ନୂଆଦିଲ୍ଲୀ,୫।୧: ଆଫଗାନିସ୍ତାନ ବିପକ୍ଷ ଟି -୨୦ ସିରିଜ ପାଇଁ ବିସିସିଆଇ ଶୁକ୍ରବାର ଟିମ ଇଣ୍ଡିଆର ଘୋଷଣା କରିପାରେ। ଏହି ସିରିଜ ଜାନୁଆରୀ ୧୧ରୁ ଆରମ୍ଭ ହେବ । ଖବର ଅନୁଯାୟୀ, ଏହି ସିରିଜରେ ରୋହିତ ଶର୍ମା ଏବଂ ବିରାଟ କୋହଲିଙ୍କ ଟି -୨୦ ଦଳରେ ପ୍ରତ୍ୟାବର୍ତ୍ତନ ହେବ ।
ଆଫଗାନିସ୍ତାନ ଦଳ ତିନି ମ୍ୟାଚ ବିଶିଷ୍ଟ ଟି -୨୦ ସିରିଜ ପାଇଁ ଭାରତ ଗସ୍ତ କରିବ। ସିରିଜର ପ୍ରଥମ ଟି -୨୦ ମ୍ୟାଚ ଜାନୁଆରୀ ୧୧ରେ ମୋହାଲିରେ ଖେଳାଯିବ। ଦ୍ୱିତୀୟ ଟି -୨୦ ୧୪ ଜାନୁଆରୀରେ ଇନ୍ଦୋରରେ ଏବଂ ତୃତୀୟ ତଥା ଅନ୍ତିମ ଟି -୨୦ ବାଙ୍ଗାଲୋରରେ ୧୭ ଜାନୁଆରୀରେ ଖେଳାଯିବ। ବିରାଟ କୋହଲି ଏବଂ ନିୟମିତ ଅଧିନାୟକ ରୋହିତ ଶର୍ମା ଟି -୨୦ ଫର୍ମାଟ ପାଇଁ ଉପଲବ୍ଧ ବୋଲି ଘୋଷଣା କରିଛନ୍ତି। ରିପୋର୍ଟ ଅନୁଯାୟୀ, କୋହଲି ଏବଂ ରୋହିତ ଟି -୨୦ ବିଶ୍ୱକପ ଖେଳିବାକୁ ଇଚ୍ଛା ପ୍ରକାଶ କରିଛନ୍ତି।
