ଲିଙ୍ଗଗତ ସମାନତା ଆଣିବା ତଥା କନ୍ୟା ସନ୍ତାନଙ୍କ ଜନ୍ମ ଓ ଜୀବନ ସୁରକ୍ଷା ପାଇଁ ସରକାରୀ ସ୍ତରରେ ଅନେକ ଯୋଜନା ହାତକୁ ନିଆଯାଉଥିଲେ ବି ପୁଣେର ଜଣେ ଡାକ୍ତରଙ୍କ ନିଆରା ପ୍ରୟାସ ପ୍ରେରଣାଦାୟକ। ପୁଣେସ୍ଥିତ ମେଡିକେୟାର ହସ୍ପିଟାଲର ଡା. ଗଣେଶ ରାଖ୍ କନ୍ୟା ସନ୍ତାନଙ୍କ ଜନ୍ମ ମାଗଣାରେ କରାଉଛନ୍ତି। ଲିଙ୍ଗଗତ ସମାନତା ଆଣିବା ଲକ୍ଷ୍ୟରେ ମୁଲ୍ପି ବଚାଓ ଅଭିଯାନ (କନ୍ୟାସନ୍ତାନ ବଞ୍ଚାଅ ଅଭିଯାନ) ଆରମ୍ଭ କରିଥିଲେ। ଏହି ଅଭିଯାନରେ ଏବେସୁଦ୍ଧା ୨,୦୦୦ କନ୍ୟାସନ୍ତାନଙ୍କ ଜନ୍ମ ମାଗଣାରେ କରିସାରିଲେଣି। ଏ ବାବଦରେ ଖର୍ଚ୍ଚ ବହନ କରିବା କଷ୍ଟକର ହେଉଥିଲେ ମଧ୍ୟ ଲକ୍ଷ୍ୟପଥରୁ ହଟିବେ ନାହିଁ ବୋଲି କହୁନ୍ତି ଡା. ଗଣେଶ। ୯ ବର୍ଷ ହେବ ତାଙ୍କର ଉକ୍ତ ପ୍ରୟାସ ଅନେକ ଡାକ୍ତରଙ୍କୁ ପ୍ରେରଣା ଯୋଗାଇଛି। ଫଳରେ ସେମାନେ ମଧ୍ୟ ଡା. ରାଖ୍ଙ୍କ ପନ୍ଥା ଆପଣାଇଛନ୍ତି। ଏହାଦ୍ୱାରା ଭ୍ରୂଣହତ୍ୟା ଓ ଲିଙ୍ଗଗତ ଅସମାନତା ବିରୋଧୀ ସଂଗ୍ରାମରେ ତାଙ୍କୁ ବହୁ ସଫଳତା ମିଳିପାରିଛି। ଡା. ରାଖ୍ଙ୍କ ପିଲାଦିନ ବହୁ କଷ୍ଟରେ କଟିଥିଲା। ତାଙ୍କ ପିତା ଷ୍ଟେସନରେ କୁଲି କାର୍ଯ୍ୟ କରୁଥିଲେ। ଗଣେଶ ପଢ଼ା ସହ ତାଙ୍କୁ ସହଯୋଗ ମଧ୍ୟ କରନ୍ତି। ଏମିତି ଏକ ସ୍ଥିତିକୁ ସାମ୍ନା କରି ସେ ଶିକ୍ଷାଲାଭ କରି ଡାକ୍ତରୀ ପାସ୍ କରିବା ପରେ ସ୍ଥାନୀୟ ଅଞ୍ଚଳର ପୁଅ-ଝିଅଙ୍କ ଅନୁପାତ ଅସମାନତାକୁ ଲକ୍ଷ୍ୟ କରିଥିଲେ। ପରେ ଏହାକୁ ଦୂର କରିବାର ପ୍ରୟାସ ଆରମ୍ଭ କରିଥିଲେ।
