ଭାରତରେ ବିଭିନ୍ନ ବର୍ଗରେ ଭିନ୍ନ ଭିନ୍ନ ପରମ୍ପରା ବହୁକାଳରୁ ଚଳିଆସୁଛି। ସେଥିମଧ୍ୟରେ ରାଜସ୍ଥାନର ବାଂଶଓ୍ବାରା ଜିଲା ଡୁଙ୍ଗୁରପୁର ଅଞ୍ଚଳର ଆଦିବାସୀ ସମ୍ପ୍ରଦାୟରେ ଏକ ଅଜବ ପରମ୍ପରା ରହିଛି। ଏହା ଅନୁଯାୟୀ, ଆଦିବାସୀ ସମ୍ପ୍ରଦାୟରେ ପ୍ରଥମ ବିବାହ ପରେ ନବ ଦମ୍ପତିଙ୍କୁ ନେଇ ଦିଓ୍ବାଲି ଆଣା ଓ ମେରିଯୁ ପାଳନ କରାଯାଏ। ନବ ବିବାହିତ ଦମ୍ପତି ବିବାହର ପ୍ରଥମ ଦୀପାବଳି ପରଦିନ ଏହା ପାଳନ କରିଥାଆନ୍ତି। ସେମାନଙ୍କ ସୁଖୀ ଜୀବନ ପାଇଁ ଏହା ଉଦ୍ଦିଷ୍ଟ। ପରମ୍ପରା ଅନୁଯାୟୀ ନବବିବାହିତା କନ୍ୟା ପ୍ରଥମ ଦୀପାବଳି ପୂର୍ବରୁ ତାଙ୍କ ବାପଘରକୁ ଚାଲିଯାଆନ୍ତି ଓ ମାସେକାଳ ସେଠାରେ ରହନ୍ତି। ପରେ ଦୀପାବଳିର ଏକ ସପ୍ତାହ ପୂର୍ବରୁ ତାଙ୍କ ସ୍ବାମୀ ସାଙ୍ଗ, ଭାଇ ଓ ପରିବାର ସହ କନ୍ୟା ଘରେ ପହଞ୍ଚିଥାଆନ୍ତି। ସେଠାରେ ମହିଳାମାନେ ମଙ୍ଗଳଗୀତ ଗାଇ ଝିଅକୁ ବିଦା କରନ୍ତି। ପରେ ରୋଶଣି କରି ଦମ୍ପତି ଫେରନ୍ତି। ବାହାଘର ସମୟରେ ଯେଭଳି ବର କନ୍ୟାଙ୍କୁ ସ୍ବାଗତ କରାଯାଏ ଠିକ୍ ସେହିଭଳି ବର ଘରେ ସେମାନଙ୍କୁ ପାଛୋଟି ନିଆଯାଏ। ଏହା ପରେ ଉଭୟେ ଦୀପାବଳି ପାଳନ କରନ୍ତି। ଦୀପାବଳି ପରଦିନ ଗୋବର୍ଦ୍ଧନ ପୂଜା ହୁଏ। ଏହି ଦିନ ସୂର୍ଯ୍ୟୋଦୟ ପୂର୍ବରୁ ଦୁଆର ମୁହଁରେ ବର ଠିଆ ହୋଇ କନ୍ୟାଙ୍କୁ ଗୀତ ଗାଇ ଡାକିଥାନ୍ତି। ବର ପାଖକୁ ଆସିବା ପାଇଁ କନ୍ୟା ବାରମ୍ବାର ମନା କରନ୍ତି। ପରେ କନ୍ୟା ସଜେଇ ହୋଇ ହାତରେ ତେଲ ଧରି ବର ପାଖକୁ ଯାଏ ଓ ବର ହାତରେ ଧରିଥିବା ପଞ୍ଚମୁଖୀ ଦୀପରେ ତେଲ ଭରିବା ପରେ ନବଦମ୍ପତି ପରିବାର ସଦସ୍ୟଙ୍କୁ ନେଇ ଗାଁ ସାରା ବୁଲିଥାଆନ୍ତି। ଏହି ସମୟରେ ଗାଁର ସମସ୍ତେ ନବ ଦମ୍ପତିଙ୍କୁ ସୁଖୀ ଜୀବନ ପାଇଁ ଆଶୀର୍ବାଦ କରିଥାଆନ୍ତି।
