ଯେଉଁ ବୟସରେ ଖେଳି ବୁଲିବା କଥା ସେହି ସମୟରେ ପରିବେଶ ଚିନ୍ତା କରୁଛନ୍ତି ତାମିଲନାଡୁର ପ୍ରସିଦ୍ଧି ସିଂ। ତାଙ୍କ ବୟସ ଏବେ ୭। ଏଇ କୁନି ପରିବେଶବିତ୍ ଆଗାମୀ ଦୁଇ ବର୍ଷ ମଧ୍ୟରେ ୧ ଲକ୍ଷ ଗଛ ଲଗାଇବାକୁ ଲକ୍ଷ୍ୟ ରଖିଛନ୍ତି। ଏବେ ସୁଦ୍ଧା ସେ ୧୩,୦୦୦ ଗଛ ଲଗାଇ ସାରିଲେଣି ଓ ରାଜ୍ୟରେ ୧୩ଟି ଫଳ ବଗିଚା କରିସାରିଛନ୍ତି। ତାଙ୍କ ସହ ସାମିଲ କୁନି ପରିବେଶ ଯୋଦ୍ଧାଙ୍କୁ ନେଇ ସେ ଏହା ସମ୍ଭବ କରିପାରିଛନ୍ତି। ତାଙ୍କୁ ମାତ୍ର ୨ ବର୍ଷ ବୟସ ହୋଇଥିତ୍ବାବେଳେ ସେ ତାଙ୍କ ବାରିରେ ଅନେକ ଗଛ ଲଗାଇବା ସହ ଅଗଣାରେ ଏକ ଔଷଧୀୟ ବଗିଚା କରିଥିଲେ। କିନ୍ତୁ ୨୦୧୬ରେ ଭର୍ଦ୍ଧାରେ ବାତ୍ୟା ଯୋଗୁ ଗଛଗୁଡ଼ିକ ନଷ୍ଟ ହୋଇଯିବା ପରେ ସେ ତାଙ୍କ ସାଙ୍ଗମାନଙ୍କୁ ନେଇ ଏଭଳି ଅଭିଯାନ ଆରମ୍ଭ କରିଥିଲେ। ସେ ସ୍କୁଲରେ ଏକ ଫଳ ବଗିଚା କରିଛନ୍ତି। ତାଙ୍କ ଜନ୍ମଦିନରେ ସେ ଏଥିରେ ୧୦୦ଟି ଫଳଗଛ ଲଗାଇଥିଲେ। ସେ ପ୍ରତିବର୍ଷ ‘ହାପିବାର୍ଥ ଡେ’ ପରିବର୍ତ୍ତେ ‘ଗ୍ରୀନ ବାର୍ଥ ଡେ’ ପାଳନ କରନ୍ତି। ପ୍ରସିଦ୍ଧି ସ୍କୁଲ ,କଲେଜ, ସରକାରୀ ଜାଗାରେ ଗଛ ଲଗାଇବା ଲାଗି ଯୋଜନା କରିଛନ୍ତି। ପେପର, ପେନସିଲ, ବୁକମାର୍କସ ଆଦି ବିକ୍ରି କରିବା ତଥା ଯୋଗ କ୍ଲାସ ଆୟୋଜନ କରି ଲୋକମାନଙ୍କଠାରୁ ପାଣ୍ଠି ଯୋଗାଡ କରୁଛନ୍ତି। ପଡ଼ୋଶୀମାନଙ୍କଠାରୁ ଫଳ ମଞ୍ଜି ସଂଗ୍ରହ କରୁଛନ୍ତି। କରୋନା ମହାମାରୀ ସମୟରେ ସେ ଶନିବାର ଗଛ ଲଗାଉଛନ୍ତି। ଗଛ ଲାଗାଇବାକୁ ଅନଲାଇନ କ୍ଲାସ ମାଧ୍ୟମରେ ପିଲାମାନଙ୍କୁ ପ୍ରୋତ୍ସାହିତ କରୁଛନ୍ତି। ଏବେ ପ୍ରସିଦ୍ଧିଙ୍କ ଅଭିଯାନରେ ସାମିଲ ହେବାକୁ ବହୁ ସଂସ୍ଥା ଆଗକୁ ଆସିଛନ୍ତି।
