ଇସଲାମାବାଦ,୨୦।୩ : ପାକିସ୍ତାନର ବାଲୁଚିସ୍ତାନର ନାସିରାବାଦ ଜିଲାରେ ଗୁଳିକାଣ୍ଡ ଘଟଣା ସାମ୍ନାକୁ ଆସିଛି। ଅଜ୍ଞାତ ଆକ୍ରମଣକାରୀମାନେ ବରଯାତ୍ରୀଙ୍କୁ ନେଇ ଯାଉଥିବା ଗାଡ଼ି ଉପରେ ଗୁଳି ଚାଳନା କରିଛନ୍ତି। ଏହି ଘଟଣାରେ ୪ ଜଣଙ୍କର ମୃତ୍ୟୁ ହୋଇଥିବାବେଳେ ୧୨ ଜଣ ଗୁରୁତର ଆହତ ହୋଇଛନ୍ତି।
ପୋଲିସର ସୂଚନାନୁସାରେ, ଶିଶୁ ଏବଂ ମହିଳାଙ୍କ ସମେତ ପ୍ରାୟ ୨୦ ଜଣ ଲୋକ ଗାନ୍ଧୱା ଯାଉଥିଲେ, କିନ୍ତୁ ସେମାନେ ସୋହେର ଲେଭିଜ ପୋଷ୍ଟରେ ପହଞ୍ଚିବା ପରେ କିଛି ଅଜ୍ଞାତ ବ୍ୟକ୍ତି ମୋଟରସାଇକେଲରେ ଆସି ଗାଡ଼ି ଉପରେ ଗୁଳିମାଡ଼ କରିଥିଲେ।
ଏହି ମାମଲା ସମ୍ପର୍କରେ ସୂଚନା ଦେଇ ଜାଲ ମାଗାସୀଙ୍କ ଡେପୁଟି କମିଶନର କହିଛନ୍ତି ଯେ ଏହି ଘଟଣାରେ ଜଣେ ମହିଳାଙ୍କ ସମେତ ଚାରି ଜଣଙ୍କର ମୃତ୍ୟୁ ଘଟିଛି।
ଆହତମାନଙ୍କୁ ଚିକିତ୍ସା ପାଇଁ ଗାନ୍ଧୱା ଜିଲା ଡାକ୍ତରଖାନାରେ ଭର୍ତ୍ତି କରାଯାଇଛି। ଏହି ଆକ୍ରମଣ ପଛର କାରଣ ଜାଣିବାକୁ ପୋଲିସ ଚେଷ୍ଟା କରୁଛି, କିନ୍ତୁ ଏପର୍ଯ୍ୟନ୍ତ କୌଣସି ସୂଚନା ମିଳିନାହିଁ।
ଅଧିକାରୀମାନେ ଘଟଣାର ଅନୁସନ୍ଧାନ କରୁଛନ୍ତି ଏବଂ ଆକ୍ରମଣକାରୀଙ୍କୁ ଖୋଜିବା ପାଇଁ ଫୋର୍ସ ଦ୍ୱାରା ସର୍ଚ୍ଚ ଅପରେଶନ ଆରମ୍ଭ କରାଯାଇଛି। ଏହି ସମୟରେ ବାଲୁଚିସ୍ତାନର ମୁଖ୍ୟମନ୍ତ୍ରୀ ଅବଦୁଲ କୁଡୁସ ବିଜେଞ୍ଜୋ ଏହି ଘଟଣା ସମ୍ପର୍କରେ ଡେପୁଟି କମିଶନରଙ୍କଠାରୁ ରିପୋର୍ଟ ମାଗିଛନ୍ତି। ଅପରାଧୀଙ୍କୁ ତୁରନ୍ତ ଗିରଫ କରିବା ଏବଂ ଆହତମାନଙ୍କୁ ସମସ୍ତ ଚିକିତ୍ସା ଯୋଗାଇଦେବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
