ପେନ୍ସନ ଟଙ୍କାରେ ବୁଲା କୁକୁରଙ୍କୁ ଖାଇବାକୁ ଦେଇ ‘ଜୀବେ ଦୟା’ ଧ୍ୱନିକୁ ସାକାର କରିଛନ୍ତି ରାଜସ୍ଥାନର ଏକ ଦମ୍ପତି। କୋଟାରେ ରହୁଥିବା ୬୫ ବର୍ଷୀୟ ଶ୍ୟାମବୀର ସିଂ ଏବଂ ତାଙ୍କ ସ୍ତ୍ରୀ ୬୬ ବର୍ଷୀୟା ବୈଦ୍ୟ ବିଜେନ୍ଦ୍ରୀ ଗତ ତିନି ଦଶନ୍ଧି ହେଲା କୁକୁରମାନଙ୍କ ସେବା କରିଆସୁଛନ୍ତି। ପ୍ରତିଦିନ ଏମାନେ ୧୦୦ରୁ ଊର୍ଦ୍ଧ୍ୱ କୁକୁରଙ୍କୁ ଖାଇବାକୁ ଦେଉଛନ୍ତି ଓ ସେମାନଙ୍କ ପାଇଁ ୮ କେ.ଜି. ଅଟା, ୩.୫ କିଲୋ ଡଗ୍ ଫୁଡ୍, ୧୫ଟି ଅଣ୍ଡା, ୫ ଲିଟର କ୍ଷୀରରେ ଭୋଜନ ପ୍ରସ୍ତୁତ କରୁଛନ୍ତି। ସକାଳ ୯.୩୦ରେ ଖାଦ୍ୟ ପ୍ରସ୍ତୁତି କରି କାର୍ରେ ନେଇ କୁକୁରଙ୍କୁ ଖାଇବାକୁ ଦେଉଛନ୍ତି। କେବଳ ଏତିକି ନୁହେଁ, ଏହି ଦମ୍ପତି ମଧ୍ୟ ୨୫୦ରୁ ଊର୍ଦ୍ଧ୍ୱ କୁକୁରଙ୍କ ଅନ୍ତିମ ସଂସ୍କାର କରିଛନ୍ତି। ଏପରି କି ୧୦-୧୨ଟି ରୋଗଗ୍ରସ୍ତ କୁକୁରଙ୍କୁ ଘରେ ରଖି ସେମାନଙ୍କ ଚିକିତ୍ସା କରୁଛନ୍ତି। ଏହା ବ୍ୟତୀତ ରାସ୍ତାକଡ଼ କୁକୁରଙ୍କୁ ବି ଚିକିତ୍ସା କରୁଛନ୍ତି। ଚାକିରିରେ ଥିବା ସମୟରେ ୧୯୮୭ରୁ ଶ୍ୟାମବୀର ଉକ୍ତ ସେବା ଆରମ୍ଭ କରିଥିଲେ। କୁକୁର ପାଇଁ ରୋଷେଇ କରିବା ଓ ଖାଇବାକୁ ଦେବା ଏବଂ ସେମାନଙ୍କ ଚିକିତ୍ସା କରିବାରେ ଦମ୍ପତିଙ୍କର ଦିନ କଟିଯାଉଛି। ପ୍ରତି ମାସରେ ଏ ବାବଦରେ ୪୦ରୁ ୪୫ ହଜାର ଟଙ୍କା ଖର୍ଚ୍ଚ ହେଉଛି। ଏହି କାର୍ଯ୍ୟରେ ଦୁଇଜଣ ମହିଳାଙ୍କୁ ମଧ୍ୟ ନିଯୁକ୍ତ କରିଛନ୍ତି।
