କୃଷ୍ଣସାର ମୃଗ ଓ ଛୋଟ ବାରାସିଂହାଙ୍କ ଜୀବନ ରକ୍ଷା କରିବାରେ ରାଜସ୍ଥାନର ଅନିଲ ବିଷ୍ନୋଇ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି। ଅନିଲ ଜଣେ କୃଷକ ଓ ସମାଜସେବୀ। ସେ ୧୦,୦୦୦ କୃଷ୍ଣସାର ମୃଗ ଓ ଛୋଟ ବାରାସିଂହାଙ୍କ ଜୀବନ ବଞ୍ଚାଇବାରେ ସକ୍ଷମ ହୋଇଛନ୍ତି। ହନୁମାନଗଡ଼ ଓ ଶ୍ରୀଗଙ୍ଗାନଗର ଅଞ୍ଚଳର ୬୦ଟି ପଞ୍ଚାୟତରେ ଏହି ଜୀବମାନଙ୍କୁ ସୁରକ୍ଷିତ ଭାବେ ରଖାଯାଇଛି। ଅନିଲ ପ୍ରଥମେ ୧୯୯୦ରେ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଏହି ଜୀବ ବିପଦରେ ଥିତ୍ଲେ ସୂଚନା ଦେବାକୁ ବିଭିନ୍ନ ଗାଁରେ ଲୋକ ରହିଛନ୍ତି। ଦିନ ହେଉ କି ରାତି ଅନିଲ ସେମାନଙ୍କଠାରୁ ସୂଚନା ପାଇବା କ୍ଷଣି ସେଠାରେ ପହଞ୍ଚି ଜୀବମାନଙ୍କୁ ଉଦ୍ଧାର କରୁଛନ୍ତି। ସେ ମଧ୍ୟ ଶିକାର ବନ୍ଦ କରିବା ଲାଗି ଅଭିଯାନ ଚଳାଇଛନ୍ତି। ଅନିଲ ବିଏଡ୍ ପାସ କରିବା ପରେ ତାଙ୍କ ଗାଁ ଲାଖାଶରକୁ ଫେରି ଶିକ୍ଷକ ହେବା ବଦଳରେ ଏହି କାର୍ଯ୍ୟ କରିବାକୁ ନିଷ୍ପତ୍ତି ନେଇଥିଲେ। ସେ ୬୦ଟି ପଞ୍ଚାୟତର ଗ୍ରାମବାସୀଙ୍କ ସହ ନେଟ୍ଓ୍ବର୍କ ‘କମ୍ୟୁନିଟି ରିଜର୍ଭ’ ମାଧ୍ୟମରେ ଯୋଗାଯୋଗ ରକ୍ଷା କରି ଏହି ଅଭିଯାନ ଚଳାଇଛନ୍ତି। ଏହା ମଧ୍ୟରେ ସେ ୩୦୦ ଶିକାରୀଙ୍କୁ ଧରି ପୋଲିସ ଜିମା ଦେଇଛନ୍ତି। ସେମାନଙ୍କ ବିରୋଧରେ ଚାଲୁଥିବା କେସ୍ରେ ସାକ୍ଷୀ ଭାବେ ହାଜର ହେଉଛନ୍ତି। ରାଜସ୍ଥାନର ୧୨ଟି ଜିଲାରେ ୩,୦୦୦ ଲୋକଙ୍କୁ ନେଇ ତାଙ୍କ ନେଟ୍ଓ୍ବର୍କରେ ସାମିଲ କରିପାରିଛନ୍ତି। ଏମାନଙ୍କୁ ନେଇ ଜଙ୍ଗଲୀ ଜୀବଙ୍କ ସୁରକ୍ଷା ପାଇଁ ରାଲିର ଆୟୋଜନ କରୁଛନ୍ତି। ଜୀବମାନେ ପାଣି ପିଇବା ଲାଗି ଗ୍ରାମବାସୀଙ୍କ ସହଯୋଗରେ ସେ ୬୬ଟି ପୋଖରୀ ମଧ୍ୟ ଖୋଳିଛନ୍ତି।
