ଅହମଦାବାଦ,୨୦।୩: ଟେଷ୍ଟ ପରେ ଟି୨୦ ସିରିଜରେ ମଧ୍ୟ ଭାରତ ତା’ର ଦମ୍ ଦେଖାଇଛି। ଇଂଲଣ୍ଡ ବିପକ୍ଷ ଟି୨୦ ସିରିଜରେ ଘରୋଇ ଭାରତ ବିଜୟ ହାସଲ କରିଛି। ପରାଜୟରୁ ଅଭିଯାନ ଆରମ୍ଭ କରିଥିଲେ ମଧ୍ୟ ଭାରତ ଦୃଢ଼ ପ୍ରତ୍ୟାବର୍ତ୍ତନ କରି ଶେଷରେ ବାଜିମାରିଛି। ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଶନିବାର ଖେଳାଯାଇଥିବା ପଞ୍ଚମ ତଥା ଅନ୍ତିମ ଟି୨୦ ମ୍ୟାଚ୍ରେ ଭାରତ ୩୬ ରନରେ ଇଂଲଣ୍ଡକୁ ହରାଇଛି। ଭାରତ ୩-୨ ବ୍ୟବଧାନରେ ସିରିଜ ହାତେଇଛି। ଏଥିସହିତ ୨ ବର୍ଷ ହେବ ଅପରାଜେୟ ରହିଥିବା ଭାରତ କ୍ରମାଗତ ଷଷ୍ଠ ଟି୨୦ ସିରିଜ ଜିତିଛି। ଅପରପକ୍ଷରେ ଇଂଲଣ୍ଡ ଗତ ୯ ବର୍ଷ ମଧ୍ୟରେ ଭାରତ ମାଟିରେ କୌଣସି ଦ୍ୱିପାକ୍ଷିକ ସିରିଜ ଜିତିବାକୁ ସକ୍ଷମ ହୋଇନାହିଁ। ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଭାରତ ୨୦ ଓଭରରେ ୨ ଉଇକେଟ ହରାଇ ୨୨୪ ରନ ସଂଗ୍ରହ କରିଥିଲା। ଜବାବରେ ଇଂଲଣ୍ଡ ୨୦ ଓଭରରେ ୮ ଉଇକେଟ ହରାଇ ୧୮୮ ରନରେ ସୀମିତ ରହି ପରାସ୍ତ ହୋଇଛି। ପୁଣେରେ ୨୩ ତାରିଖରୁ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ ଆରମ୍ଭ ହେବ।
୨୨୫ ରନ କଷ୍ଟକର ଟାର୍ଗେଟର ପିଛା କରି ଇଂଲଣ୍ଡ ବିନା ସ୍କୋରରେ ଜାସନ ରୟଙ୍କୁ ହରାଇ ପ୍ରାରମ୍ଭିକ ଝଟକା ଖାଇଥିଲା। ରୟ ଖାତା ଖୋଲିବା ପୂର୍ବରୁ ପ୍ରଥମ ଓଭରର ଦ୍ୱିତୀୟ ବଲ୍ରେ ଭୁବନେଶ୍ୱର କୁମାରଙ୍କ ଦ୍ୱାରା ବୋଲ୍ଡ ହୋଇଥିଲେ। ଏହାପରେ ଦ୍ୱିତୀୟ ଉଇକେଟରେ ଜୋଶ ବଟଲର ଓ ଡାଓ୍ବିଡ ମଲାନ ୮୨ ବଲରୁ ଦ୍ରୁତ ୧୩୦ ରନକରି ସ୍ଥିତି ସମ୍ଭାଳିବା ସହ ଇଂଲଣ୍ଡକୁ ମଜଭୁତ ସ୍ଥିତି ପ୍ରଦାନ କରିଥିଲେ। ତେବେ ବଟଲର ୩୪ ବଲରୁ ୨ ଚୌକା ଓ ୪ ଛକା ସହ ୫୨ ରନକରି ଭୁବନେଶ୍ୱରଙ୍କ ବଲ୍ରେ ଲଙ୍ଗ୍ଅଫ୍ ବାଉଣ୍ଡରିରେ ହାର୍ଦ୍ଦିକ ପାଣ୍ଡ୍ୟାଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏହାପରେ ଜନି ବେୟାରଷ୍ଟୋ ୭ ରନ କରିଥିବା ବେଳେ ସାର୍ଦ୍ଦୁଳ ଠାକୁରଙ୍କ ବଲ୍ରେ ସୁଇପର କଭରରେ ସୂର୍ଯ୍ୟକୁମାରଙ୍କୁ କ୍ୟାଚ୍ ଦେଇ ପ୍ୟାଭିଲିୟନ ଫେରିବାର ଦୁଇଟି ବଲ୍ ପରେ ମଲାନ ୪୬ ବଲରୁ ୯ ଚୌକା ଓ ୨ ଛକା ସହ ୬୮ ରନକରି ଠାକୁରଙ୍କ ଦ୍ୱାରା କ୍ଲିନବୋଲ୍ଡ ହୋଇଥିଲେ। ୧୫ତମ ଓଭରରେ ଠାକୁର ଏହି ଦୁଇ ବ୍ୟାଟ୍ସମ୍ୟାନଙ୍କୁ ଆଉଟ କରିଥିଲେ। ଏହାର ଠିକ୍ ଦୁଇଟି ବଲ ପରେ ଅଧିନାୟକ ଇଅନ ମୋର୍ଗାନ ୧ ରନ କରି ପାଣ୍ଡ୍ୟାଙ୍କ ବଲ୍ରେ ଲମ୍ବା ଶଟ୍ ଖେଳିବାକୁ ଯାଇ ଲଙ୍ଗ୍ଅନ୍ରେ ବଦଳ ଖେଳାଳି ଲୋକେଶ ରାହୁଲଙ୍କୁ କ୍ୟାଚ୍ ଦେଇଥିଲେ ଓ ଇଂଲଣ୍ଡର ପଞ୍ଚମ ଉଇକେଟର ପତନ ହୋଇଥିଲା। ଏହା ଇନିଂସର ଟର୍ନିଂ ପଏଣ୍ଟ ସାବ୍ୟସ୍ତ ହୋଇଥିଲା। ଅଲରାଉଣ୍ଡର ବେନ ଷ୍ଟୋକ୍ସ ୧୪ ରନକରି ନଟରାଜନଙ୍କ ବଲ୍ରେ ଉଇକେଟକିପର ରିଷଭ ପନ୍ତଙ୍କୁ କ୍ୟାଚ ଦେଇଥିଲେ। ଜୋଫ୍ରା ଆର୍ଚର ୧ ରନକରି ରନ୍ ଆଉଟ ହୋଇଥିଲେ। କ୍ରିସ୍ ଜୋର୍ଡାନ ୧୧ ରନକରି ଠାକୁରଙ୍କ ବଲ୍ରେ ଲମ୍ବା ଶଟ ଖେଳିବାକୁ ଯାଇ ମିଡ୍ ଉଇକେଟରେ ସୂର୍ଯ୍ୟକୁମାରଙ୍କୁ କ୍ୟାଚ୍ ଦେଇଥିଲେ। ସାମ କୁରାନ ୧୪ ଓ ଆଦିଲ ରସିଦ ବିନା ସ୍କୋରରେ ଅପରାଜିତ ରହିଥିଲେ। ଭାରତ ତରଫରୁ ବୋଲିଂରେ ଠାକୁର ସର୍ବାଧିକ ୩, ଭୁବନେଶ୍ୱର ୨, ପାଣ୍ଡ୍ୟା ଓ ନଟରାଜନ ଗୋଟିଏ ଲେଖାଏ ଉଇକେଟ ହାସଲ କରିଥିଲେ।
