ପ୍ଲାଷ୍ଟିକ ସାମଗ୍ରୀ ପରିବେଶ ପ୍ରଦୂଷଣ କରୁଥିବା ବେଳେ ଏହାର ବିକଳ୍ପ ଜିନିଷ ଆଖୁ ବର୍ଜ୍ୟରୁ ପ୍ରସ୍ତୁତ କରି ଏକ ଉଦାହରଣ ସୃଷ୍ଟି କରିଛନ୍ତି ଉତ୍ତରପ୍ରଦେଶର ବେଦ କ୍ରିଷ୍ଣ। ଅଯୋଧ୍ୟାରେ ‘ୟାଶ ପକ୍କା’ କମ୍ପାନୀର ଷ୍ଟ୍ରାଟେଜିକ୍ ହେଡ୍ ବା ମୁଖ୍ୟ ବେଦ କ୍ରିଷ୍ଣଙ୍କ ଦ୍ୱାରା ଏଭଳି ସଫଳତା ମିଳିପାରିଛି। ଏହି କମ୍ପାନୀ ପକ୍ଷରୁ ଆଖୁ ବର୍ଜ୍ୟରୁ ପ୍ରାପ୍ତ ଫାଇବର ପେଷ୍ଟରୁ ଟେବୁଲଓ୍ବେର (ଗିନା, ପ୍ଲେଟ, ଟ୍ରେ ଏବଂ କପ୍) ଆଦି ପ୍ରସ୍ତୁତ କରାଯାଉଛି। ଏହିସବୁ ଜିନିଷ ବ୍ୟବହାର ପରେ ୨ ମାସ ଭିତରେ ମାଟିରେ ସମ୍ପୂର୍ଣ୍ଣ ମିଶିଯାଉଛି। ଏହା ଫୁଡ୍ ଇଣ୍ଡଷ୍ଟ୍ରିରେ ପ୍ଲାଷ୍ଟିକର ବ୍ୟବହାର ରୋକିବା ସହ ପରିବେଶକୁ ଉପକାର ପହଞ୍ଚାଉଛି। ଅଯୋଧ୍ୟାର ଦେଢଶହ କି.ମି. ପରିଧିରେ ଚାଷୀମାନଙ୍କଠାରୁ ଆଖୁ ବର୍ଜ୍ୟ ସଂଗ୍ରହ କରାଯାଉଛି। ସେଥିରୁ ଅର୍ଦ୍ଧକଠିନ ବା ପେଷ୍ଟ ଆକାରର ଫାଇବର ପ୍ରସ୍ତୁତ କରାଯାଇ ସେଥିରୁ ବିଭିନ୍ନ ପ୍ରକାର ଜିନିଷ ତିଆରି ହେଉଛି। ଏବେ ୧୦,୦୦୦ ଟନ୍ ଓଜନର ବିଭିନ୍ନ ପ୍ରକାର ଜିନିଷ ପ୍ରସ୍ତୁତ କରାଯାଉଛି। ଦିନକୁ ୧୦ ଲକ୍ଷ ଟେବୁଲଓ୍ବେର୍ ତିଆରି କରାଯାଉଛି । ଆଖୁ ବର୍ଜ୍ୟର ଫାଇବରରୁ ମଧ୍ୟ କାଗଜ ପ୍ରସ୍ତୁତ କରାଯାଉଛି। କେବଳ ଏତିକି ନୁହେଁ ବାୟୋମାସରେ ଚାଲୁଥିବା ୮.୫ ମେଗାଓ୍ବାଟ୍ ବିଦ୍ୟୁତ୍ ପ୍ଲାଣ୍ଟରୁ ମିଳୁଥିବା ଶକ୍ତିକୁ ଉକ୍ତ କାର୍ଯ୍ୟରେ ବ୍ୟବହାର କରାଯାଉଛି।
