିବାକୁ ଚେଷ୍ଟା କରୁଥିଲେ। ଏହି ସମୟରେ ଗୁଳି ବିନିମୟରେ ୪ ଜଣଙ୍କର ମୃତ୍ୟୁ ଘଟିଛି।
