ନୂଆଦିଲ୍ଲୀ,୧୨।୧: ଭାରତ ଏବଂ ଆଫଗାନିସ୍ତାନ ମଧ୍ୟରେ ତିନି ମ୍ୟାଚ ବିଶିଷ୍ଟ ଟି -୨୦ ସିରିଜ ଆରମ୍ଭ ହୋଇଛି। ଭାରତ ଗସ୍ତରେ ଆସିଥିବା ଆଫଗାନିସ୍ତାନ ଦଳକୁ ପ୍ରଥମ ମ୍ୟାଚରେ ପରାଜୟର ସମ୍ମୁଖୀନ ହେବାକୁ ପଡିଛି। ଗୁରୁବାର ମୋହାଲିରେ ଅନୁଷ୍ଠିତ ଟି -୨୦ ମ୍ୟାଚରେ ଭାରତ ଆଫଗାନିସ୍ତାନକୁ ୬ ଉଇକେଟ୍ରେ ପରାସ୍ତ କରିଛି। ଏବେ ଟିମ ଇଣ୍ଡିଆ ଦ୍ୱିତୀୟ ମ୍ୟାଚ ଜିତି ସିରିଜ ହାସଲ କରିବାକୁ ଚେଷ୍ଟା କରିବ।
ଭାରତ ଏବଂ ଆଫଗାନିସ୍ତାନ ମଧ୍ୟରେ ସିରିଜର ଦ୍ୱିତୀୟ ମ୍ୟାଚ ଇନ୍ଦୋରରେ ଖେଳାଯିବ। ଜାନୁଆରୀ ୧୪ରେ ଇନ୍ଦୋରର ହୋଲକର କ୍ରିକେଟ ଷ୍ଟାଡିୟମରେ ଏହି ଦୁଇ ଦଳ ମୁହାଁମୁହିଁ ହେବେ। ଏହି ମ୍ୟାଚ ସା ୭ଟାରୁ ଆରମ୍ଭ ହେବ।
ଭାରତ ଏବଂ ଆଫଗାନିସ୍ତାନର ଦଳ ଏ ପର୍ଯ୍ୟନ୍ତ ଟି -୨୦ ଇଣ୍ଟରନ୍ୟାଶନାଲରେ ୬ଥର ମୁହାଁମୁହିଁ ହୋଇଛନ୍ତି। ଆଫଗାନିସ୍ତାନ ଏଥିରେ ଥରେ ମାତ୍ର ଜିତିନାହିଁ। ଆଫଗାନିସ୍ତାନ ୫ଟି ମ୍ୟାଚରେ ପରାଜୟର ସାମ୍ନା କରିଥିବା ବେଳେ ଗୋଟିଏ ମ୍ୟାଚର ଫଳାଫଳ ବାହାରି ନ ଥିଲା। ଏପରିକି ଇନ୍ଦୋରରେ ମଧ୍ୟ ଟିମ ଇଣ୍ଡିଆର ପଲ୍ଲା ଭାରି ଥିବା ଜଣାପଡିଛି।
ଭାରତୀୟ ଦଳ ଏ ପର୍ଯ୍ୟନ୍ତ ଇନ୍ଦୋରରେ ତିନୋଟି ଟି -୨୦ ଅନ୍ତର୍ଜାତୀୟ ଖେଳିଛି। ଏଠାରେ ସେ ଦୁଇଟି ଜିତି ଗୋଟିଏ ହରିଛନ୍ତି। ଭାରତ ଏଠାରେ ଶ୍ରୀଲଙ୍କାକୁ ଦୁଇଟି ମ୍ୟାଚରେ ପରାସ୍ତ କରି ଦକ୍ଷିଣ ଆଫ୍ରିକା ବିପକ୍ଷରେ ଗୋଟିଏ ମ୍ୟାଚ ହାରିଛି।
