ରାଜସ୍ଥାନର ମରୁଅଞ୍ଚଳରେ ଡାଳିମ୍ବ ଚାଷ କଥା ଶୁଣି ଆଶ୍ଚର୍ଯ୍ୟ ଲାଗୁଥିବ ନିଶ୍ଚୟ, କିନ୍ତୁ ଏହା ସତ। ରଘୁବୀର ସିଂ ରାଥୋଡଙ୍କ ଦ୍ୱାରା ଏହା ସମ୍ଭବ ହୋଇପାରିଛି। ସେ ମହାରାଷ୍ଟ୍ରରୁ ଚାରା ଆଣି ଲଗାଇଛନ୍ତି ୨୦୨୦ ମାର୍ଚ୍ଚରେ ପ୍ରଥମ ଉପତ୍ାଦନ କରିଛନ୍ତି। ରାଜସ୍ଥାନର ଜଇସାଲ୍ମେର ଅଞ୍ଚଳରେ ଚାଷ କରିବା ଭାରି କଷ୍ଟ। ଏଣୁ ସେଠାକାର ଚାଷୀମାନେ ମରୁଅଞ୍ଚଳରେ ଯେଉଁ ଚାଷରେ ସଫଳ ହୁଅନ୍ତି ତାହା ହିଁ କରିଥାନ୍ତି। କିନ୍ତୁ ରଘୁବୀର ସେମାନଙ୍କଠାରୁ ସମ୍ପୂର୍ଣ୍ଣ ଭିନ୍ନ। ସେ ଭାରତ-ପାକିସ୍ତାନ ସୀମାଠାରୁ ୧୫୦କିମି ଦୂର ଚନ୍ଦନ ଗାଁରେ ଡାଳିମ୍ବ ଚାଷ କରି ସଫଳତା ପାଇଛନ୍ତି। ସେ ୯,୦୦୦ ଡାଳିମ୍ବ ଗଛ ଉତାରି ସେଥିରୁ ଲକ୍ଷ ଲକ୍ଷ ଟଙ୍କା ରୋଜଗାର କରୁଛନ୍ତି। ସେଠାରେ ବର୍ଷରେ ଅଗଷ୍ଟ ସେପ୍ଟେମ୍ବରରେ ସ୍ବଳ୍ପ ବର୍ଷା ହେଲା ପରେ ପ୍ରାୟତଃ ବର୍ଷସାରା ଶୁଖିଲା ରହେ। ବର୍ଷକୁ ଏହି ଅଞ୍ଚଳରେ ୧୬୧ ମିମି ବର୍ଷହୁଏ। ତାପମାତ୍ରା ପାଖାପାଖି ୫୦ ଡିଗ୍ରୀ ସେଲସିୟସ ରହେ ଯାହା କୃଷି ପାଇଁ ଅନୁପଯୁକ୍ତ। ହେଲେ ଏହାକୁ ଖାତିର ନକରି ରଘୁବୀର ଟ୍ୟୁବଓ୍ବେଲ ଖୋଳି ଜଳସେଚନର ବ୍ୟବସ୍ଥା କରିଛନ୍ତି। ସେ ସିଞ୍ଚନ ପଦ୍ଧତି ଆପଣାଇଛନ୍ତି।
ରଘୁବୀରଙ୍କ ବୟସ ୩୩। ସେ ୨୦୧୬ରୁ ଏହି ଚାଷ ଆରମ୍ଭ କରି ଏବେ ସେଥିରୁ ପ୍ରଥମ ଲାଭ ପାଇଛନ୍ତି। ୨୫ ଏକର ଜମିରେ ଏହି ଚାଷ କରୁଛନ୍ତି। ଡାଳିମ୍ବ ଗଛକୁ କ୍ଷତି ନ ପହଞ୍ଚିବା ଲାଗି ଜମି ଚାରିପାଖରେ ନିମ୍ବ ଓ ବାଲିଝଡ଼ରୁ ରକ୍ଷା କରିବା ଲାଗି ବବୁଲ୍ ଗଛ ଲଗାଇଛନ୍ତି। ରଘୁବୀର ଫଳଯୋଗ୍ୟ ୪,୦୦୦ ଗଛରୁ ୩୦ ଟନ୍ ଉପତ୍ାଦିତ ଡାଳିମ୍ବକୁ ୧୧ ଲକ୍ଷ ଟଙ୍କାରେ ବିକ୍ରି କରି ୭.୫ ଲକ୍ଷ ଟଙ୍କା ଲାଭ କରିଛନ୍ତି।
