ମୁମ୍ବାଇ,୩ା୧: ଟି୨୦ ବିଶ୍ୱକପ୍କୁ ଆଉ ମାତ୍ର ୧୮ ମାସ ରହିଥିବା ବେଳେ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ମିଶନ୍ ୨୦୨୪ ପାଇଁ ପ୍ରସ୍ତୁତ ହେଉଛି ଭାରତ। ଭାରତୀୟ ଦଳର ୩ ବରିଷ୍ଠ ଖେଳାଳି ରୋହିତ ଶର୍ମା, ଲୋକେଶ ରାହୁଲ ଓ ବିରାଟ କୋହଲିଙ୍କ ବିନା ହାର୍ଦ୍ଦିକଙ୍କ ନେତୃତ୍ୱରେ ଶ୍ରୀଲଙ୍କା ବିପକ୍ଷ ସିରିଜ ଖେଳିବ ଭାରତ। ୩ ମ୍ୟାଚ ବିଶିଷ୍ଟ ସିରିଜର ପ୍ରଥମ ଟି୨୦ ବୁଧବାର ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ଖେଳାଯିବ। ଦିନିକିଆ ବିଶ୍ୱକପ୍ ବର୍ତ୍ତମାନ ଭାରତୀୟ ମ୍ୟାନେଜମେଣ୍ଟ ପାଇଁ ପ୍ରାଥମିକତା ରହିଥିବା ବେଳେ ହାର୍ଦ୍ଦିକଙ୍କ ନିକଟରେ ୨୦୨୪ର ଯୋଜନା ପ୍ରସ୍ତୁତ ପାଇଁ ସମୟ ମଧ୍ୟ ରହିଛି। ବରିଷ୍ଠ ଖେଳାଳିଙ୍କୁ ଶ୍ରୀଲଙ୍କା ସିରିଜରୁ ବାଦ୍ ଦିଆଯାଇଥିବା ବେଳେ ଭାରତୀୟ ମ୍ୟାନେଜମେଣ୍ଟ ବର୍ତ୍ତମାନ ଭବିଷ୍ୟତ ଉପରେ ଲକ୍ଷ୍ୟ ରଖିଥିବା ସ୍ପଷ୍ଟ।
ଟିମ୍ କମ୍ବିନେଶନ: ନ୍ୟୁଜିଲାଣ୍ଡ ସିରିଜରେ ରିଷଭ ପନ୍ତ ଓ ଇଶାନ କିଶନ ଓପନ କରିଥିଲେ। ଦୁର୍ଘଟଣାର ସମ୍ମୁଖୀନ ହୋଇଥିବା ପନ୍ତ ଏହି ସିରିଜରୁ ବାଦ୍ ପଡିଥିବା ବେଳେ ଋତୁରାଜ ଗାଏକ୍ୱାଡ ଇନିଂସ ଓପନ କରିପାରନ୍ତି। ଉଭୟ କିଶନ ଏବଂ ଗାଏକ୍ୱାଡ ଆଇପିଏଲରେ ଭଲ ପ୍ରଦର୍ଶନ କରିଛନ୍ତି। ସେହିପରି ଅନ୍ୟତମ ଓପନିଙ୍ଗ ବିକଳ୍ପ ଭାବରେ ଶୁବମାନ ଗିଲ୍ ମଧ୍ୟ ରହିଛନ୍ତି। ୩ ନମ୍ବର ସ୍ଥାନରେ ସୂର୍ଯ୍ୟକୁମାର ଯାଦବଙ୍କ ଖେଳିବା ନିଶ୍ଚିତ ରହିଥିବା ବେଳେ ଦୀପକ ହୁଦା ଓ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ୪ ଓ ୫ ନମ୍ବର ଖେଳାଳି ରହିବେ। ମଧ୍ୟକ୍ରମରେ ଖାଲିଥିବା ଅନ୍ୟ ଏକ ସ୍ଥାନରେ ସଞ୍ଜୁ ସାମସନ୍ ଓ ରାହୁଲ ତ୍ରିପାଠୀଙ୍କ ମଧ୍ୟରୁ ଜଣଙ୍କୁ ସୁଯୋଗ ମିଳିବ। ବିଗତ କିଛି ସିରିଜ୍ ଧରି ତ୍ରିପାଠୀ ବେଞ୍ଚରେ ବସିଥିଲେ ମଧ୍ୟ ଅଭିଜ୍ଞତା ଦୃଷ୍ଟିରୁ ସାମସନଙ୍କୁ ସୁଯୋଗ ମିଳିବ। ସପ୍ତମ ସ୍ଥାନରେ ଓ୍ବାଶିଂଟନ୍ ସୁନ୍ଦର ଓ ଅକ୍ଷର ପଟେଲଙ୍କ ମଧ୍ୟରୁ ଜଣଙ୍କୁ ସୁଯୋଗ ମିଳିବ। ମୁଖ୍ୟ ସ୍ପିନର ଭାବରେ ୟୁଜବେନ୍ଦ୍ର ଚହଲଙ୍କୁ ଦଳରେ ସାମିଲ କରାଯାଇପାରେ। ଅନକ୍ୟାପ୍ଡ ଖେଳାଳି ଶିବମ ମାଭି ଓ ମୁକେଶ କୁମାର ଭାରତୀୟ ଦଳରେ ରହିଥିଲେ ମଧ୍ୟ ଅର୍ଶଦୀପ, ହର୍ଷଲ ପଟେଲ ଓ ଉମ୍ରାନ ମଲିକ୍ ବୋଲିଂର ନେତୃତ୍ୱ ନେଇପାରନ୍ତି। ଏସିଆ କପ୍ ଚାମ୍ପିୟନ ଶ୍ରୀଲଙ୍କା ପ୍ରିମିୟର ଲିଗ୍ ପ୍ରଦର୍ଶନ ଆଧାରରେ ଦଳ ଚୟନ କରିଛି। ଏହି ଦଳକୁ ଅଭିଷ୍କା ଫର୍ନାଣ୍ଡୋ, ଚାମିକା କରୁଣାରତ୍ନେ ଓ ସାଦିରା ସମରଓ୍ବିକ୍ରମା ପ୍ରତ୍ୟାବର୍ତ୍ତନ କରିଥିବା ବେଳେ ଭାନୁକା ରାଜପାକ୍ସେଙ୍କ ପ୍ରଦର୍ଶନ ଉପରେ ମଧ୍ୟକ୍ରମ ବ୍ୟାଟିଂର ଭାର ରହିବ।
