ସିମୁଳିଆ,୨୧ା୯(ସନ୍ତୋଷ କୁମାର ନାୟକ): ବାଲେଶ୍ୱର ଜିଲା ସିମୁଳିଆ ବ୍ଲକ ଶ୍ୟାମସୁନ୍ଦରପୁର ପଞ୍ଚାୟତ ଅଧୀନ ପଙ୍ଗିଆ ଅଞ୍ଚଳର ସାବିତ୍ରୀ ମିଶ୍ର ନାମକ ଜଣେ ଉପଭୋକ୍ତାଙ୍କୁ ବିଦ୍ୟୁତ୍ କର୍ମଚାରୀ ଆକ୍ରମଣ କରିଥିଲେ। ଏହି ଘଟଣାରେ ୪ ଦଫା ଦାବି ନେଇ ଗୁରୁବାର ପୂର୍ବାହ୍ନ ୧୦.୩୦ରୁ ଅପରାହ୍ନ ୨.୩୦ ପର୍ଯ୍ୟନ୍ତ ଏହି ପଞ୍ଚାୟତର ସମିତିସଭ୍ୟ ମୁକ୍ତିକାନ୍ତ ପାଣିଗ୍ରାହୀ ସିମୁଳିଆ ଉପଖଣ୍ଡ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। ତାଙ୍କ ସହିତ ଆହତ ସାବିତ୍ରୀଙ୍କ ସ୍ବାମୀ ଭାଗିରଥୀ, ପଡ଼ୋଶୀ ପ୍ରଭାତ ମହାନ୍ତି ସାମିଲ ହୋଇଥିଲେ। ପରେ ବିଦ୍ୟୁତ୍ ବିଭାଗୀୟ ଏସ୍ଡିଓ ରାଜନ ସ ଧାରଣାକାରୀଙ୍କ ସହିତ ଆଲୋଚନାକରି କାର୍ଯ୍ୟାନୁଷ୍ଠାନର ପ୍ରତଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଛି।
ସୂଚନାଯୋଗ୍ୟ, ୨୦୧୯ରେ ସାବିତ୍ରୀ ମିଶ୍ରଙ୍କ ପରିବାରକୁ ସରକାରଙ୍କ ପକ୍ଷରୁ ଏକ ଇନ୍ଦିରା ଆବାସ ଗୃହ ମିଳିଥିଲା। ସେ ଏହାକୁ ନିର୍ମାଣ ପାଇଁ ବିଦ୍ୟୁତ ତାରରେ ହୁକ ପକାଇ ପାଣିମଟର ଚଳାଉଥିବା ବେଳେ ବିଭାଗୀୟ ବିଦ୍ୟୁତ କର୍ମଚାରୀମାନେ ତାଙ୍କ ପାଣିମଟର ଓ ତାରକୁ ସିଜ୍ କରି ନେବା ସହିତ ୭ ହଜାର ଟଙ୍କାର ଫାଇନ କରିଥିଲେ। ପରେ ଗତ ମାର୍ଚ୍ଚ ମାସରେ ବିଭାଗ ପକ୍ଷରୁ ଓଟିଏସ୍ ସ୍କିମ୍ରେ ୩ହଜାର ଟଙ୍କା ନେଇ ତାଙ୍କ ମାମଲାର ସମାଧାନ କରିଥିବାର ସାବିତ୍ରୀଙ୍କ ସ୍ବାମୀ ଭାଗିରଥୀ ସୂଚନା ଦେଇଥିଲେ। ଅପରପକ୍ଷେ ପୁଣି ଗତ ୧୩.୯.୨୩ରେ ବିଦ୍ୟୁତ୍ କର୍ମଚାରୀମାନେ ତାଙ୍କ ଘରେ ପହଞ୍ଚି ପୂର୍ବ ୭ ହଜାର ଟଙ୍କା ଫାଇନ ନ ଦେଲେ ବିଦ୍ୟୁତ ସଂଯୋଗ କାଟିଦିଆଯିବ ବୋଲି କହିଥିଲେ। ଏହାକୁ କେନ୍ଦ୍ର କରି ସାବିତ୍ରୀଙ୍କ ପୁଅ କୃତ୍ତିବାସଙ୍କ ସହିତ ବିଦ୍ୟୁତ୍ କର୍ମଚାରୀମାନଙ୍କ ବଚସା ଓ ପରେ ହାତାହାତି ହୋଇଥିଲା। ପୁଅକୁ ରକ୍ଷା କରିବା ପାଇଁ ଯାଇ ସାବିତ୍ରୀ ଆହତ ହୋଇଥିଲେ। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ସିମୁଳିଆ ପରେ ଭଦ୍ରକ ଓ ସେଠାରୁ କଟକ ଡାକ୍ତରଖାନାକୁ ନିଆଯାଇଥିଲା। ଅଦ୍ୟାବଧି ସାବିତ୍ରୀ କଟକରେ ଚିକିତ୍ସିତ ହେଉଥିବାର ତାଙ୍କ ପରିବାର ପକ୍ଷରୁ ସୂଚନା ଦିଆଯାଇଛି। ତେବେ ଏହାକୁ କେନ୍ଦ୍ରକରି ସମିତିସଭ୍ୟ ମୁକ୍ତିକାନ୍ତ ସମ୍ପୃକ୍ତ ବିଦ୍ୟୁତ୍ କର୍ମଚାରୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିବା ସହିତ କ୍ଷତିଗ୍ରସ୍ତ ପରିବାରକୁ ୧ଲକ୍ଷ ଟଙ୍କା କ୍ଷତିପୂରଣ, ବକେୟା ବିଦ୍ୟୁତ୍ ବିଲର ସମାଧାନ ଓ ସିଜ୍ କରାଯାଇଥିବା ତାର ଓ ପାଣି ମଟର ଫେରସ୍ତ ପାଇଁ ଦାବି କରିଛନ୍ତି। ତୁରନ୍ତ ଏହାର ସମାଧାନ କରା ନ ଗଲେ ଜୋରଦାର ଆନ୍ଦୋଳନ କରାଯିବ ବୋଲି ସମିତିସଭ୍ୟ ମୁକ୍ତିକାନ୍ତ ପାଣିଗ୍ରାହୀ ସୂଚନା ଦେଇଛନ୍ତି।
