ଗୋଟିଏ ଗାଁରେ ୨୦୦ରୁ ଊର୍ଦ୍ଧ୍ୱ ଆମ୍ବଗଛରେ ୨୦୦ ପ୍ରକାରର ଆମ୍ବ ଫଳିିବା କେବେ ଭାବିପାରୁଛ କି? କେରଳ ରାଜ୍ୟ କନ୍ନୁର ଜିଲାର କନ୍ନାପୁରମ୍ ଗାଁରେ ଏହା ଦେଖିପାରିବେ। ଆମ୍ବ ସଂସ୍କୃତି ଏହି ଗାଁ ଏବେ ଲୋକପ୍ରିୟ ହେବାରେ ଲାଗିଛି। କନ୍ନାପୁରମର ଆମ୍ବପ୍ରିୟ ଲୋକ ‘ନାଟ୍ଟୁମାନଜ୍ୟୋତି’(ଗୋଟିଏ ଆମ୍ବ ଗଛ ତଳେ) ଅଭିଯାନରେ ଏତେ ଗଛ ଲଗାଇ ତାହାର ଯନତ୍ ନେଉଛନ୍ତି। ଜଣେ ଜମିଦାର ଗାଁରେ ୨୦୦ ବର୍ଷର ଏକ ପୁରୁଣା ଆମ୍ବ ଗଛ କାଟି ଦେବା ପରେ ଅଧିକ ଗଛ ଲଗାଇବା ପାଇଁ ଗ୍ରାମବାସୀ ଏହି ଅଭିଯାନ ଆରମ୍ଭ କରିଥିଲେ। ଏହି ଗଛ ଥିଲା ଭେଲାଥାନ କିସମର ଆମ୍ବ ଗଛ। ଭାରି ସୁଆଦିଆ ଆମ୍ବ। ଏଣୁ ଗ୍ରାମବାସୀ ଏହି କିସମର ଆମ୍ବ ଫଳାଇବାକୁ ପୁଣି ଉଦ୍ୟମ କରିଥିଲେ। ଗଛ କଟାଯିବା ପରେ ଛୋଟଠୁ ବୁଢ଼ା ଗାଁର ସମସ୍ତ ଲୋକ ଏକାଠି ହୋଇ ସେହି ଆମ୍ବ ଗଛର ଡାଳ କାଟି ତାହାକୁ ଅନ୍ୟ ଗଛରେ କଲମି କରି ବିଭିନ୍ନ ପ୍ରକାର ସୁଆଦିଆ ଆମ୍ବଗଛ ଉତାରି ଭିନ୍ନ ଭିନ୍ନ ନାମ ଦେଇଛନ୍ତି। ସେମାନେ ଫେସ୍ବୁକରେ ବି ଏକ ନାଟ୍ଟୁମାନ୍ନଜ୍ୟୋତି ପେଜ୍ ଖୋଲିଛନ୍ତି। ଏହି ପେଜ୍ରେ ବିଭିନ୍ନ ଆମ୍ବଗଛର ନାମ ଓ ତା’ର ସ୍ବାଦ ସମ୍ପର୍କରେ ଜଣାଉଛନ୍ତି। ୨୦ଟି ପରିବାର ସେମାନଙ୍କ ଜମିରେ ଲଗାଇଥିବା ୩୭୨ଟି ଗଛରେ ୧୦୦ ପ୍ରକାର ଆମ୍ବ ଫଳେ। ପରେ ଗ୍ରାମବାସୀ ନିକଟସ୍ଥ ଗ୍ରାମଗୁଡିକରେ ଆଉ ୧୦୦ ପ୍ରକାର ଆମ୍ବ ଗଛର ସନ୍ଧାନ କରି ସେଥିରୁ କଲମି ମାଧ୍ୟମରେ ଗଛ ଉତାରି ଗାଁରେ ଲଗାଇଛନ୍ତି। ଏମିତିରେ ମୋଟରେ ଗାଁରେ ୨୦୮ ପ୍ରକାର ଆମ୍ବ ଗଛ ରହିଛି। ଏତିକିରେ ସେମାନଙ୍କ ଅଭିଯାନ ଶେଷ ହୋଇନି, ବରଂ ଆହୁରି ବେଶି ଗଛ ସେମାନେ ସଂଗ୍ରହ କରିବାରେ ଲାଗିଛନ୍ତି। ଜୁଲାଇ ୨୦,୨୦୨୦ରେ କେରଳ ଜୈବବିବିଧତା ବୋର୍ଡ ଏହି ଗାଁକୁ ‘ସ୍ବଦେଶୀ ଆମ୍ବ ସଂସ୍କୃତିର ଗାଁ’ ଆଖ୍ୟା ଦେଇଛି।
