କୀଟନାଶକର ନକାରାତ୍ମକ ପ୍ରଭାବରୁ ପ୍ରତିବର୍ଷ ଅନେକ ହଜାର ଚାଷୀଙ୍କ ଜୀବନ ଯାଉଛି। କୀଟନାଶକ ସ୍ପ୍ରେ କରିବା ସମୟରେ ସିଧାସଳଖ ଏହା ସଂସ୍ପର୍ଶରେ ଆସିବା ଯୋଗୁ ଏଭଳି ଘଟୁଛି। ତେବେ ଏହି ସମସ୍ୟାର ସମାଧାନ କରିବା ସହ ମୃତ୍ୟୁ ସଂଖ୍ୟା କମାଇ ପାରୁଛି ଡ୍ରୋନ୍ ସ୍ପ୍ରେ। ଡ୍ରୋନ ଦ୍ୱାରା କୀଟନାଶକ ସ୍ପ୍ରେ କରି ହରିୟାଣାର ନିଶା ସୋଲାଙ୍କି ଚାଷୀମାନଙ୍କ ଜୀବନ ରକ୍ଷା କରିବା ଲାଗି ଅଭିଯାନ ଚଳାଇଛନ୍ତି। ସେ ଫାର୍ମ ମେଶିନାରୀ ଆଣ୍ଡ୍ ପାଓ୍ବାର ଇଞ୍ଜିନିୟରିଂ ଶିକ୍ଷା ଶେଷ କରି ଉଦ୍ୟାନ ବିଭାଗରେ ଚାକିରି କରିଥିଲେ। ସେତେବେଳେ ସେ ଡ୍ରୋନ୍ ଦ୍ୱାରା କୀଟନାଶକ ସ୍ପ୍ରେ କରିବା କୌଶଳ ଶିକ୍ଷା କରିଥିଲେ। ଏବେ ସେ ସେହି ପଦ୍ଧତି ଆପଣାଇ ଏଗ୍ରି ଡ୍ରୋନ୍ ଦ୍ୱାରା ହରିୟାଣାର ଚାଷୀମାନଙ୍କୁ କୀଟନାଶକ ସ୍ପ୍ରେ କରିବାରେ ସାହାଯ୍ୟ କରୁଛନ୍ତି। ଏଥିପାଇଁ ସେ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶକଙ୍କଠାରୁ ରିମୋଟ୍ ପାଇଲଟ୍ ସାର୍ଟିଫିକେଟ ପାଇଛନ୍ତି। ସେ ଏବେ ରାଜ୍ୟରେ ୭୫୦ ଊର୍ଦ୍ଧ୍ୱ କୀଟନାଶକ ସ୍ପ୍ରେ ପ୍ରଦର୍ଶନ କରିସାରିଲେଣି। ୧୫ କେଜି ଓଜନର ଏହି ଏଗ୍ରି ଡ୍ରୋନ୍ରେ ୧ ଏକର ପିଛା ପାରମ୍ପରିକ ପଦ୍ଧତିରେ ଯେତିକି ଜଳ ସ୍ପ୍ରେ କରାଯାଏ ତା’ଠାରୁ ୧୫ ଗୁଣ କମ୍ରେ ହୋଇପାରୁଛି। କମ୍ ସମୟରେ ବି ଏହା ହୋଇପାରୁଛି। ଏଗ୍ରି ଡୋନ୍ ସ୍ପ୍ରେ ପ୍ରତି ସେ ହରିୟାଣାର ଅର୍ଦ୍ଧାଧିକ ଜିଲାର କୃଷକଙ୍କ ଦୃଷ୍ଟି ଆକର୍ଷଣ କରିସାରିଲେଣି। କମ୍ କୀଟନାଶକ, କମ୍ ପାଣିରେ ଅଧିକ ଜମିରେ ଏଗ୍ରି ଡ୍ରୋନ୍ ସହଜରେ ସ୍ପ୍ରେ କରି କୃଷକଙ୍କ ଜୀବନ ବଞ୍ଚାଇବାରେ ଭୂମିକା ନେଉଛି ବୋଲି କୁହନ୍ତି ନିଶା।
