ଗରିବ ଓ ଅସହାୟ ପିଲାଙ୍କୁ ଛାତ୍ରବୃତ୍ତି ପାଇବାରେ କର୍ନାଟକର ଜଣେ ଅବସରପ୍ରାପ୍ତ ପ୍ରଧାନଶିକ୍ଷକଙ୍କ ପ୍ରୟାସ ଏକ ଉଦାହରଣ ସୃଷ୍ଟି କରିଛି। ଦକ୍ଷିଣ କନ୍ନଡ ଜିଲା କାର୍ପେ ଗାଁର ଶିକ୍ଷକ ନାରାୟଣ ନାୟକ ଏହି କାର୍ଯ୍ୟ ବିଗତ ୨୧ ବର୍ଷ ହେଲା କରିଆସୁଛନ୍ତି। ଏବେ ତାଙ୍କ ବୟସ ୮୦। ସକାଳ ୮ଟାରୁ ଘରୁ ବାହାରି ବିଭିନ୍ନ ସ୍କୁଲ, କଲେଜ, ସରକାରୀ ଅଫିସ ଓ ଘରୋଇ ପ୍ରତିଷ୍ଠାନଗୁଡ଼ିକୁ ଯାଉଛନ୍ତି। ଫେରୁଛନ୍ତି ସନ୍ଧ୍ୟା ୮ଟାରେ। ଏହି ସମୟରେ ଛାତ୍ରବୃତ୍ତି ପାଇବା ଲାଗି ଯୋଗ୍ୟ ଗରିବ ମେଧାବୀ ଛାତ୍ରୀଛାତ୍ରଙ୍କୁ ଠାବ କରୁଛନ୍ତି। ସ୍କୁଲ, କଲେଜ ପିଲାମାନଙ୍କ ସହ କଥା ହୋଇ ସ୍କଲାରଶିପ ପ୍ରଦାନ କରୁଥିବା ବିିଭିନ୍ନ ଏନ୍ଜିଓ ପ୍ରାୟୋଜକମାନଙ୍କ ସହ ସମ୍ପର୍କ କରାଇ ସେମାନଙ୍କୁ ସ୍କଲାରଶିପ ପାଇବାର ବନ୍ଦୋବସ୍ତ କରୁଛନ୍ତି। ଦୁଇ ଦଶନ୍ଧି ମଧ୍ୟରେ ତାଙ୍କ ମାଧ୍ୟମରେ ୧ଲକ୍ଷରୁ ଅଧିକ ଛାତ୍ରୀଛାତ୍ର ସ୍କଲାରଶିପ୍ ପାଇଛନ୍ତି; ଯାହାର ପରିମାଣ ପାଖାପାଖି ୫ କୋଟି ଟଙ୍କା। ପିଲାମାନେ କିଭଳି ସ୍କଲାରଶିପ ପାଇବେ ସେଥିପାଇଁ ନାୟକ ଗତ ବର୍ଷ ୨୦୦ ସ୍କୁଲ ପରିଦର୍ଶନ କରିଛନ୍ତି। ଦୀର୍ଘ ୩୮ ବର୍ଷ ଶିକ୍ଷକତା କରିବା ପରେ ୨୦୦୧ରେ ସେ ଅବସର ନେଇ ଉକ୍ତ କାର୍ଯ୍ୟ କରିଆସୁଛନ୍ତି। ଅବସର ପରେ ନାୟକ ୪୦ହଜାର ଟଙ୍କା ପେନ୍ସନ ପାଉଛନ୍ତି ଓ ସେଥିରୁ ଅଧା ଗସ୍ତ ଖର୍ଚ୍ଚରେ ଯାଉଛି। ନାୟକ ଛାତ୍ର ଜୀବନରେ ପଢ଼ିବାରେ ବହୁ ସମସ୍ୟାର ସମ୍ମୁଖୀନ ହୋଇଥିବାରୁ ଏଭଳି ସ୍ଥିତି କାହା ଭାଗ୍ୟରେ ନ ଆସୁ ବୋଲି ଏହି ଅଭିଯାନ ଆରମ୍ଭ କରିବାକୁ ନିଷ୍ପତ୍ତି ନେଇଥିେଲେ।
