ଖଇରା,୫।୩(ଉତ୍କଳବନ୍ଧୁ ପଣ୍ଡା): ବାଲେଶ୍ବରରୁ ସୋର ଯାଉଥିବା ଅନନ୍ୟା ବସ୍ ଖଇରା ପ୍ରାଣୀ ଚିକିତ୍ସାକେନ୍ଦ୍ର ନିକଟରେ ଭାରସାମ୍ୟ ହରାଇ ଏକ ଦୋକାନ ଉପରକୁ ମାଡିଯାଇଛି। ଫଳରେ ଜଣେ ଆହତ ହୋଇଥିବାବେଳେ ଦୋକାନଟି ସମ୍ପୂର୍ଣ୍ଣ ଭାଙ୍ଗିରୁଜି ନଷ୍ଟ ହୋଇଯାଇଛି । ଖଇରା ପୋଲିସ ଘଟଣାସ୍ଥଳରେ ପହଞ୍ଚି ବସ୍କୁ ଜବତ କରି ଥାନାକୁ ଆଣିଛନ୍ତି । ଆହତ ଜଣଙ୍କ ହେଲେ ନନ୍ଦୁର ଗ୍ରାମର ମାଳତୀ ମହାନ୍ତି । ତାଙ୍କର ମସ୍ତିଷ୍କରେ ଆଘାତ ଲାଗିଥିବା ବେଳେ ଚିକିତ୍ସା ପାଇଁ ତାଙ୍କୁ ପ୍ରଥମେ ଖଇରା ଓ ପରେ ଭଦ୍ରକ ସ୍ଥାନାନ୍ତର କରାଯାଇଛି । ପ୍ରତ୍ୟେକ ଦିନ ପରି ବାଲେଶ୍ବରରୁ କୁପାରୀ ଆସୁଥିବା ଏହି ଅନନ୍ୟା ନାମକ ବସ(ଓଡି୦୧ବିଏ ୨୬୨୭)ଖଇରା ପ୍ରାଣୀ ଚିକିତ୍ସାକେନ୍ଦ୍ର ନିକଟରେ ଭାରସାମ୍ୟ ହରାଇ ଆଳଦା ଗ୍ରାମର ମଣ୍ଟୁ ଦାସଙ୍କ ଘର ଉପରୁ ମାଡି ଯାଇଥିଲା । ଫଳରେ ତାଙ୍କର ଚାଓମିନ ଦୋକାନଟି ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା । ନନ୍ଦୁର ଗ୍ରାମର ମାଳତୀଙ୍କ ମୁଣ୍ଡରେ ଆଘାତ ଯୋଗୁ ତାଙ୍କୁ ଖଇରାରେ ଚିକିତ୍ସା ପରେ ବାଲେଶ୍ବର ସ୍ଥାନାନ୍ତର କରାଯାଇଛି। ଅନ୍ୟଯାତ୍ରୀମାନଙ୍କୁ ସୁରକ୍ଷିତ ଅବସ୍ଥାରେ ଉଦ୍ଧାର କରାଯାଇଥିଲା। ବିଜେଡି ସଭାପତି ରାଜେନ୍ଦ୍ର ଦାସ ଆହତଙ୍କୁ ମେଡିକାଲରେ ଭେଟି ଚିକିତ୍ସା ସମ୍ପର୍କରେ ପଚାରି ବୁଝିଥିଲେ । କିଛି ଡ୍ରାଇଭରଙ୍କୁ ନିଦ ଲାଗିବା ଦୁର୍ଘଟଣାର କାରଣ ବୋଲି କହୁଥିବା ବେଳେ ଆଉ କେହି ଷ୍ଟିୟରିଂ ଫେଲ ଯୋଗୁ ଏହି ଘଟଣା ଘଟିଥାଇପାରେ ବୋଲି ସନ୍ଦେହ ପ୍ରକଟ କରିଛନ୍ତି ।
