ମହାକାଳପଡା, ୨୫ା୩ (ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ରାମନଗର ପଞ୍ଚାୟତସ୍ଥିତ କାଜୁ ଫାର୍ମ ସମ୍ମୁଖ ରାସ୍ତାରେ ଅଜଣା ଜନ୍ତୁର ପାଦ ଚିହ୍ନ ଠାବ କରାଯାଇଥିଲା। ଏ ନେଇ ଧରିତ୍ରୀରେ ଖବର ପ୍ରକାଶ ପାଇବା ପରେ ବନ ବିଭାଗ ପକ୍ଷରୁ ଗୁରୁବାର ମହାକାଳପଡ଼ା ବନାଞ୍ଚଳ ଅଧିକାରୀ ସାହଜୀ ଚରଣ ବିଶ୍ୱାଳ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଥିଲେ। ତେବେ ଚିହ୍ନ ଠାବ କରିବା ୫ଦିନରୁ ଅଧିକ ହୋଇଥିଲେ ମଧ୍ୟ ବିଭାଗ ଏହି ଜଙ୍ଗଲ ରାସ୍ତାପାଶର୍ବ ପୁଙ୍ଖାନୁପୁଙ୍ଖ ଯାଞ୍ଚ କରିଥିଲା। ପୂର୍ବରୁ ଏହି ପାଦ ଚିହ୍ନ ଠାବ ଫଟୋ ଉଠାଯାଇଥିବା ଘଟଣାସ୍ଥଳରେ କିଛି ଜାଣି ହେଉନାହିଁ। ପରେ ଅଧିକ ଯାଞ୍ଚ କରାଯାଇ ଅଜଣା ଜନ୍ତୁ ପାଦ ଚିହ୍ନକୁ ଚିହ୍ନଟ କରାଯିବ ବୋଲି ବନାଞ୍ଚଳ ଅଧିକାରୀ ବିଶ୍ୱାଳ କହିଛନ୍ତି। ବିଭାଗ ପକ୍ଷରୁ ଏହି ପାଦ ଚିହ୍ନ ସମ୍ପର୍କରେ ଖୁବ୍ ଗୁରୁତର ସହ ବିଚାର କରାଯିବ ବୋଲି କୁହାଯାଇଛି। ସୂଚନାଯୋଗ୍ୟ, ୩୫୪ ହେକ୍ଟରରୁ ଅଧିକ ଜମିରେ ଏହି କାଜୁ ଜଙ୍ଗଲ ରହିଛି। ଓଡ଼ିଶା କାଜୁ ନିଗମ ଏହି ଜଙ୍ଗଲର ରକ୍ଷଣାବେକ୍ଷଣ କରୁଛି। ପ୍ରତି ବର୍ଷ ନିଲାମ କରାଯାଉଛି ବୋଲି ଜଣାପଡିଛି। ଏହି ଜଙ୍ଗଲରେ ବିଭିନ୍ନ ପ୍ରଜାତିର ସରୀସୃପ, ପକ୍ଷୀ, ବାର୍ହା, ହରିଣ, ଶିଆଳ ସମେତ ଜୀବଜନ୍ତୁ ବାସ କରନ୍ତି ବୋଲି ସ୍ଥାନୀୟ ଲୋକେ କହିଛନ୍ତି। ଅଜଣା ଜନ୍ତୁ ପାଦ ଚିହ୍ନ ଠାବ ସମ୍ପର୍କରେ ସ୍ଥାନୀୟ ଲୋକେ ବନ ବିଭାଗ କର୍ମଚାରୀଙ୍କ ନିକଟରେ ଅଭିଯୋଗ କରିଛନ୍ତି। ବନ ବିଭାଗ ପକ୍ଷରୁ ରେଞ୍ଜର ବିଶ୍ୱାଳଙ୍କ ସମେତ ବନ କର୍ମଚାରୀ ସତ୍ୟ ପ୍ରକାଶ ପାଣି, ପ୍ରଶାନ୍ତ ମହାନ୍ତି ପ୍ରମୁଖ ଘଟଣା ସ୍ଥଳରେ ଉପସ୍ଥିତ ଥିଲେ।
