ନୂଆଦିଲ୍ଲୀ,୭।୧: ଭାରତ ଏବଂ ଆଫଗାନିସ୍ତାନ ମଧ୍ୟରେ ତିନି ମ୍ୟାଚ ବିଶିଷ୍ଟ ଟି-୨୦ ସିରିଜ ଜାନୁଆରୀ ୧୧ରୁ ଆରମ୍ଭ ହେବ। ଏଥିପାଇଁ ଟିମ ଇଣ୍ଡିଆ ଘୋଷଣା ହୋଇନାହିଁ। ଆଫଗାନିସ୍ତାନ ତାର ଦଳ ଘୋଷଣା କରିଛି ଏବଂ ଏହାର ଖେଳାଳିମାନେ ମଧ୍ୟ ଭାରତରେ ପହଞ୍ଚିଛନ୍ତି। ସିରିଜ ପୂର୍ବରୁ ଭାରତୀୟ ଦଳକୁ ବଡ଼ ଝଟ୍କା ଲାଗିଛି। ଅଭିଜ୍ଞ ଖେଳାଳି ହାର୍ଦ୍ଦିକ ପାଣ୍ଡ୍ୟା ଏବଂ ସୂର୍ଯ୍ୟକୁମାର ଯାଦବଙ୍କୁ ଏହି ସିରିଜରୁ ବାଦ ଦିଆଯାଇଛି। ଏଥିସହିତ ଆହତ କାରଣରୁ ଋତୁରାଜ ଗାଏକ୍ୱାଡ ମଧ୍ୟ ଉପଲବ୍ଧ ହେବେ ନାହିଁ।
ଆଙ୍ଗୁଠିରେ ଆଘାତ ହେତୁ ଗାଏକ୍ୱାଡ ଉପଲବ୍ଧ ହେବେ ନାହିଁ। ସେ ଇଂଲଣ୍ଡ ଟେଷ୍ଟ ସିରିଜର ପ୍ରାରମ୍ଭିକ ମ୍ୟାଚରୁ ମଧ୍ୟ ଦୂରେଇ ରହିବାର ସମ୍ଭାବନା ରହିଛି। ଉଭୟ ସୂର୍ଯ୍ୟକୁମାର ଏବଂ ହାର୍ଦ୍ଦିକ ଆଇପିଏଲରୁ ଫେରିବେ ବୋଲି ଆଶା କରାଯାଉଛି। ଡିସେମ୍ବରରେ ଦକ୍ଷିଣ ଆଫ୍ରିକାର ଟି-ଟେୱଣ୍ଟିରେ ଭାରତର ନେତୃତ୍ୱ ନେଇଥିବା ସୂର୍ଯ୍ୟକୁମାର ଜୋହାନ୍ସବର୍ଗର ତୃତୀୟ ତଥା ଅନ୍ତିମ ମ୍ୟାଚ୍ରେ ଫିଲ୍ଡିଂ କରୁଥିବାବେଳେ ଗୋଡରେ ଆଘାତ ଲାଗିଥିଲା। ନିକଟରେ ତାଙ୍କର ଗୋଡର ଅସ୍ତ୍ରୋପଚାର କରାଯାଇଥିଲା ଏବଂ କିଛି ମାସ ମଧ୍ୟରେ ସେ ତାଲିମକୁ ଫେରିବେ ବୋଲି ଆଶା କରାଯାଉଛି।
ଆଫଗାନିସ୍ତାନ ବିପକ୍ଷ ସିରିଜ ହେଉଛି ଟି-୨୦ ବିଶ୍ୱକପ ପୂର୍ବରୁ ଭାରତର ଶେଷ ଦ୍ୱିପାକ୍ଷିକ ଟି-୨୦ ସିରିଜ। ତେଣୁ ଏହି ସିରିଜ୍କୁ ବେଶ୍ ଗୁରୁତ୍ୱପୂର୍ଣ୍ଣ ମନେ କରାଯାଏ।
