ଲକ୍ଷ୍ନୌ,୨୦।୧୦: ଆସନ୍ତା ୨୦୨୨ର ଫେବୃୟାରୀ-ମାର୍ଚ୍ଚରେ ଉତ୍ତରପ୍ରଦେଶରେ ବିଧାନସଭା ନିର୍ବାଚନ ହେବାକୁ ଯାଉଛି। ଏହା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟରେ ନିର୍ବାଚନୀ ବିଗୁଲ ବଜାଇଛନ୍ତି। ବୁଧବାର ରାଜ୍ୟର କୁଶୀନଗରଠାରେ ଅନ୍ତର୍ଜାତୀୟ ବିମାନ ବନ୍ଦରକୁ ପ୍ରଧାନନ୍ତ୍ରୀ ଲୋକାର୍ପିତ କରିଛନ୍ତି। ସେହିପରି ୧୮୦.୬୬ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ୧୨ଟି ପରିଯୋଜନାର ଶିଳାନ୍ୟାସ ମଧ୍ୟ କରିଛନ୍ତି। ସେଥିମଧ୍ୟରେ ଗଣ୍ଡକ ନଦୀର ୮ଟି ବନ୍ୟା ସୁରକ୍ଷା ଯୋଜନା ରହିଛି।
ଅନ୍ୟ ପରିଯୋଜନା ମଧ୍ୟରେ ସ୍ବଦେଶ ଦର୍ଶନ ଯୋଜନା ଅନ୍ତର୍ଗତ ପର୍ଯ୍ୟଟନ ବିକାଶ କାର୍ଯ୍ୟକ୍ରମରେ ବୌଦ୍ଧ ସର୍କିଟ୍, ସୁକରୌଲ୍ ସରକାରୀ କଲେଜ ନିର୍ମାଣ, ବାକ୍ ବାଧିତ ବାଳିକା ଆବାସିକ ବିଦ୍ୟାଳୟ ନିର୍ମାଣ, କାସାୟା-ରାକକୋଲା ଏବଂ ରାମପୁର-ଖୁର୍ଦ, କୋଟଓ୍ବା, ଘୁଘାଲି ରାସ୍ତାରେ ପ୍ରଶସ୍ତିକରଣ ଆଦି ରହିଛି।
ଆସନ୍ତା ୩ରୁ ୪ ବର୍ଷ ମଧ୍ୟରେ ଦେଶରେ ୨୦୦ରୁ ଅଧିକ ନୂତନ ବିମାନ ବନ୍ଦର, ହେଲିପୋର୍ଟ ଆଦି ନିର୍ମାଣ କରାଯିବ। ଏହାଦ୍ୱାରା ଯୋଗାଯୋଗ ବ୍ୟବସ୍ଥାରେ ସୁଧାର ଆସିପାରିବ ବୋଲି ପ୍ରଧାନମନ୍ତ୍ରୀ ଏହି ଅବସରରେ ସୂଚନା ଦେଇଛନ୍ତି।
