ଲିଡ୍ସ,୨୯।୮: ଲିଡ୍ସ ଟେଷ୍ଟରେ ଟିମ ଇଣ୍ଡିଆକୁ ଗୋଟିଏ ଇନିଂସ ଏବଂ ୭୬ ରନ୍ରେ ପରାସ୍ତ କରିଛି ଇଂଲଣ୍ଡ। ଖେଳର ତୃତୀୟ ଦିନରେ ଭାରତ ୨ ଉଇକେଟ ପାଇଁ ୨୧୫ ସ୍କୋର କରିଥିଲା ଏବଂ ଲାଗୁଥିଲା ଯେ ବିରାଟ କୋହଲି ଏବଂ ଚେତେଶ୍ୱର ପୂଜାରାଙ୍କ ଯୋଡି ଚତୁର୍ଥ ଦିନରେ ମଧ୍ୟ ବ୍ୟାଟିଂ କରି ଭାରତକୁ ଏକ ନିରାପଦ ସ୍ଥାନରେ ପହଞ୍ଚାଇବେ କିନ୍ତୁ ଏହା ହୋଇ ନଥିଲା। ଉଭୟ ବ୍ୟାଟ୍ସମ୍ୟାନ ଶୀଘ୍ର ଆଉଟ ହୋଇଥିଲେ ଏବଂ ଟିମ ଇଣ୍ଡିଆ ମାତ୍ର ୬୩ ରନରେ ଶେଷ ୮ ଉଇକେଟ ହରାଇଥିଲା। ମ୍ୟାଚ ହାରିଯିବା ପରେ ଟିମ ଇଣ୍ଡିଆ ଆଉ ଏକ ବଡ଼ ଝଟ୍କାର ସମ୍ମୁଖୀନ ହୋଇଛି। ଅଲରାଉଣ୍ଡର ରବିନ୍ଦ୍ର ଜାଡେଜାଙ୍କୁ ଡାକ୍ତରଖାନା ନିଆଯାଇଛି। ରବିନ୍ଦ୍ର ଜାଡେଜା ସୋସିଆଲ ମିଡିଆରେ ନିଜର ଏକ ଫଟୋ ପୋଷ୍ଟ କରିଛନ୍ତି। ଫଟୋରେ ତାଙ୍କୁ ଡାକ୍ତରଖାନାରେ ଥିବା ଦେଖାଯାଇଛି। ଡାକ୍ତରଖାନାରେ ରୋଗୀଙ୍କୁ ଦିଆଯାଇଥିବା ପୋଷାକ ମଧ୍ୟ ଜାଡେଜା ପିନ୍ଧିଛନ୍ତି। ସୂଚନା ଅନୁଯାୟୀ, ଜାଡେଜାଙ୍କୁ ସ୍କାନ ପାଇଁ ଡାକ୍ତରଖାନା ନିଆଯାଇଛି।
ସୂଚନାଯୋଗ୍ୟ ଯେ, ଲିଡ୍ସ ଟେଷ୍ଟରେ ଫିଲ୍ଡିଂ କରିବା ସମୟରେ ରବିନ୍ଦ୍ର ଜାଡେଜାଙ୍କ ଗୋଡରେ ଆଘାତ ଲାଗିଥିଲା। ଏହା ପରେ ସେ ମଧ୍ୟ କିଛି ସମୟ ପାଇଁ ପଡ଼ିଆ ବାହାରେ ଥିଲେ। ତେବେ ଖେଳର ଚତୁର୍ଥ ଦିନରେ ସେ ବ୍ୟାଟିଂ କରିବାକୁ ଆସି ୫ ଚୌକା ଓ ଗୋଟିଏ ଛକା ସହାୟତାରେ ୨୫ ବଲରେ ୩୦ ରନ ସଂଗ୍ରହ କରିଥିଲେ। ଲିଡ୍ସ ଟେଷ୍ଟର ପ୍ରଥମ ଇନିଂସରେ ଜାଡେଜା ଦୁଇଟି ଉଇକେଟ ନେଇଥିଲେ। ସେ ହସିବ ହମିଦ ଏବଂ ମୋଇନ ଅଲିଙ୍କ ଉଇକେଟ ନେଇଥିଲେ। ତେଣୁ ଜାଡେଜାଙ୍କ ଆଘାତ ଟିମ ଇଣ୍ଡିଆ ପାଇଁ ଏକ ବଡ଼ ଝଟକା। ସେପ୍ଟେମ୍ବର ୨ ତାରିଖରୁ ଓଭାଲ ଟେଷ୍ଟରେ ଖେଳିବା ତାଙ୍କୁ କଷ୍ଟକର ହୋଇପାରେ। ଓଭାଲ ଟେଷ୍ଟର ପିଚ ସ୍ପିନ ବୋଲରମାନଙ୍କୁ ସାହାଯ୍ୟ କରିଥାଏ ଏବଂ ରବିଚନ୍ଦ୍ରନ ଅଶ୍ୱିନ ଏକାଦଶରେ ସାମିଲ ହେବାର ସମସ୍ତ ସମ୍ଭାବନା ଅଛି ।
