କୋଭିଡ୍-୧୯ ମହାମାରୀରେ ସବୁଠାରୁ ଅଧିକ ପ୍ରଭାବିତ ହୋଇଛନ୍ତି ଶ୍ରମିକମାନେ। କାମଧନ୍ଦା ହରାଇ ଏମାନେ ରୋଜଗାରଶୂନ୍ୟ ହୋଇଯାଉଥିବାବେଳେ ଅରୁଣାଚଳ ପ୍ରଦେଶର ଆଇଏଏସ୍ ଅଧିକାରୀ ଦେବାଂଶ ଯାଦବ ହଜାର ହଜାର ମହିଳାଙ୍କୁ ବିଭିନ୍ନ ମାଧ୍ୟମରେ କାମ ଯୋଗାଇ ଦେଉଛନ୍ତି। ସେ ଏବେ ଚାଙ୍ଗଲାଙ୍ଗ ଜିଲାରେ ଡେପୁଟି କମିଶନର ଭାବେ କାର୍ଯ୍ୟ କରୁଛନ୍ତି। ସ୍ଥାନୀୟ ସ୍ବୟଂସହାୟିକା ଗୋଷ୍ଠୀ (ଏସ୍ଏଚ୍ଜି)ଗୁଡିକୁୁ ସଶକ୍ତ କରିବା ପାଇଁ ଦେବାଂଶ ସାନିଟାରୀ ପ୍ୟାଡ୍ ଓ ବାଉଁଶ ଫର୍ନିଚର ତିଆରି ୟୁନିଟ୍ ଆରମ୍ଭ କରିଛନ୍ତି। ଏପରି କିି ତାଙ୍କ ଜିଲାର ବୋର୍ଡୁମ୍ବସା ସର୍କଲର ଏକ ଏସ୍ଏଚ୍ଜି ୟୁନିଟ୍ରେ ମହିଳାମାନେ ସାନିଟାରୀ ପ୍ୟାଡ୍ ତିଆରି କରି କ୍ୱାରାଣ୍ଟାଇନ ସେଣ୍ଟରକୁ ଯୋଗାଇ ୩,୫୦,୦୦୦ ଟଙ୍କା ରୋଜଗାର କରିଛନ୍ତି। ପ୍ରତ୍ୟେକ ଏସ୍ଏଚ୍ଜିରେ ୧୦-୨୦ ଜଣଙ୍କୁ ସେ କାମ ଯୋଗାଇ ଦେଇଛନ୍ତି। ଏସ୍ଏଚ୍ଜିରେ ଶହ ଶହ ମହିଳା ବାଉଁଶ ଫର୍ନିଚର ତିଆରି କରିି ଭଲ ରୋଜଗାର କରୁଛନ୍ତି। ଡିଉନ ଅଞ୍ଚଳରେ ଏକ ହାଟର ବ୍ୟବସ୍ଥା ମଧ୍ୟ କରିଛନ୍ତି, ଯେଉଁଠି କେବଳ ମହିଳାମାନେ ବିଭିନ୍ନ ଜିନିଷ ବିକ୍ରି କରୁଛନ୍ତି। ଜିଲାରେ ୧୦ଟି ଫୁଡ୍ ପ୍ରୋସେସିଂ ୟୁନିଟ୍ ସ୍ଥାପନ କରାଯାଇଛି ଓ ଏଥିରେ ମହିଳାମାନଙ୍କୁ ନିଯୁକ୍ତି ଦିଆଯାଇଛି। ପ୍ରଶାସନ କୃଷିଜାତ ଦ୍ରବ୍ୟ ସେମାନଙ୍କୁ ଯୋଗାଇ ଦେଉଛନ୍ତି, ଯାହାଦ୍ୱାରା ସେମାନେ ସହଜରେ କାମ କରି ଲାଭ ପାଇପାରୁଛନ୍ତି। ପ୍ଲାଷ୍ଟିକ ଶ୍ରେଡ୍ଡର ମେଶିନ୍ର ବ୍ୟବସ୍ଥା କରି ଲୋକମାନଙ୍କୁ ନିଯୁକ୍ତ କରିଛନ୍ତି ଦେବାଂଶ। ଏଥିରୁ ପ୍ରସ୍ତୁତ ପ୍ଲାଷ୍ଟିକକୁ ନ୍ୟାଶନାଲ ହାଇଓ୍ବେଜ୍ ଆଣ୍ଡ୍ ଇନ୍ଫ୍ରାଷ୍ଟକ୍ଚର ଡେଭେଲପ୍ମେଣ୍ଟ କର୍ପୋରେଶନକୁ ବିକ୍ରି କରୁଛନ୍ତି।
