ବାଉଁଶ ତିଆରି ଜିନିଷ ପ୍ରସ୍ତୁତ କରି ପ୍ଲାଷ୍ଟିକ ବର୍ଜ୍ୟ ଦୂର କରିବାକୁ ଯୋଗେଶ ସିନ୍ଦେଙ୍କ ନିଆରା ପଦକ୍ଷେପ ସ୍ବାଗତଯୋଗ୍ୟ। ବାଉଁଶ ଜିନିଷ ବ୍ୟବହାର ବୃଦ୍ଧି କରି ଏବେ ସୁଦ୍ଧା ସେ ପାଖାପାଖି ୧୬.୫ ଲକ୍ଷ କେ.ଜି. ପ୍ଲାଷ୍ଟିକ ବର୍ଜ୍ୟ କମ୍ କରିବାକୁ ସକ୍ଷମ ହୋଇଛନ୍ତି। ମହାରାଷ୍ଟ୍ରର ପୁଣେ ନିବାସୀ ସିନ୍ଦେ ୨୦୧୬ରେ ‘ବାମ୍ବୋ ଇଣ୍ଡିଆ’ ଷ୍ଟାର୍ଟଅପ୍ ଗଠନ କରି ଫେସ୍ବୁକ ଓ ଇନ୍ଷ୍ଟାଗ୍ରାମ୍ ମାଧ୍ୟମରେ ଲକ୍ଡାଉନ୍ ସମୟରେ କାରିଗର ଯୋଗାଡ଼ କରି କାମରେ ଲଗାଇବା, ଅନ୍ୟ ବାଉଁଶ ଉପତ୍ାଦ ସମ୍ପର୍କରେ ଆଲୋଚନା କରିବା ଓ ବିଭିନ୍ନ ବ୍ୟବସାୟିକ ସଂସ୍ଥା ସହ ଚୁକ୍ତି କରିବା ଆଦି କାର୍ଯ୍ୟ ସହଜରେ କରିପାରିଛନ୍ତି। ସିନ୍ଦେ ପୁଣେ ନିକଟସ୍ଥ ଭେଲି ବ୍ଲକ୍ର ବିଭିନ୍ନ ଗାଁର ୪୦୦୦ କୃଷକଙ୍କୁ ବାଉଁଶ ଜିନିଷ ନିର୍ମାଣ କରିବାରେ ନିଯୁକ୍ତ କରିଛନ୍ତି। ସେମାନେ ବାଉଁଶରୁ ଟୁଥ୍ବ୍ରଶ, ସ୍ପିକର, ୟୁଟିଲିଟି ଷ୍ଟାଣ୍ଡ୍, ସ୍କାଏ ଲାଣ୍ଟିନ, ଡେସ୍କ ଅର୍ଗାନାଇଜର, କ୍ଲଥ୍ ପେଗ୍ସ ଆଦି ତିଆରି କରୁଛନ୍ତି। ଏହାବ୍ୟତୀତ ଟ୍ରାଭେଲ କିଟ୍ସ, ପାନିଆ, କି ଚେନ୍ଡେସ୍କଟପ୍ ଆସେସରିଜ୍ ଆଦି ମଧ୍ୟ ପ୍ରସ୍ତୁତ କରାଯାଉଛି। ପ୍ରଥମେ ସେମାନେ ଦିନକୁ ୧୦୦ ଟୁଥ୍ବ୍ରଶ ତିଆରି କରୁଥିଲେ, ଏବେ ସମ୍ମିଳିତ ଉଦ୍ୟମରେ କାରିଗରମାନେ ୫୦,୦୦୦ ବ୍ରଶ୍ ପ୍ରସ୍ତୁତ କରୁଛନ୍ତି। ୨୦୨୨ରେ ସେ ବାଉଁଶ ନିର୍ମିତ ଖେଳନା ଓ ଗହଣା ବଜାରକୁ ଛାଡିବା ଲାଗି ଯୋଜନା କରିଛନ୍ତି। ବାଉଁଶ ଉପତ୍ାଦର ଆଦୃତି ବୃଦ୍ଧି କରି ପ୍ରତିବର୍ଷ ୧ ମିଲିୟନ କେ.ଜି. ପ୍ଲାଷ୍ଟିକ ବର୍ଜ୍ୟ କମ୍ କରିବା ଲାଗି ଲକ୍ଷ୍ୟ ରଖିଛନ୍ତି ୪୨ ବର୍ଷୀୟ ସିନ୍ଦେ । ବ୍ୟବସାୟିକ କାର୍ଯ୍ୟ ଲାଗି ସେ ୪୨ ଜଣ ଲୋକଙ୍କୁ ନିଯୁକ୍ତି ମଧ୍ୟ ଦେଇଛନ୍ତି।
