ମୁମ୍ବାଇ,୨୩।୧୨: ଓ୍ବାଙ୍ଖେଡେ ଷ୍ଟାଡିୟମରେ ଚାଲିଥିବା ଅଷ୍ଟ୍ରେଲିଆ ବିପକ୍ଷ ଏକମାତ୍ର ମହିଳା କ୍ରିକେଟ ଟେଷ୍ଟରେ ଭାରତ ମଜଭୁତ ସ୍ଥିତିରେ ରହିଛି। ଦ୍ୱିତୀୟ ଦିବସ ଖେଳ ଶେଷ ବେଳକୁ ଭାରତ ୭ ଉଇକେଟ ହରାଇ ୩୭୬ ରନ୍ ସଂଗ୍ରହ କରିଛି। ୩ ଉଇକେଟ ସୁରକ୍ଷିତ ଥିବାବେଳେ ଭାରତ ଅଷ୍ଟ୍ରେଲିଆ ପ୍ରଥମ ଇନିଂସଠାରୁ ୧୫୭ ରନରେ ଅଗ୍ରଣୀଲାଭ କରିଛି। ଅଷ୍ଟ୍ରେଲିଆ ମହିଳା ଦଳ ପ୍ରଥମ ଇନିଂସରେ ୨୧୯ ରନ କରିଥିଲା।
ପ୍ରଥମ ଦିବସର ଅସମାପ୍ତ ସ୍କୋର ୯୮/୧ରୁ ଖେଳ ଆରମ୍ଭ କରିଥିଲା ଭାରତ। ଅଷ୍ଟ୍ରେଲିଆ ବୋଲରଙ୍କୁ ସଫଳ ମୁକାବିଲା କରି ଭାରତର ୪ ବ୍ୟାଟର ଅର୍ଦ୍ଧଶତକ ହାସଲ କରିଥିଲେ। ଉପ ଅଧିନାୟିକା ସ୍ମୃତି ମନ୍ଧାନା ୭୪, ଜେମିମା ରୋଡ୍ରିଗ୍ବେଜ ୭୩ ଓ ରିଚା ଘୋଷ ୫୨ ରନକରି ଆଉଟ ହୋଇଥିବାବେଳେ ଦୀପ୍ତି ଶର୍ମା ୭୦ ରନରେ ଅପରାଜିତ ରହିଛନ୍ତି। ଚା’ ବିରତି ବେଳକୁ ଭାରତ ୭ ଉଇକେଟ ହରାଇ ୨୭୬ ରନ କରିଥିଲା।
ଦିବସରେ ଅନ୍ତିମ ସେସନରେ ଭାରତ ଇନିଂସ ଶୀଘ୍ର ଶେଷ କରିବାକୁ ଆଶା ରଖିଥିଲେ ଅଷ୍ଟ୍ରେଲିଆ ବୋଲର। ମାତ୍ର ଦୀପ୍ତି ଓ ପୂଜା ବସ୍ତ୍ରକାର ଅସମାପ୍ତ ୮ମ ଉଇକେଟରେ ୧୦୨ ରନ ଯୋଡ଼ି ପ୍ରତିପକ୍ଷ ବୋଲରଙ୍କ ଆଶାରେ ପାଣି ପକାଇ ଦେଇଥିଲେ। ତୃତୀୟ ସେସନରେ ୩୮ ଓଭରରୁ ୧୦୦ ରନ ସଂଗ୍ରହ ହୋଇଥିଲା। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲେ ଏହି ସେସନରେ ଭାରତ କୌଣସି ଉଇକେଟ ହରାଇ ନ ଥିଲା। ଚା’ ବିରତି ପରର ପ୍ରଥମ ଅଧଘଣ୍ଟା ଦୀପ୍ତି ଓ ପୂଜା ଅତି ସତର୍କତାର ସହ ଖେଳିଥିଲେ। ମାତ୍ର ପିଚ୍ ସହ ଅଭ୍ୟସ୍ତ ହେବାପରେ ସ୍ବାଭାବିକ ଷ୍ଟାଇଲରେ ଖେଳିବା ଆରମ୍ଭ କରିଥିଲେ। ଷ୍ଟମ୍ପ୍ସ ପ୍ରତ୍ୟାହୃତ ହେବା ବେଳକୁ ଦୀପ୍ତି ୭୦ (୯ ଚୌକା) ଓ ପୂଜା ୩୩ (୪ ଚୌକା) ରନରେ ଅପରାଜିତ ରହିଥିଲେ। ପୂର୍ବରୁ ଆତ୍ମବିଶ୍ୱାସର ସହ ଖେଳି ଇନିଂସ ଆଗେଇ ନେଇଥିବା ସ୍ମୃତି ମନ୍ଧାନା ୧୦୬ ବଲ୍ରୁ ୭୪ ରନ କରିଥିବାବେଳେ ଦୁର୍ଭାଗ୍ରଜନକଭାବେ ରନ୍ଆଉଟ ହୋଇ ଯାଇଥିଲେ। ନିଜ ଇନିଂସରେ ସେ ୧୨ ଚୌକା ଲଗାଇଥିଲେ। ମିଡିଲ ଅର୍ଡରରେ ରିଚା ଘୋଷ ଓ ଜେମିମା ରୋଡ୍ରିଗ୍ବେଜ ମୂଲ୍ୟବାନ ୧୧୩ ରନର ଭାଗୀଦାରି ଗଢ଼ିଥିଲେ। ରିଚା ୧୦୪ ବଲ୍ରୁ ୫୨ ଓ ଜେମିମା ୧୨୧ ବଲ୍ରୁ ୭୩ ରନ ସ୍କୋର କରିଥିଲେ। ଅଧିନାୟିକା ହରମନପ୍ରୀତ କୌର ଗୋଲ୍ଡେନ ଡକ୍ (୦)ରେ ଆଉଟ ହୋଇଥିଲେ। ଅଷ୍ଟ୍ରେଲିଆ ବୋଲରଙ୍କ ମଧ୍ୟରେ ଆଶଲେ ଗାର୍ଡନର ସର୍ବାଧିକ ୪ଟି ଏବଂ କିମ୍ ଗାର୍ଥ ଓ ଜେସ ଜୋନାସେନ ଗୋଟିଏ ଲେଖାଏ ଉଇକେଟ ନେଇଥିଲେ।
