ଭୁବନେଶ୍ୱର, ୮।୨(ତପନ ସ୍ବାଇଁ): କଳିଙ୍ଗ ଷ୍ଟାଡିୟମରେ ଚାଲିଥିବା ଏଫ୍ଆଇଏଚ୍ ମହିଳା ହକି ପ୍ରୋ ଲିଗ୍ରେ ଭାରତର ଲଜ୍ଜାଜନକ ପ୍ରଦର୍ଶନ ଅବ୍ୟାହତ ରହିଛି। କ୍ରମାଗତ ୩ ମ୍ୟାଚ ହାରି ଘରୋଇ ଦଳ ପରାଜୟରେ ହ୍ୟାଟ୍ରିକ କରିଛି। ଫଳରେ ୯ ଦଳ ବିଶିଷ୍ଟ ପଏଣ୍ଟ ଟେବୁଲରେ ୮ ନମ୍ବର ସ୍ଥାନରେ ରହିଛି। ପ୍ରଥମ ଦୁଇ ମ୍ୟାଚରେ ଯଥାକ୍ରମେ ଚାଇନାଠାରୁ ୧-୨ ଓ ନେଦରଲାଣ୍ଡ୍ସଠାରୁ ୧-୩ରେ ହାରିଥିବା ଭାରତୀୟ ଦଳ ବୁଧବାର ତୃତୀୟ ଗେମ୍ରେ ଅଷ୍ଟ୍ରେଲିଆଠାରୁ ୦-୩ ଗୋଲରେ ପରାଜିତ ହୋଇଛି। ପେନାଲ୍ଟି କର୍ନରକୁ ଗୋଲରେ ପରିଣତ କରି ନ ପାରିବାର ବିଫଳତା, ଆକ୍ରମଣାତ୍ମକ ମନୋଭାବର ଅଭାବ ଦଳପାଇଁ ମହଙ୍ଗା ପଡ଼ିଛି। କୋଚ୍ ଜାନେକ ସ୍କୁପମାନ ଖେଳାଳିଙ୍କ ମନରେ ଆତ୍ମବିଶ୍ୱାସ ସୃଷ୍ଟି କରିବାରେ ବିଫଳ ହୋଇଥିବା ମଧ୍ୟ ଅନୁଭବ ହୋଇଛି। ଫଳରେ ୩ଟି ଯାକ ଗେମ୍ରେ ପ୍ରତିପକ୍ଷ ଦଳଠାରୁ ନିକୃଷ୍ଟ ପ୍ରଦର୍ଶନ କରି ପଛରେ ପଡ଼ି ଯାଇଛି। ଅଷ୍ଟ୍ରେଲିଆ ପକ୍ଷରୁ ଷ୍ଟିଓ୍ବାର୍ଟ ଗ୍ରେସ୍ ୧୯ତମ ମିନିଟରେ ଫିଲ୍ଡ ଗୋଲ ଦେଇଥିବାବେଳେ ୨୩ତମ ମିନିଟରେ ଷ୍ଟିଓ୍ବାର୍ଟ ଟାଟୁମ ପେନାଲ୍ଟି କର୍ନରରୁ ଦ୍ୱିତୀୟ ଗୋଲଟି ସ୍କୋର କରିଥିଲେ। ୫୫ତମ ମିନିଟରେ ଫିଲ୍ଡ ଗୋଲ ମାଧ୍ୟମରେ ଏହାକୁ ୩-୦ରେ ପରିଣତ କରିଥିଲେ ନବ୍ସ କେଟଲିନ। ଭାରତ ୫ଟି ପେନାଲ୍ଟି କର୍ନର ପାଇଥିଲେ ହେଁ ଏଥିରୁ ଗୋଟିଏ ହେଲେ ଗୋଲ ଦେଇପାରି ନ ଥିଲା। ଅଣଖେଳୁଆଡ଼ ମନୋଭାବ ପାଇଁ ଭାରତର ସାଲିମା ଟେଟେ ଓ ସଙ୍ଗୀତା କୁମାରୀ ଗ୍ରୀନ୍ କାର୍ଡ ପାଇଥିଲେ। ସେହିପରି ଅଷ୍ଟ୍ରେଲିଆର ଆମି ଲଟନ ଓ କେର୍ଶ ଷ୍ଟିଫାନିଙ୍କୁ ଗ୍ରୀନ୍ ଏବଂ ଶାଣ୍ଡ ହାଟି ଓ ଡେଲ ଡୋଲକେନ୍ସଙ୍କୁ ୟେଲୋ କାର୍ଡ ଦେଇଥିଲେ ଅମ୍ପାୟର। କଳିଙ୍ଗରେ ଭାରତ ଏହାର ଶେଷ ଲିଗ୍ମ୍ୟାଚ ୯ ତାରିଖରେ ଆମେରିକା ବିପକ୍ଷରେ ଖେଳିବ।
